2017-06-24 09:49:51 clouds 27o High | Kigali Rwanda

Dukurikire:
 
 

Ngoma: Abarokotse Jenoside bifuza ko urwibutso rwa Zaza rwatwikiirwa

Yanditswe na IMVAHO NSHYA

Kuya 2017-04-15 14:46:25

 
Share on:
 
Yasuwe:920
 
Yavuzweho:200
 
10
 
10

Abacitse ku icumu rya Jenoside bafite ababo bashyinguwe mu rwibutso rwa Jenoside rwa Zaza, mu murenge wa Zaza, akarere ka Ngoma, baravuga ko bababazwa nuko uru rwibutso rudasakaye, bakifuza ko ubuyobozi bwakora uko bushoboye rugatwikirwa, abaruruhukiyemo bakaruhukira mu mahoro, ahantu heza; batanyagirwa cyangwa ngo bicwe n’izuba.

Mu karere ka Ngoma hari inzibutso 6, zirimo urwa Sake, Zaza, Rukira, Kibungo, Mutenderi na Rukumberi.Muri izi, harimo rumwe rwo ku rwego rw’akarere, ruri mu murenge wa Kibungo.

Muri izi nzibutso 6 ariko, harimo ebyiri zubatse ndetse ziruhukiyemo imibiri y’abatutsi bishwe muri Jenoside, ariko zidatwikiriye.

JPEG - 132.1 kb
Guverineri w’intara y’Uburasirazuba Kazaire Judith, yasabye ubuyobozi bw’akarere kwihutisha gusakara inzibutso zidasakaye

Izo 2 zidasakaye ni urwa Mutenderi, n’urwa Zaza ruruhukiyemo imibiri isaga ibihumbi 15 y’abazize Jenoside yakorewe abatutsi mu mwaka wa 1994, yahimuriwe ikuwe mu nzibutso zo mu mirenge ya Karembo, Gashanda, na Mugesera, ari narwo abarokotse Jenoside basaba ubuyobozi ko bwarutwikira.

Uwamariya Agnès, ufite abo mu muryango we bashyinguwe muri uru rwibutso rwa Zaza, avuga ko bifuza ko rwasakarwa, ababyeyi n’abavandimwe babo bakaruhukira aheza.

Yagize ati “Iyo tubona urwibutso rurimo abantu bangana kuriya basaga ibihumbi 15, tukabona banyagirwa, biratubabaza cyane. Muturwanyeho rero mukadufata mu mugongo, mwadufasha kugira urwibutso ari narwo rugo imiryango yacu ituyemo, ruse neza.Hariya niho iwacu, mutwemereye mwabidufashamo, kandi Imana izabibahera umugisha.”

Nambaje Aphrodise, Umuyobozi w’akarere ka Ngoma na we yemeza ko inzibutso zidasakaye zikwiye gusakarwa, no gukomeza kubungabungwa.

Agira ati “Navuga ko nubwo hari intambwe yatewe mu gusubiza abacu icyubahiro, haracyari byinshi bigomba gukorwa kugira ngo imibiri yabo iruhukire mu nzibutso zimeze neza. Hari n’urwibutso rwa Zaza, dukwiye gufatanya tugashaka uburyo rwasakarwa, kandi n’izindi nzibutso zikabungabungwa uko bikwiye.”

Kazaire Judith, Umuyobozi w’intara y’Uburasirazuba na we yagejejweho iki cyifuzo n’abarokotse Jenoside yakorewe abatutsi, bafite ababo bashyinguwe muri uru rwibutso rwa Zaza, ubwo hasozwaga icyumweru cy’icyunamo; asaba ubuyobozi bw’akarere ka Ngoma kwihutisha ibikorwa byo gusakara inzibutso zidasakaye.

Ati “Mu karere ka Ngoma, ubu dufite urwa hano Zaza na Mutenderi zidatwikiriye, nasabye ubuyobozi bw’akarere, Meya n’abo bakorana kugira ngo izi nzibutso uko ari ebyiri, tuzihe umwihariko.N’iyo tutakora ibihambaye cyane, ariko tukaba tuzitwikiriye, hanyuma uko twishakamo amikoro tuzagende tuzubaka neza, uko tubyifuza.Rwose ndagira ngo mbubakire icyizere ko bizakorwa, ubuyobozi burabizirikana.”

Guverineri Kazaire avuga ko icyifuzo cy’ubuyobozi ari ukugira ngo inzibutso za Jenoside zibumbatiye ibimenyetso n’amateka, zibungabungwe mu buryo bwiza; kandi ngo bizajya bikomeza kwitabwaho, bigakorwa, hakurikijwe ubushobozi.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE