2017-12-11 14:03:29 clouds 27o High | Kigali Rwanda

Dukurikire:
 
 

Ngoma: 2017-2018:Buri munyeshuri n’umubyeyi bagomba gutera nibura igiti 1 cy’imbuto

Yanditswe na IMVAHO NSHYA

Kuya 2017-06-02 13:53:15

 
Share on:
 
Yasuwe:81
 
Yavuzweho:200
 
10
 
10

Abagize inama njyanama y’akarere ka Ngoma baratangaza ko mu mwaka utaha w’ingengo y’imari ya 2017-2018 hazashyirwaho gahunda yuko buri munyeshuri n’umubyeyi batera nibura igiti kimwe cyera imbuto ziribwa, ndetse hakazashyirwaho ingengo y’imari yagenewe kunoza iyi gahunda.

Banamwana Bernard, umuyobozi wa njyanama y’akarere ka Ngoma yabwiye Imvaho Nshya ko gahunda yo kongera ubuso buteyeho amashyamba imaze iminsi iganirwaho cyane.

Umwe mu mwanzuro abagize inama njyanama bahurijeho, ni uko hazashyirwaho gahunda ihamye yo gukangurira abaturage gutera ibiti, ariko hagahingwa cyane ibiti byera imbuto ziribwa nk’imyembe, avoka, amapera, amaronji, amapapayi n’ibindi.

JPEG - 322.7 kb
Banamwana Bernard, Perezida wa Njyanama y’akarere ka Ngoma asobanura ko imbaraga zizashyirwa mu gutera ibiti byera imbuto (Foto Manishimwe N)

Banamwana asobanura ko iyi gahunda izatangizwa mu buryo bw’ubukanguramba, aho buri mwana n’umubyeyi bazashishikarizwa gutera igiti nibura kimwe.

Ati “Ni gahunda twatekerejeho cyane, aho buri mwana w’umunyeshuri azagira igiti iwabo, buri mugore agire igiti mu rugo, noneho n’ibigo by’amashuri, buri kigo kigire gahunda yo gutera ibiti by’imbuto ku ishuri.”

Yakomeje agira ati “Twahisemo gushyira imbaraga mu biti by’imbuto kuko binatanga umusaruro kandi uwabihinze akunguka. Umwana niba ateye igiti cyera imbuto ari mu mashuri abanza, azagera igihe cyo kujya kwiga ayisumbuye na kaminuza cya giti gishobora kumufasha kumwishyurira.

Bizadufasha kurengera ibidukikije, bidufashe kurwanya imirire mibi, kandi binadufashe mu rwego rw’ubukungu kuko imbuto zizavaho zizajya zunganira abaturage zibinjiriza amafaranga.”

Icyakora nubwo njyanama y’akarere ka Ngoma ivuga ko ifite umugambi wo gutera ibiti byera imbuto ziribwa mu mwaka utaha w’ingengo y’imari, Mukarutesi Chantal uhagarariye inama y’igihugu y’abagore, CNF, muri aka karere, agaragaza ko iyi gahunda ishobora gukomwa mu nkokora n’ikibazo cy’ingemwe zidahagije.

Avuga ko no muri uyu mwaka uri kurangira wa 2016-2017, hari ingamba uru rwego rwari rwihaye, ariko imbogamizi zikaba ko habuze imbuto/ingemwe zo gutera.
Ati “Bikwiye gutegurwa neza, kuko hari igihe twagiye twiha intego zo gutera ibiti by’imbuto ariko tukabura ingemwe, mu gihe abagore twari dufite ubushake, ntibikunde. Icyakora bikozwe byaba byiza kuko byanafasha mu kurwanya imirire mibi, kuko imbuto zirafasha cyane.”

Banamwana Bernard, Perezida wa Njyanama y’akarere ka Ngoma, amara Mukarutesi impungenge, avuga ko kuri ubu hamaze gufatwa umwanzuro w’uko guhera mu ngengo y’imari ya 2017-2018 hagomba gutegurwa ubuhumbikiro bw’ingemwe buhagije muri kano karere, by’umwihariko z’ibiti by’imbuto ziribwa.

Kugeza ubu mu karere ka Ngoma ubuso buteyeho amashyamba buri kuri 17%, mu ntara y’Uburasirazuba 5% by’ubutaka bw’intara ni bwo buteweho amashyamba, mu gihe amabwiriza ateganya ko nibura ubuso bungana na 30% ari bwo bugomba kuba buhinzweho amashyamba.

MANISHIMWE NOËL

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE