Advertisement
 
 
 
 
 
 
 
 

Amakuru | Mu Ntara | Intara

Mwurire: Imibiri 130 y’Abatutsi bazize Jenoside yashyinguwe mu cyubahiro   

  Yanditswe na RUBIBI OLIVIER na HAKIZIMANA YUSSUF
 April 2016

 
 

Imibiri 130 y’Abatutsi bishwe muri Jenoside yakorewe Abatutsi yashyinguwe mu cyubahiro mu rwibutso rwa rwa Mwurire mu karere ka Rwamagana.

Urwibutso rwa Jenoside yakorewe Abatutsi rwa Mwurire mu karere ka Rwamagana rukaba rumaze gushyingurwamo imibiri 26,796 y’Abatutsi bishwe muri Jenoside, abenshi muri bo akaba ari abari batuye mu cyahoze ari Komine Bicumbi na Gikoro, ubu akaba ari mu karere ka Rwamagana.

Nk’uko bamwe mu batangabuhamya barokokeye muri aka gace babivuga, abenshi mu bashyinguye mu rwibutso rwa Jenoside yakorewe Abatutsi rwa Mwurire ngo bishwe ku itariki ya 18 Mata 1994, nyuma y’igihe kinini barwana n’interahamwe, abajandarume ndetse n’umutwe w’ingabo zidasanzwe(Force Speciale) za Habyarimana.

JPEG - 243.3 kb
Imibiri 130 y’abatutsi bazize Jenoside yashyinguwe mu cyubahiro (Foto Hakizimana Y)

Rutareka Jean Marie Vianney warokokeye ku musozi wa Mwurire yabwiye Itangazamakuru ko birwanyeho kugera ku itariki ya 18 ubwo hazaga abasirikare batangira kubarasa bakoresheje imbunda nini.

Yagize ati:“Tariki ya 18 Mata nibwo batugabyeho igitero bakoresheje imbunda za rutura, haje abajandarume, abajepe, abapolisi hamwe n’interahamwe batumishamo amasasu bakoresheje ibibunda bya rutura.

Guhera tariki ya 11 kugeza ku ya 17 twari twagerageje kwirwanaho dukoresheje amabuye hamwe n’intwaro gakondo. Twafashe imbunda ariko nta bantu bari bazi kuyirashisha, imodoka zabo twarazibateshaga, twirwanyeho ariko ku itariki ya 18 Mata 1994 nibwo haje abasirikare baturusha imbaraga.”

Mu gihe cya Jenoside yakorewe Abatutsi mu 1994, Abatutsi bari ku musozi wa Mwurire, baje baturutse mu duce twa Mabare, Nawe, Rubona, Bicumbi, Kimbazi no mu tundi duce dutandukanye bahurira i Mwurire batangira kwirwanaho.

Bagendeye ku mabwiriza ya bamwe mu bayobozi babo barimo Guido Karenzi ndetse na Kidamage barwanyije Interahamwe n’abasirikare ba Habyarimana kugera ku itariki ya 18 Mata 1994.

JPEG - 144.8 kb
Abarokotse Jenoside yakorewe Abatutsi bari baje kunamira ababo biciwe i Mwurire

Muhoza Theogene Sunday, wari i Mwurire mu gihe cya Jenoside yakorewe Abatutsi, ahamya ko abana bakiri bato ndetse n’abagore bakoraga akazi ko kujya kushaka amabuye abagabo nabo bakarwana.

Nk’uko Muhoza yakomeje abivuga, kuva ku itarikii ya 11 kugera ku itariki ya 17 Mata 1994 bari bakihagazeho n’abapfaga ngo byabaga ari iby’umuntu uri ku rugamba. Muri iyi minsi igera kuri itandatu ngo hari hamaze gupfa abantu batageze kuri 200 mu bantu bari bahungiye kuri uyu musozi basaga ibihumbi 20.

Mu ijoro ryo kuwa 17 Mata , ngo nibwo haje indege zimurika aho abantu bari bahungiye, mu gitondo bagabwaho igitero n’abasirikare, abajandarume ndetse n’interahamwe. Muhoza avuga ko abasirikare baje bakurira ibiti ubundi bakazajya babarashisha imbunda ziremereye.

Yagize ati:“Abasirikare bari buriye ibiti nibo batuzonze, Guido abaarapfuye n’abandi bari batuyoboye intege ziba ziracitse.Kuva ubwo ngo interahamwe zabagiyemo n’imihoro, impiri n’ibyuma bica abantu.”

Muhoza yakomeje avuga ko Abatutsi bari bahungiye ku musozi wa Mwurire bari benshi cyane ndetse bamwe bakaba barakomeje kwirukanka bashaka uko bakiza ubuzima bwabo, ariko bagenda bagwa mu bice bitandukanye nka Nkamba, Muyumbu n’ahandi.

JPEG - 161.9 kb
Abayobozi batandukanye bari baje kwifatanya n’abarokokeye i Mwurire

Umuyobozi w’Intara y’Uburasirazuba Uwamariya Odette, yasabye abarokotse Jenoside bo mu karere ka Rwamagana gukomeza bakarangwa n’ubutwari bagaragaje mu gihe cya Jenoside yakorewe Abatutsi, aho bagerageje kwirwanaho uko bashoboye, yabasabye kandi gukomeza kuraga abana babo amahoro ndetse n’urukundo.

Yagize ati “Kuba hari abapfuye igihe cy’urugamba ntabwo tubyicuza kuko barokoye benshi. Kubashimira birangwe no gukunda igihugu, kugikorera ndetse no kucyitangira biramutse bibaye ngombwa.”

Guverineri Uwamariya yihanangirije abagifite ingengabitekerezo ya Jenoside, aho yavuze ko Abanyarwanda batazihanganira abagifite ingengabitekerezo ya Jenoside ndetse n’abagifite kubiba urwango mu bana b’u Rwanda.

Umusozi wa Mwurire aho Abatutsi bo mu cyahoze ari Bicumbi na Gikoro bagerageje kwirwanaho, niwo watoranyijwe kubakwaho ikigo cya Gisirikare, ibikorwa byo kwimura abaturage bikaba bigeze kure.

 

Comments

 
 
Urubyiruko rw’i Rusizi rugiye guhabwa inkoko 18 000
Urubyiruko rw’i Rusizi rugiye guhabwa inkoko 18 000

Ubuyobozi bw’akarere ka Rusizi buravuga ko mu mezi make ari imbere inkoko 18.000 zigiye guhabwa urubyiruko rwibumbiye mu makoperative. Ni umushinga munini kandi urambye uzarukura mu bukene (...)

Rubavu:Kiliziya Gatolika yahagurukiye ikibazo cy’abasore n’inkumi bishyingira
Rubavu:Kiliziya Gatolika yahagurukiye ikibazo cy’abasore n’inkumi bishyingira

Ubuyobozi bwa Paruwasi Gatolika ya Gisenyi mu karere ka Rubavu, buravuga ko bwiteguye gufasha urubyiruko mu buryo bwose bushoboka, ariko rugacika ku muco wo kwishyingira ugenda ufata indi ntera. (...)

Karongi:Arasaba ubufasha bwo kwivuza kanseri yo mu maraso amaranye umwaka
Karongi:Arasaba ubufasha bwo kwivuza kanseri yo mu maraso amaranye umwaka

Nyiranshuti Venantie, umubyeyi w’imyaka 60 utuye mu mudugudu wa Kananira, akagari ka Birambo, umurenge wa Gashali mu karere ka Karongi, arasaba ubufasha bwo kwivuza Kanseri yo mu maraso amaranye (...)

Ubwato Perezida Kagame  yahaye abaturage bo ku Nkombo buratanga umusaruro ushimishije
Ubwato Perezida Kagame yahaye abaturage bo ku Nkombo buratanga umusaruro ushimishije

Abaturage bo mu murenge wa Nkombo mu karere ka Rusizi, barashimira cyane Perezida Paul Kagame wabahaye ubwato bwabakuye mu bwigunge, ubu bakaba banishimira ko umusaruro w’amafaranga arenga (...)

Hagiye gushingwa ikigo kizarererwamo abana ababyeyi basigaga ku mupaka w’u Rwanda na Congo
Hagiye gushingwa ikigo kizarererwamo abana ababyeyi basigaga ku mupaka w’u Rwanda na Congo

Nyuma y’aho mu karere ka Rubavu hagiye havugwa ikibazo gikomeye cy’abana basigwa ku mupaka n’ababyeyi babo, babareresha abandi bana bagenzi babo, mu gihe bo baba bagiye gucururiza Kongo, ubu (...)

Advertisement

OPP. MAGERWA, EXPO GROUND, GIKONDO KIGALI, RWANDA PHONE NO : +250-784867952 / 53

© Copyright 2015: Imvaho Nshya. All rights reserved.
Powered by: RPPC.