Advertisement
 
 
 
 
 
 
 
 

Amakuru | Mu Ntara | Intara

Musenyeri Dr Mbanda, wakuriye mu buzima bubi, yiyemeje kwitangira amashuri y’incuke   

  Yanditswe na NGABOYABAHIZI PROTAIS
 4 May

 
 

Musenyeri Dr Mbanda Laurent, avuga ko kuba hari ibyo atabonye mu buzima bwe akiri muto, yasabye Imana igihe kirekire ko yazamufasha akazabikorera abandi, akaba ari muri urwo rwego ashyize imbaraga muri gahunda y’amashuri y’incuke muri Diyoseze ya Shyira ayobora.

Diyoseze ya Shyira ni imwe mu zigize itorero ry’Abangilikani mu Rwanda (EAR), kuri ubu rigaragaramo ibigo by’incuke byinshi.

Mu kiganiro yagiranye n’Imvaho Nshya, Musenyeri Dr Laurent Mbanda, yagaragaje ko uburyo yakuriyemo butamwemereye kwiga amashuri y’incuke, iyi ikaba impamvu nyamukuru ituma ashyize imbere uburezi bw’incuke.

Yagize ati:“Nakuriye mu buzima bubi bwo mu makambi atandukanye, abana bato nta burere twahawe ngo dutangire kwiga dufite imyaka mike nk’iy’aba bana.

JPEG - 62.2 kb
Musenyeri Dr Mbanda yateje imbere amashuri y’incuke muri Diyosezi ya Shyira (Foto Ngaboyabahizi P)

Ibi nabisabye Imana irabimpa kandi izakomeza kumfasha, iyo mbonye abana bakina biga ari incuke biranezeza, kuko ni bumwe mu buryo bwo kubaka umuntu nyamuntu”.

Akomeza avuga ko n’ubwo igihugu cy’u Rwanda cyanyuze mu ngorane bamwe bakavutswa amahirwe yo kwiga, ubu abanyarwanda bafite amahirwe yo kugira ubuyobozi bwiza, ku buryo uhereye ku mwana ukagera ku musaza buri wese ahabwa amahirwe yo kwiga.

Ibigo mbonezamikurire muri Diyoseze ya Shyira bimaze guteza imbere imiryango y’ababyeyi bareremo.Kuri ubu habarurwa ibigo ibigera kuri 410 n’abana bagera ku bihumbi 22, ibi bigo bikaba byubatswe mu maparuwasi atandukanye y’iri torero, kandi abana babyigamo bahabwa igikoma n’amagi mu buryo buhoraho.

Umwe mu babyeyi barerera muri aya mashuri y’incuke, Mujawimana Dorcas, yabwiye Imvaho Nshya ati:“Gahunda y’ibigo mbonezamikurire idufatiye runini, aho abana kuva ku myaka 4 kugera kuri 5 bajya kuhafatira ubumenyi, ibi byatumye natwe twigira mu kazi kacu ka buri munsi kubera ko tuba twizeye umutekano wabo.

Bahigira ikinyabupfura n’indimi z’amahanga, biba rero bitandukanye no kuba baririrwaga mu mudugudu bazerera”.

Uyu mubyeyi yongeraho ko atari abana bahakura ubumenyi gusa ngo kuko n’ababyeyi bahungukira ubundi bumenyi.

Yagize ati:“Diyoseze ya Shyira ntabwo irera abana gusa ku masomo, ibaha n’indyo nziza, ibi kandi ntabwo bicira aho gusa, kuko natwe idutoza uburyo bwo kuyitegura.

Dufite buri wese akarima k’igikoni, kandi mu rwego rwo kugira ngo abana bakomeze kubaho neza twatojwe korora inkoko”.

Ibigo mbonezamikurire kuri ubu Diyosezi ya Shyira ishoramo ingengo y’imari ingana na miliyoni 50 ku mwaka, hakiyongeraho n’inkunga ya Imbuto Foundation n’ishami ry’umuryango w’abibumbye UNICEF.

Kuri ubu amatorero n’amadini atandukanye aza kwigira kuri Diyosezi ya Shyira, yabashije gushyira mu bikorwa ibigo mbonezamikurire.

 

Comments

Who are you?
Your post
  • To create paragraphs, just leave blank lines.

 
 
Muhanga : Umushoferi afunzwe akurikiranweho guha umupolisi ruswa
Muhanga : Umushoferi afunzwe akurikiranweho guha umupolisi ruswa

Polisi ikorera mu karere ka Muhanga yafashe umushoferi ukurikiranyweho kugerageza guha ruswa y’amafaranga 5000, umupolisi wari mu kazi mu muhanda kubera amakosa yari akoze ku ya 7 Ukuboza 2016. (...)

Huye:Abahabwaga ingoboka barasaba gusubizwa imisanzu batanze ngo bubake igorofa
Huye:Abahabwaga ingoboka barasaba gusubizwa imisanzu batanze ngo bubake igorofa

Abahabwaga inkunga y’ingoboka mu murenge wa Mbazi mu karere ka Huye, barasaba ko amafaranga bagiye bizigamira ngo hazubakwe inzu y’igorofa n’amacumbi yo gukodeshwa bayasubizwa bakayikenuza, kuko ngo (...)

Rubavu: Inzu y’umuryango wa Rubangura yibasiwe n’inkongi y’umuriro
Rubavu: Inzu y’umuryango wa Rubangura yibasiwe n’inkongi y’umuriro

Inzu y’umuryango w’umushoramari nyakwigendera Rubangura iherereye mu kagari k’amahoro, umurenge wa Gisenyi mu karere ka Rubavu yibasiwe n’inkongi y’umuriro yangirikiramo ibintu byinshi mu ijoro (...)

Rusizi:Laboratwari yagombaga gufasha abanyeshuri imaze imyaka 10 yubakwa
Rusizi:Laboratwari yagombaga gufasha abanyeshuri imaze imyaka 10 yubakwa

Ababyeyi barerera mu ishuri ryisumbuye rya Gishoma riri mu murenge wa Rwimbogo, mu karere ka Rusizi, baravuga ko batewe impungenge na Laboratwari abana babo bagombye kuba bakoresha, imaze imyaka (...)

Huye:Abakoreye ibyahoze ari amakomine barishyuza Akarere ka Huye asaga miliyoni 11
Huye:Abakoreye ibyahoze ari amakomine barishyuza Akarere ka Huye asaga miliyoni 11

Abahoze ari abakozi b’ibyahoze ari amakomine yahurijwe mu karere ka Huye, barishyuza aka karere amafaranga asaga miliyoni cumi n’imwe bakoreye mbere yo guhagarikwa ku mirimo bakoraga. Hashize (...)

Advertisement

OPP. MAGERWA, EXPO GROUND, GIKONDO KIGALI, RWANDA PHONE NO : +250-784867952 / 53

© Copyright 2015: Imvaho Nshya. All rights reserved.
Powered by: RPPC.