2017-07-27 11:26:56 clouds 27o High | Kigali Rwanda

Dukurikire:
 
 

Musanze:Urutoki rw’abahoze batuye mu manegeka rwigaruriwe n’abajura

Yanditswe na IMVAHO NSHYA

Kuya 2016-09-07 08:17:58

 
Share on:
 
Yasuwe:3
 
Yavuzweho:200
 
10
 
10

Abaturage bo mu murenge wa Muko mu karere ka Musanze, baratangaza ko nyuma yo gusanga gutura mu manegeka ari ikibazo cyari kibabangamiye ubu bagiye gutura aheza, gusa ngo babangamiwe cyane n’abajura bitwikira ijoro bakajya kwiba ibitoki ku matongo basize.

Aba baturage barasaba ubuyobozi kubafasha hagashyirwaho ingamba zikarishye zo guhashya ubu bujura, kuko ngo urutoki rwabo ruba rwabatwaye imbaraga nyinshi mu kurwitaho.

Ndazigaruye Jean Bosco, umuturage wo mu murenge wa Muko, yabwiye Imvaho Nshya ko ubuyobozi bwabo bwabagiriye inama yo kuva mu manegeka bakabyumva vuba, ariko ngo ikibabangamiye muri iki gihe nuko urutoki basize ku matongo yabo rwibasiwe n’abajura kandi ari rwo rwari rusanzwe rubatunze.

Yagize ati:“Kuba twaragiriwe inama yo kwimuka ahantu hari hatubangamiye kubera amazi yavaga mu mu birunga twabyakiriye neza cyane, kuko ni imwe mu ntambwe ikomeye yo guhangana n’ibiza.

PNG - 1 Mb
Ibitoki byera bisarurwa n’abajura kuko ba nyira byo batuye kure (Foto archive)

Ariko noneho dufite ikibazo cyo kuba hari ibisambo byitwikira ijoro bikaza kutwibira ibitoki twasize ku matongo aho twari dutuye, twumva ko babijyana mu mujyi wa Musanze kubigurishirizayo.

Hari n’abandi bajura bajijisha bakabyiba nyuma bakabishyira mu mazu yabo, nyuma y’umunsi umwe kubera kujijisha akaba ari bwo babijyana mu isoko cyangwa se muri za resitora”.

Akomeza avuga ko muri ibi bitoki bitaribwa (ibivamo imineke), byo ngo babyiba bakabirekera mu mazu yabo kugira ngo bazagurishe imineke.Asaba ubuyobozi gufatira ingamba zikaze aba bajura ngo kuko bagiye kubatera ubukene n’inzara.

Umunyamabanga nshingwabikorwa w’umurenge wa Muko Niyibizi Aloys, yavuze ko amakuru yuko abajura basigaye birara mu rutoki rw’abaturage yabagezeho, ariko akizeza iki kibazo kizakemurwa vuba binyuze mu gukaza amarondo.

Yagize ati :« Ni byo koko ikibazo cy’ubujura bw’ibitoki muri iyi minsi kiravugwa mu murenge wa Muko, ariko nanone hafashwe ingamba zikomeye mu rwego rwo guhashya abajura harimo gukaza amarondo no gutanga amakuru kuri buri wese ushobora kuba akekwaho ubujura bw’ibitoki, yemwe n’ubundi bujura kuko ni kimwe mu bihungabanya umutekano w’abaturage.

Ndasaba kandi na bariya bahinzi kugira uruhare mu gucunga umutekano w’imyaka yabo harimo nyine n’urutoki rwibasiwe muri iyi minsi n’abajura».

Muko ni umwe mu mirenge ikunze kwibasirwa n’ibiza bikomoka mu mazi ava mu birunga mu gihe cy’imvura, aha rero kwimura abaturage ni bumwe mu buryo bwo gukumira impanuka zaturuka kuri iyo myuzure.

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE