Advertisement
 
 
 
 
 
 
 
 

Amakuru | Mu Ntara | Intara

Musanze:Umuryango w’abantu 8 ucumbitse mu biro by’umudugudu urasaba kubakirwa   

  Yanditswe na NGABOYABAHIZI PROTAIS
 July 2016

 
 

Umuturage witwa Karorero Athanase wo mu kagari ka Kigombe, umurenge wa Muhoza mu karere ka Musanze, arasaba inzego zibishinzwe kumufasha kubona aho aba, nyuma y’aho inzu ye ihiye igakongoka kubera inkongi y’umuriro yatewe n’amashanyarazi.

Uyu muturage arasaba ubu bufasha mu gihe ubuyobozi bw’akagari ka Kigombe bumusaba imfunguzo z’ibiro by’umudugudu yari yahawe ngo akingemo umusaya.

Uyu musaza ufite umuryango ugizwe n’abantu 8, avuga ko abayeho nabi nyuma y’uko urugo rwe ruhiye ndetse n’ibyo yasaruye byose bigakongoka.

Mu kiganiro yagiranye n’Imvaho Nshya Karorero yagize ati:“Ndasaba uwari wese ufite uburyo yamfasha kubona inzu yanjye ko yandwanaho, ubu ndi hanze kuko inzu natijwe n’umudugudu wa Nyamuremure ubu noneho Gitifu w’akagari ka Kigombe yohereza abantu ngo mbahe imfunguzo kandi nta handi ho kuba mfite.

JPEG - 85.7 kb
Karorero agendagenda mu itongo ry’inzu yahoze atuyemo (Foto Ngaboyabahizi P)

Rwose kuva inzu yanjye yashya n’ibyo nasaruye singire icyo nkuramo mbayeho nabi, ubu abana banjye kujya kwiga n’ugutira udukweto n’umwambaro w’ishuri”.

Akomeza avuga ko ubuyobozi bumufashije bukamubonera isakaro yareba uko yirwanaho, kuko ngo ubuyobozi bwamubwiye gutanga imfunguzo z’inzu, ubu amaso akaba yaheze mu kirere atekereza uko azabaho.

Nyiramageza Olive, umwe mu baturanyi be yagize ati: “Ubu twarumiwe kuko kuva uyu Karorero inzu ye yashya, duheruka umuyobozi uwo munsi, ubu kugira ngo arye ni uko umuturage amuha ibiryo, ubundi abana bambarana n’abacu iyo bavuye ku ishuri ni uguhinduranya imyenda.

Njye numva abayobozi bareba uburyo bamushakira aho kuba kuko ubwo akagari katangiye kumwaka imfunguzo ubu ntituzi aho azerekera”.

Umunyamabanga nshingwabikorwa w’akagari ka Kigombe Mbonigaba Daniel, yemeza ko koko uyu muturage adafite aho kuba, gusa ngo ubuyobozi bw’aka kagari nabwo bwabuze aho bumwubakira.

Yagize ati:“Ni byo koko Karorero inzu ye yarahiye yose ubu asa n’uri hanze n’umuryango we, ariko icyo twakoze ni ubutabazi bw’ibanze, twabanje kumushakira aho aba, no kumuremera tumuha ibiribwa ku nkunga y’abaturage.

Ariko nanone ubu dufite ikibazo cyo kuba n’aho inzu ye yari iri ari mu manegeka, kuko na kizimyamwoto kumutabara yabuze aho inyura, turi gushaka aho twamubonera ikibanza, kandi twakoze n’ubuvugizi inzego zidukuriye zirabizi”.

Uyu muyobozi ahakana yivuye inyuma ko nta muyobozi n’umwe wagiye kwaka Karorero imfunguzo z’aho acumbitse.

 

Comments

 
 
Bamwe mu bacururiza ku mupaka wa Rusizi I bahawe amezi 2 yo kuba bimutse
Bamwe mu bacururiza ku mupaka wa Rusizi I bahawe amezi 2 yo kuba bimutse

Ubuyobozi bw’akarere ka Rusizi burasaba abagize urugaga rw’abikorera muri aka karere n’abacuruzi bakorera ku mupaka wa Rusizi ya mbere, kwicara hamwe bitarenze amezi 2 bakareba bimwe mu bicuruzwa (...)

Rusizi: Ubuyobozi bwahagurukiye abagabo bamarira umutungo w’urugo mu kabari
Rusizi: Ubuyobozi bwahagurukiye abagabo bamarira umutungo w’urugo mu kabari

Amakimbirane yo mu miryango mu karere ka Rusizi akenshi ashingira ku businzi bukabije bw’umwe mu bagize umuryango, aho hari aho usanga umugabo akorera amafaranga yose aho kuyacyura akayamarira mu (...)

Kirehe:Abaturage biyubakiye ivuriro rya miliyoni 83
Kirehe:Abaturage biyubakiye ivuriro rya miliyoni 83

Abaturage bo mu kagari ka Kiyanzi, umurenge wa Nyamugali, mu karere ka Kirehe bagorwaga no gukora ingendo ndende bajya kwivuza, ubu barishimira ko baruhutse, kuko biyujurije ivuriro ‘Poste de (...)

Ngoma: Amapfa yatije umurindi ubujura
Ngoma: Amapfa yatije umurindi ubujura

SSP Janvier Mutaganda, Umuyobozi wa Polisi y’u Rwanda mu karere ka Ngoma, avuga ko ubujura bwiganjemo ubw’umusaruro w’ibikomoka ku buhinzi n’amatungo, bwagaragaye cyane muri aka karere mu mwaka (...)

Musanze:Abahinzi b’ibigori bahangayikishijwe n’indwara yitwa Cyumya
Musanze:Abahinzi b’ibigori bahangayikishijwe n’indwara yitwa Cyumya

Ikigo cy’igihugu gishinzwe ubuhinzi n’ubworozi, RAB, kirakangurira abahinzi b’ibigori gukoresha imbuto y’indobanure no gusimburanya ibihingwa mu murima hagamijwe kurwanya indwara y’ibigori yitwa (...)

Advertisement

OPP. MAGERWA, EXPO GROUND, GIKONDO KIGALI, RWANDA PHONE NO : +250-784867952 / 53

© Copyright 2015: Imvaho Nshya. All rights reserved.
Powered by: RPPC.