2017-06-25 09:02:18 clouds 27o High | Kigali Rwanda

Dukurikire:
 
 

Musanze: Umukobwa w’imyaka 20 yihangiye umurimo umwinjiriza 250,000 ku kwezi

Yanditswe na IMVAHO NSHYA

Kuya 2017-04-27 06:45:43

 
Share on:
 
Yasuwe:2100
 
Yavuzweho:200
 
10
 
10

Umuhire Catherine, ni umukobwa w’imyaka 20 utuye mu murenge wa Muhoza, mu karere ka Musanze, uvuga ko mu gihe cy’imyaka 2 amaze akora umwuga wo gucura ibyuma bikoreshwa muri feri z’imodoka, ubu yinjiza amafaranga ibihumbi 250 buri kwezi.

Uyu mukobwa ufatwa nk’ikitegererezo mu murenge atuyemo, ahamya ko yatangije amafaranga ibihumbi 22 gusa, none ubu umushinga we waragutse cyane, ku buryo umwinjiriza amafaranga we yita menshi, ndetse inyungu z’uyu mushinga we zikaba zaragutse zikagera no ku bandi, kuko hari abo yahaye akazi.

Mu bukanishi bw’uyu mukobwa, yibanda ku gutunganya ibyuma bita ‘Bande frein’ bituma imodoka ibasha kugabanya umuvuduko uko uyitwaye abishaka ikaba yanahagarara. Abamugana bamutangira ubuhamya ko akora umurimo unoze, bamwe bakemeza ko ari urugero rw’uko guteza imbere ibikorerwa mu Rwanda bishoboka, ibintu bahuza n’uko ngo ibyuma abakorera ubusanzwe babitumizaga mu Bushinwa.

JPEG - 179 kb
Umuhire yemeza ko buri kwezi yinjiza ibihumbi 250 akanahemba abakozi akoresha (Foto Ngaboyabahizi P)

Mu kiganiro yagiranye n’Imvaho Nshya, Umuhire yagize ati “Nkora umwuga wo kubandika Band frein z’imodoka nkoresheje ibyuma bya feri by’izindi modoka bishaje, nkabyongerera ubudahangarwa, zikongera zigakora, muri make icyo gihe nta bwo imodoka iba ibasha gufata feri ariko njye mfata ibyo byuma, nkongera nkabinoza neza imodoka ikabasha gufata feri, nyirayo bikamurinda impanuka kandi ku mafaranga make”.

Uyu mukobwa avuga ko ngo kuva kera akiri muto yakundaga ibintu by’ubukanishi, noneho ngo yumvise n’ubuyobozi buvuga ibijyanye no kwihangira umurimo ndetse no kwihesha agaciro wigira, we ahitamo kwihangira umurimo udakorwa na benshi, kuko ari wo yabonaga wabasha kwinjiza ifaranga ritubutse.

Yagize ati: “Nkirangiza icyiciro rusange cy’amashuri yisumbuye nagiye muri Uganda, niga gucura amaferi y’imodoka nkoresheje ibyuma bishaje. Nabyize amezi 6 gusa, ngarutse mu Rwanda nasanze hari ibikoresho bikenewe maze ntangira gushaka aho nzakura igishoro.

Nta gikoresho na kimwe nari mfite, nta n’amafaranga nari mfite kubera ko nari nkiri muto, icyo nahereyeho rero ni igitecyerezo, nagize igitekerezo cy’uyu mushinga ndagenda mbibwira ababyeyi bampa amafaranga ibihumbi 22, njya kugura udukoresho tw’ibanze muri Uganda.

Kuri ubu ninjiza amafaranga nibura ibihumbi 250 buri kwezi, nyuma yo guhemba abakozi bane bahoraho, aho umwe ahembwa amafaranga ibihumbi 75”.

Muri iyi myaka 2 ishize yihangiye umurimo, uyu mukobwa ahamya ko iterambere agezeho rigaragarira buri wese.

Yagize ati “Ku myaka yanjye ibyo nagezeho ni byinshi, icya mbere nabashije kwigurira ibikoresho bijyanye n’igihe nkoresha mu kazi kanjye, ngura akamashini kagura ibihumbi magana atanu kabandika disc. Ubu mu rugo nahatangije ubworozi bw’inkoko kubera aka kazi; mpafite inkoko 140.

Kugeza ubu mbaze agaciro k’ibyo maze kwigezaho mbikesha aka kazi nsanga katari munsi ya miliyoni 5. Nkorana na banki, nta bwo nsesagura ngo amafaranga nyapfushe ubusa, aya mafaranga ngomba kuyabyaza umusaruro kuko mba nayabonye niyushye akuya”.

Bamwe mu bo yahaye imirimo ndetse n’abagura ibikoresha bya Umuhire, bavuga ko akwiriye kubera abandi bakobwa urugero, bashingiye ku kuba atanga serivise nziza, kandi yarihangiye umurimo, akawuha n’abandi.

Umuhire asaba abakobwa bagenzi be kwirinda ababashuka babashora mu ngeso mbi, cyangwa se nabo bakagera ubwo bazishoramo kubera irari ry’ibintu, ahubwo nabasaba gukura amaboko mu mufuka bagakora.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE