2017-09-21 09:07:12 clouds 27o High | Kigali Rwanda

Dukurikire:
 
 

Musanze:Polisi y’u Rwanda n’iya Uganda zirishimira ko umutekano umeze neza

Yanditswe na IMVAHO NSHYA

Kuya 2017-07-05 12:41:53

 
Share on:
 
Yasuwe:42
 
Yavuzweho:200
 
10
 
10

Inzego nkuru za Polisi y’u Rwanda na Uganda zirishimira ko umutekano wifashe neza hagati y’ibihugu byombi, abayobozi b’izi nzego bakaba bemeza ko bazakomeza kuwuteza imbere.

Ibi babivugiye mu nama yabereye mu karere ka Musanze yari iyobowe n’umuyobozi mukuru wa Polisi y’u Rwanda IGP Emmanuel Gasana, yitabiriwe k’uruhande rwa Uganda n’intumwa za Polisi y’icyo gihugu ziyobowe na AIGP Dr.Fred Yiga.

Ubwo yatangizaga imirimo y’iyi nama, IGP Emmanuel Gasana yavuze ko ari ibisanzwe ko u Rwanda na Uganda bifatanyiriza hamwe mu kurwanya ibyaha byahungabanya umutekano w’abaturage, yishimira ko uyu mutekano umeze neza.

JPEG - 180.1 kb
Abitabiriye inama yahuje Polisi y’u Rwanda n’iya Uganda bafashe ifoto y’urwibutso nyuma y’inama

Nyuma y’iyi nama, ACP Elisha Kabera yaganiriye n’abanyamakuru, agira ati “Iyi nama ihuza Polisi z’ibihugu byacu u Rwanda na Uganda isanzwe iterana inshuro imwe nyuma y’amezi 2.

Muri iyi nama rero twaganiriye ku mutekano, aho twavuze ku byaha byambukiranya imipaka nk’icuruzwa ry’abantu cyane cyane abana b’abakobwa, ubujura bukoresheje ikoranabuhanga, iterabwoba, n’ibindi harimo nko koneshereza imyaka ku baturage bo ku mipaka yombi.”

Yunzemo ati “Gusa muri rusange abaturage b’ibihugu byombi rwose babanye neza k’uburyo iyo havutse akabazo gato nk’ako twavuze ko konesha imyaka abaturage babiganiraho bigakemuka neza kandi mu mahoro”.

AIGP Dr.Fred Yiga wari uyoboye intumwa za Polisi ya Uganda, nawe yagize ati “Nabonye ikintu gikomeye, aho Perezida avuga ko abanyarwanda bagomba kumva ko umutekano ari uburenganzira bwabo, iki kintu cyantangaje cyane, ni ikintu ngiye gutwara iwacu, kandi iyi nama yakivuzeho. Mu byo twaganiriye kandi twarebeye hamwe uko twarushaho kubungabunga umutekano hagati y’abanyarwanda n’abagande, k’uburyo bagirira icyizere inzego z’umutekano”.

Iyi nama yabaye mu gihe abanyarwanda bakora ubucuruzi bwambukiranya umupaka wa Uganda bishimira ko basigaye bakora bisanzuye, kuko umutekano wabo usigaye ari ntamakemwa.

Uzamukunda Anisie, umwe mu bagore bakora ubucuruzi bwambukiranya umupaka, yagize ati “Ubu umutekano w’u Rwanda na Uganda ni mwiza cyane, nkatwe b’abacuruzi rwose usanga tujya kurangura muri Uganda, nta kibazo ko dushobora kwamburwa ibyacu, abagande kandi nabo ni uko mu Rwanda barisanzura kuko hari n’abaza kubaka inzu zaba izo kubamo ndetse n’iz’ubucuruzi.

Ibi bigaragaza ko umutekano rwose abaturiye ibi bihugu tuwizeye 100%, ikindi nuko kuri ubu kwambukira ku indangamuntu byaje bikongera ubuhahirane bw’ibi bihugu aho umuntu yambukira igihe ashakaye, akagaruka nta nkomyi, mu gihe mu myaka yashize no kugira ngo mu Rwanda rwacu uve mu ntara ujye mu yindi byagusabaha urupapuro rw’inzira, ibi kandi nanone kuri njye navuga ko biterwa n’imiyoborere myiza ibi bihugu bifite”.

Aba baturage basaba inzego zishinzwe umutekano mu bihugu byose gukomeza kunoza imikoranire, kugira ngo umutekano ukomeze gusigasirwa, na cyane ko bahamya ko ari wo shingiro ry’iterambere bamaze kugeraho.

NGABOYABAHIZI PROTAIS

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE