Advertisement
 
 
 
 
 
 
 
 

Amakuru | Mu Ntara | Intara

Musanze: Iterambere ry’abatuye i Ruyumbu ridindizwa no kutagira imihanda   

  Yanditswe na NGABOYABAHIZI PROTAIS
 2 months ago

 
 

Bamwe mu baturage bo mu kagari ka Ruyumbu mu murenge wa Nkotsi ho mu karere ka Musanze, baratangaza ko baheze mu bwigunge kubera ko nta mihanda bagira ibahuza n’utundi duce, bakaba basaba ubuyobozi bw’akarere kabo kubafasha kubaka ibikorwa remezo kugira ngo bakomeze kwihuta mu iterambere.

Iki kibazo abaturage bavuga ko kibakomereye ubuyobozi bw’akarere ka Musanze buvuga ko kigiye gushakirwa umuti, kuko bateganya gukora mu ngengo y’imari y’umwaka utaha, hagatangira kubakwa imihanda, maze ubuhahirane bugafungurwa, abaturage bakarushaho kwihutisha iterambere ryabo nta kibakoma mu nkokora.

Ndayisaba Prosper, umuturage wo muri Nkotsi, yabwiye Imvaho Nshya ko bitewe n’inyota bafitiye umuhanda, bagerageje gushyiraho imbaraga zabo, ariko aho bigeze ngo bifuza kunganirwa, kuko uyu muhanda ngo bawitezeho kuzamura ubukungu bwabo bwite ndetse n’ubw’umurenge batuyemo.

Yagize ati “Twagerageje gushyiraho imbaraga zacu dutanga umuganda, turundamo amabuye, dusiba ibi binogo ariko twarananiwe, aho bigeze n’ubuyobozi bw’akarere bwakagombye kuturwanaho, ubu nta gare, nta modoka wabona inyura hano mu buryo bworoshye.

PNG - 818.7 kb
Abaturage bagerageje kwitunganyiriza umuhanda barananirwa, bakeneye kunganirwa (Foto Ngaboyabahizi P)

Imyaka yacu ubu ntitwayigeza ku masoko, abafite imbaraga zikorera ku mitwe baza hano bakaduhenda, rwose turagowe.Ikindi kandi twabibwiye n’abayobozi bacu ariko batera agati mu ryinyo, urabona aya makoro twayavamo dute koko ko hakenewe imashini ihahinga”.

Akomeza avuga ko kandi kuba uyu muhanda wabo atari nyabagendwa bituma n’imbangukiragutabara zitabasha kubagera mu buryo bwo kubatabara, nanone kandi n’abo ngo iyo bahetse umurwayi mu ngobyi bituma bagenda bavunagurika n’umurwayi akagera kwa muganga yarembye, ngo hakaba n’ubwo abagore babyarira mu mayira, abandi bagapfira mu nzira.

Umuyobozi wungirije w’akarere ka Musanze ushinzwe iterambere ry’ubukungu Habyarimana Jean Damascene, avuga ko uyu muhanda utari mu igenamigambi ry’umwaka w’ingengo y’imari turimo ubu, ahubwo ngo washyizwe mu mwaka utaha, bityo abaturage bakaba badakwiye gukomeza kugira impungenge kuko bashonje bahishiwe.

Yagize ati “Mu by’ukuri uyu muhanda ntabwo wari uteganyijwe gukorwa mu ngengo y’imari y’uyu mwaka 2016, ariko twawushyize ku rutonde rw’imihanda bazatunganya mu ngengo y’imari y’umwaka utaha 2017, tukaba rero dusaba abaturage gukomeza kuwitaho mu buryo bushobotse”.

Abaturage bo muri uyu murenge bemeza ko ubwo bazaba bahawe uyu muhanda biteguye kuwubyaza umusaruro, bakagura ibikorwa by’iterambere ryabo ku giti cyabo ndetse n’iry’igihugu muri rusange.

 

Comments

pre-moderation

This forum is moderated before publication: your contribution will only appear after being validated by an administrator.

Who are you?
Your post
  • To create paragraphs, just leave blank lines.

 
 
Muhanga : Umushoferi afunzwe akurikiranweho guha umupolisi ruswa
Muhanga : Umushoferi afunzwe akurikiranweho guha umupolisi ruswa

Polisi ikorera mu karere ka Muhanga yafashe umushoferi ukurikiranyweho kugerageza guha ruswa y’amafaranga 5000, umupolisi wari mu kazi mu muhanda kubera amakosa yari akoze ku ya 7 Ukuboza 2016. (...)

Huye:Abahabwaga ingoboka barasaba gusubizwa imisanzu batanze ngo bubake igorofa
Huye:Abahabwaga ingoboka barasaba gusubizwa imisanzu batanze ngo bubake igorofa

Abahabwaga inkunga y’ingoboka mu murenge wa Mbazi mu karere ka Huye, barasaba ko amafaranga bagiye bizigamira ngo hazubakwe inzu y’igorofa n’amacumbi yo gukodeshwa bayasubizwa bakayikenuza, kuko ngo (...)

Rubavu: Inzu y’umuryango wa Rubangura yibasiwe n’inkongi y’umuriro
Rubavu: Inzu y’umuryango wa Rubangura yibasiwe n’inkongi y’umuriro

Inzu y’umuryango w’umushoramari nyakwigendera Rubangura iherereye mu kagari k’amahoro, umurenge wa Gisenyi mu karere ka Rubavu yibasiwe n’inkongi y’umuriro yangirikiramo ibintu byinshi mu ijoro (...)

Rusizi:Laboratwari yagombaga gufasha abanyeshuri imaze imyaka 10 yubakwa
Rusizi:Laboratwari yagombaga gufasha abanyeshuri imaze imyaka 10 yubakwa

Ababyeyi barerera mu ishuri ryisumbuye rya Gishoma riri mu murenge wa Rwimbogo, mu karere ka Rusizi, baravuga ko batewe impungenge na Laboratwari abana babo bagombye kuba bakoresha, imaze imyaka (...)

Huye:Abakoreye ibyahoze ari amakomine barishyuza Akarere ka Huye asaga miliyoni 11
Huye:Abakoreye ibyahoze ari amakomine barishyuza Akarere ka Huye asaga miliyoni 11

Abahoze ari abakozi b’ibyahoze ari amakomine yahurijwe mu karere ka Huye, barishyuza aka karere amafaranga asaga miliyoni cumi n’imwe bakoreye mbere yo guhagarikwa ku mirimo bakoraga. Hashize (...)

Advertisement

OPP. MAGERWA, EXPO GROUND, GIKONDO KIGALI, RWANDA PHONE NO : +250-784867952 / 53

© Copyright 2015: Imvaho Nshya. All rights reserved.
Powered by: RPPC.