2017-06-22 17:42:31 clouds 27o High | Kigali Rwanda

Dukurikire:
 
 

Musanze: Babuze amashanyarazi babura n’ingurane z’ibyabo

Yanditswe na IMVAHO NSHYA

Kuya 2016-05-04 13:32:35

 
Share on:
 
Yasuwe:7
 
Yavuzweho:200
 
10
 
10

Bamwe mu baturage bo mu murenge wa Gashaki mu karere ka Musanze, baratangaza ko ikigo gishinzwe gukwirakwiza ingufu z’amashanyarazi REG, cyabangirije imyaka ndetse kibatwara n’ubutaka mu gihe cyashyiragaho umuyoboro w’amashanyarazi, none imyaka ikaba ibaye itatu nta ngurane kibahaye.

Habyarimana Ladislas, umukuru w’umudugudu wa Mbwe, akagari ka Ngambi mu murenge wa Gashaki yagizeati:“Twe abaturage bo muri Gashaki aho uyu muyoboro wanyuze twarumiwe, kuko twabuze amashanyarazi, tubura n’ingurane z’ibyacu.

Ibi kandi kuri njye byansubije inyuma mu iterambere kuko ishyamba ryanjye batemye n’iryo natangagaho ingwate muri SACCO bakampa umwenda, ikindi cyatubabaje ni ukubona n’ibiti by’amapoto byari bisaziye k’umuhanda baragiye kubihisha mu gihe Perezida yari mu ruzinduko rw’uturere twa Gakenke na Rubavu.

REG niduhe umuriro cyangwa se itwishyure ibyangijwe, cyangwa se ivane ariya mapoto mu mirima yacu kuko ntituzabona uburyo duhinga, kandi nta n’ubwatisha bazatwishyura”.

Kugeza ubu aba baturage bagera kuri 60 bavuga ko bangirijwe ibyabo ngo babangamiwe no kuba batagira umuriro, nyamara bari bigeragereje gushinga amapoto yabo bwite n’insinga bazishyizeho, REG ikaza ikazirandura ivuga ko igiye kubazanira amashanyarazi afite ingufu.

Umuyobozi wa REG mu karere ka Musanze, Ing Nzamurambaho Marcel, yagize ati:“Ubu ikirimo gukorwa ni ugushinga amapoto manini y’ahazanyura umuyoboro munini, kugira ngo tubone n’uko dushyiraho transfo…, andi mapoto bavuga ko yatwawe yo yagiye kubaka ahandi ntabwo ari ukuvuga ko batakibonye umuriro”.

Akomeza avuga ko uyu mushinga uzarangirana n’ukwezi kwa Nzeri 2016.Ku birebana n’ingurane z’ibyangijwe ngo bagiye gukora urutonde habarurwe ibyabo mu gihe kitarenze icyumweru kimwe.

Iki gikorwa cyo kwegereza abaturage amashanyarazi kizakorerwa mu mirenge igera kuri 5, ari yo Gacaca, Muhoza, Rwaza, Cyabingo na Kivuruga.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE