2017-08-22 09:34:31 clouds 27o High | Kigali Rwanda

Dukurikire:
 
 

Musanze:Abarokotse Jenoside batarasanirwa inzu bijejwe ko zizasanwa vuba

Yanditswe na IMVAHO NSHYA

Kuya 2017-04-08 13:12:52

 
Share on:
 
Yasuwe:270
 
Yavuzweho:200
 
10
 
10

Ubuyobozi bw’akarere ka Musanze buravuga ko bufite gahunda yo gusana inzu z’abarokotse Jenoside batuye mu murenge wa Cyuve, akagari ka Bukinanyana mu mudugudu wa Bwiza, kuko bagaragaza ko zashaje cyane.

Ubuyobozi bw’aka karere bugaragaza ko bwabanje gusana icyiciro cya mbere cy’inzu z’aba baturage, bukizeza ko igikorwa cyo kubasanira kizakomeza, buri wese ufite ikibazo kigakemuka.

Nyirasafari Sawiya umwe mu barokotse Jenoside yakorewe abatutsi utuye muri uyu mudugudu wa Bwiza, yagaragaje ko izi nzu babamo zishaje cyane, bakaba basaba ubuyobozi kubagoboka zigasanwa, kuko bo nta bushobozi bwo kuzisanira bafite.

Yagize ati “Aya mazu dutuyemo yubatswe mu 1998 na FARG, ariko kuri ubu rero tubangamiwe no kuba tunyagirwa kubera ko amabati yacu yamaze gusaza cyane, iyo imvura iguye ni ukubyuka na we urabona ko amaze kuba ubuyungiro.

JPEG - 154.6 kb
Imwe mu nzu z’abarokotse Jenoside zikeneye gusanwa (Foto Ngaboyabahizi P)

Umwaka ushize baraje bavugurura amwe mu mazu, andi na n’ubu ntagikorwa kandi nta n’ikizere, ikindi rero kibabaje ni uko hasanwe amazu yo kubamo ariko ibikoni na byo kuri ubu ni ugutekera hanze, ndasaba rwose ko abatarasanirwa batekerezwaho kuko iyi mvura yo muri Mata na Gicurasi izadusiga hanze”.

Umuyobozi w’akarere ka Musanze wungirije ushinzwe imibereho myiza y’abaturage Uwamariya Marie Claire, avuga ko ikibazo cy’aba baturage bakizi, ndetse bakaba bateganya gusana izi nzu zisigaye bafatanyije n’ingabo z’igihugu muri gahunda izwi nka Army Week.

Yagize ati “Ni byo koko amazu ya bariya banyarwanda barokotse Jenoside yakorewe abatutsi mu 1994 bo mu mudugudu wa Bwiza bamwe bafite ikibazo cy’uko amazu babamo hari afite amabati ashaje koko, yemwe n’inkuta ubona ari ikibazo kuko usanga urwondo rugenda ruvaho, twabanje rero gusanira bamwe icyiciro cya mbere, aho inzu imwe yasanishwaga agera kuri miliyoni 1, ahasigaye rero ubu tugiye gufatanya n’ingabo, mu cyumweru kizwi ku izina rya Army Week, kandi ahatazarangira na bwo uko ubushobozi bugenda buboneka tuzabasanira”.

Uyu mudugudu wa Bwiza utuwe n’abarokotse Jenoside yakorewe abatutsi baturutse ahantu hatandukanye mu gihugu, hakaba hatuye imiryango irenga 30.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE