2017-08-20 07:43:19 clouds 27o High | Kigali Rwanda

Dukurikire:
 
 

Musanze:Abahinzi b’ibigori bahangayikishijwe n’indwara yitwa Cyumya

Yanditswe na IMVAHO NSHYA

Kuya 2017-03-26 10:24:16

 
Share on:
 
Yasuwe:923
 
Yavuzweho:200
 
10
 
10

Ikigo cy’igihugu gishinzwe ubuhinzi n’ubworozi, RAB, kirakangurira abahinzi b’ibigori gukoresha imbuto y’indobanure no gusimburanya ibihingwa mu murima hagamijwe kurwanya indwara y’ibigori yitwa kirabiranya cyangwa Cyumya.

Bamwe mu bahinzi bo mu murenge wa Musanze, bavuga ko badasobanukirwa neza zimwe mu ndwara zifata imyaka yabo ariko cyane ibigori. Ibi babitangaje mu gikorwa ubu kiri gukorwa na RAB mu turere twa Nyabihu na Musanze ku buhinzi bw’ibigori, mu rwego rwo guteguza abahinzi igihembwe cy’ihinga 2017 A.

Mutesi Joyeuse wo mu murenge wa Muko muri Musanze, yagize ati “Buriya umuhinzi kubera kudasobanukirwa n’indwara z’imyaka bimutera igihombo, njyewe iyo mbonye ibigori byanjye bitangiye kuma kandi bitaraheka, numva ko ari ikibazo k’ikigori kimwe, nkabifata nk’ibintu bisanzwe, nkakirandura ariko simenye ko aba ari uburwayi bw’imyaka buba bwibasiye ubutaka.

JPEG - 467.7 kb
Ibigori byagezemo uburwayi ntibyera neza (Foto archive)

Ubu rero ubwo tumaze guhabwa amasomo ku birebana n’ubu burwayi bwa Cyumya cyangwa se Kirabiranya, ndishimira ko ubuyobozi bwitaye k’umuhinzi”.

Uyu muhinzi akomeza avuga ko ngo nanone igituma iyi ndwara ikomeza kwibasira imirima y’ibigori muri Musanze, ngo ari uko kugeza ubu ikibazo cy’imbuto y’indobanure ku bigori ari ingorabahizi, hakaba ubwo ibonetse, ubundi ikaza imburagihe ubundi ngo ikaza itujuje ubuziranenge.

Aha rero ngo akaba ari ho ahera asaba inzego zibishinzwe kubashakira imbuto y’ibigori iberanye n’ubutaka bwabo kandi ku gihe.

Umushakashatsi ku gihingwa cy’ibigori muri RAB Dr Ngaboyisonga Claver,yagize ati:“Abahinzi ni ngombwa ko bagira umuco mwiza wo guhinga imbuto y’indobanure y’ibigori, kandi bakamenya gusimburanya imyaka mu mirima yabo, kuko ni bumwe mu buryo bwo kuruhura ubutaka, nkaba rwose nakwizeza abahinzi ko ubu igihembwe cy’ihinga 2017A cyateguwe neza imbuto ikaba izabagereraho ku gihe, gusa nkaba nabashishikariza guhinga bagamije gukira atari bya bindi bya buke ndamuke, bakabigira umwuga koko”.

Iyi ndwara ya Cyumya cyangwa se Kirabiranya, yagaragaye bwa mbere mu gihugu cya Kenya mu mwaka wa 2012, igaragara mu Rwanda mu mwaka wa 2013, ikaba imaze gukwira mu bihugu byo muri Afurika y’Uburasirazuba, ikaba iterwa na Virusi ikwirakwizwa n’inyoni ndetse n’umuyaga.Kugeza ubu umuti wayo ukaba utaraboneka uretse kurandura ibigori byafashwe.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE