2017-05-23 06:21:20 clouds 27o High | Kigali Rwanda

Dukurikire:
 
 

Musanze: Abagore bitwa “Inkazi” bakubita abagabo babo bakabagira intere

Yanditswe na IMVAHO NSHYA

Kuya 2016-09-30 08:17:19

 
Share on:
 
Yasuwe:114
 
Yavuzweho:200
 
10
 
10

Bamwe mu bagabo bo mu murenge wa Gataraga, Akarere ka Musanze bavuga ko bakubitwa n’abagore babo, kuri ubu bazwi kw’izina ry’ “Inkazi z’abagore”, ibi ngo biterwa na bamwe mu bagore batumva neza icyo uburinganire bisobanura.

Umwe mu bagabo wo mu murenge wa Gataraga, akagari ka Murago yagize ati: “Ubu rwose hano muri uyu murenge hari bamwe mu bagabo batakivuga, bemeye kuba inganzwa, bahondagurwa n’abagore bakicecekera, none se urumva nk’ubu umugore yamara kukujwibura ugahangara muri bagenzi bawe ukavuga ngo umugore yagukubise? Uryumaho da ! Ibi byose rero biterwa na bamwe mu bagore bumva ko uburinganire ari uguhangana n’uwo mwashakannye”.

Akomeza avuga ko ihohoterwa rikorerewa abagabo risa n’iryihishe ngo kuko abagabo bagira ipfunwe ryo kuvuga ko bahondagurwa, cyangwa se bimwa uburenganzira mu byabo, ngo hakaba na bimwa ibiryo.

Yagize ati: “ Ubu uko nkeka ko bamwe mu bagabo bahisemo kujya birarira mu byumba byabo aho kugira ngo bicane n’abo bashakanye, ikindi kandi nirinda kuba nakwirukana umugore kuko ntabwo abana nabashobora ngahitamo gutuza, abagore bakeneye amahugurwa”.

Mukandayisenga Yvonne yagize ati: “Bamwe mu bagabo kuri ubu bahisemo kujya bagira inshoreke ahandi hakure ari na ho bajya kumarira imitungo y’umuryango, binjira abandi bagore mu ngo zabo, aha rero ntawabyihanganira iyo ubonye inzara yakwicira abana murahangana da! Kuko nta kundi byagenda, ariko na none ubu abagore b’inkazi ntawabura kuvuga ko babaho, na bo bakaba bakeneye kwegerwa bagahindura imyumvire, bakareka gukubita abagabo babo”.

Umuyobozi w’Akarere ka Musanze Musabyimana Jean Claude, yavuze ko batangiye ubukangurambaga, bigisha abo bagore kubana mu bwumvikane.

Yagize ati: “ Ni byo koko birashoboka ko bamwe mu bagabo bahohoterwa n’abo bashakanye, ariko na none icyo dukora ni ubukangurambaga ku bijyanye n’amategeko agenga umuryango, dusaba abashakanye kudahohotera bagenzi babo, kuko nta mugore ugomba gukubitwa nta n’umugabo ugomba gukubitwa n’uwo bashakanye”.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE