2017-08-20 07:43:19 clouds 27o High | Kigali Rwanda

Dukurikire:
 
 

Muhanga: Habineza yijeje abaturage impinduka zigamije iterambere

Yanditswe na IMVAHO NSHYA

Kuya 2017-07-23 08:59:40

 
Share on:
 
Yasuwe:67
 
Yavuzweho:200
 
10
 
10

Umukandida w’ishyaka riharanira Demokarasi no kurengera ibidukikije (Democratic Green Party of Rwanda) Dr Frank Habineza, yabwiye abaturage bo mu karere ka Muhanga ko nibamutora azakora ibishoboka byose akazana impinduka zigamije kubateza imbere.

Habineza yabwiye abaturage b’i Muhanga ko nibamuhundagazaho amajwi akaba Perezida azagabanya imisoro ndetse imwe akayikuraho, mu rwego rwo korohereza abaturage.

Yagize ati “Ndabizeza ko nimutora Frank azabakuriraho n’imisoro imwe n’imwe mwatangaga, ngabanye n’umusoro ku nyongeragaciro kuko amafaranga mutanga ari menshi cyane ugereranyije n’ayo mwagombye gusora.»

Nyuma yo kugabanya imisoro, uyu mukandida yavuze ko azazamura umushahara wa mwarimu ku rugero rwiza, ndetse n’uw’abakora mu nzego z’umutekano bakarushaho kwiteza imbere, ariko ntiyagaragaje aho amafaranga azabongerera ku mishahara azava.

JPEG - 70.4 kb
Dr Frank Habineza yijeje abaturage ko azabateza imbere nibamutora

Mu byo yagarutseho kandi harimo ikibazo cy’ireme ry’uburezi avuga ko ridahagaze neza mu mashuri, akaba yaragaragaje ko azashyira imbaraga mu kurizamura, by’umwihariko agateza imbere indimi z’igifaransa n’icyongereza ahamya ko ubusanzwe hari n’abarimu bazigisha batazizi.

Mu buhinzi yavuze ko azaha ubwisanzure abaturage bagahinga igihingwa bifuza, kuko ngo ari bo baba basobanukiwe neza igihingwa cyera mu mirima yabo.

Icyakora bamwe mu baturage bari baje kumva imigabo n’imigambi y’uyu mukandida, bagaragaje ko hari bimwe mu byo yavuze azakora bo babona bidashoboka, cyangwa byanashoboka bikazagira ingaruka ku gihugu.

Kimwe n’ahandi hatandukanye Habineza yagiye yiyamamariza, abaturage b’i Muhanga na bo bagaragaje ko bafite impungenge ko mu gihe uyu mukandida yatorwa agakuraho imisoro byagira ingaruka zikomeye ku bukungu bw’igihugu, dore ko ubusanzwe imisoro igira uruhare rw’ibanze mu guteza imbere igihugu.

Nyuma ya Muhanga, Dr Frank Habineza yakomereje ibikorwa bye byo kwiyamamaza mu karere ka Gisagara na Ruhango.

MUHIZI ELISÉE

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE