2017-05-29 16:30:20 clouds 27o High | Kigali Rwanda

Dukurikire:
 
 

Muhanga: Batangiye gukoresha umuhanda Perezida Kagame yabemereye

Yanditswe na IMVAHO NSHYA

Kuya 2016-05-14 11:55:34

 
Share on:
 
Yasuwe:0
 
Yavuzweho:200
 
10
 
10

Mu ruzinduko Perezida wa Repubulika Paul Kagame yakoreye mu murenge wa Kiyumba mu karere ka Muhanga, abaturage batuye muri aka gace bamugaragarije ko babangamiwe bikomeye n’umuhanda mubi ubahuza n’umujyi wa Muhanga, abemerera umuhanda mwiza uzajya ubafasha kwihuta, none mu gihe gito imirimo yo kuwubaka yararangiye, uba nyabagendwa.

Uyu muhanda Perezida wa Repubulika Paul Kagame yawemereye abaturage ubwo yasuraga abatuye mu mirenge ya Kiyumba, Nyabinoni, Kibangu ndetse na Rongi, mu mwaka wa 2014.

Mu bibazo abaturage bamushyikirije harimo n’ikibazo cyo kuba barakoraga urugendo rurerure bajya kugurisha ibicuruzwa byabo mu mujyi wa Muhanga, ariko amafaranga y’urugendo batangaga akaba menshi ndetse n’igihe bakoresha kikaba cyari kinini, bitewe n’umuhanda mubi.

Semanzi Léonidas, wo mu mudugudu wa Muyebe, akagari ka Ruhango umurenge wa Rongi, avuga ko umwanya bakoreshaga bajya kurangura cyangwa se mu bindi bikorwa wari munini cyane, aho wasanga birizaga umunsi wose bakagera mu rugo n’ijoro kandi nta kazi bakoze.

JPEG - 172.1 kb
Uyu muhanda abaturage bemeza ko bari bawukeneye cyane (Foto Muhizi E)

Icyakora kuri ubu ngo basigaye bakoresha amasaha make bajya kurangura i Muhanga, akaba ashimira Umukuru w’igihugu wabakuye mu bwigunge.

Manirafasha Moses, umukozi mu karere ka Muhanga ushinzwe imihanda, avuga ko mbere abaturage bo mu mirenge ya Nyabinoni na Rongi bakoraga ibirometero hafi 50 bavuye ku muhanda wa Kaburimbo ahitwa Rugendabari, akavuga ko abanyura muri uyu muhanda basigaye bakoresha gusa ibirometero mirongo itatu na bine kandi mu muhanda mwiza.

Uwamariya Béatrice, umuyobozi w’akarere ka Muhanga, avuga ko uretse n’abaturage bakoreshaga urugendo runini baza mu mujyi wa Muhanga, n’abayobozi bitaboroheraga kujyayo no kuvayo, kuko bakoreshaga amasaha 8 kugenda no kugaruka, hakaba nubwo mu gihe cy’imvura nyinshi byagiraga abakozi bakoreye muri iyi mirenge y’icyaro, bakananirwa kugaruka.

Yagize ati:«Turizera ko umuhanda niwuzura neza bigiye korohera abaturage n’abandi batinyaga gukora urugendo rurerure bajya muri aka gace.»

Imirimo yo kubaka umuhanda Mbugangari Mpimbi yatangiye mu kwezi kw’Ukwakira mu mwaka ushize wa 2015, ukaba uzatahwa ku mugaragaro muri Nyakanga uyu mwaka.

Ubuyobozi bw’aka karere bwemeza ko uyu muhanda uzuzura neza utwaye amafaranga miliyari ebyeri z’amafaranga y’u Rwanda.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE