2017-06-24 09:49:51 clouds 27o High | Kigali Rwanda

Dukurikire:
 
 

Muhanga: Abaturage bagiye kwiyubakira inzu y’amateka ya Jenoside

Yanditswe na IMVAHO NSHYA

Kuya 2017-05-31 08:12:07

 
Share on:
 
Yasuwe:47
 
Yavuzweho:200
 
10
 
10

Nyuma y’uko abaturage bo mu Murenge wa Nyarusange bakusanyije inkunga yo kubaka urwibutso rwa Jenoside yakorewe abatutsi mu 1994, kuri ubu bavuga ko bagiye no kubaka indi nyubako yagenewe kubika amateka ya Jenoside.

Abaturage bo mu Murenge wa Nyarusange, Mushishiro, Muhanga na Cyeza mu Karere ka Muhanga n’umurenge wa Mwendo mu Karere ka Ruhango, bavuga ko urwibutso rwa Jenoside rushyinguyemo imibiri y’ababo rudahagije kugira ngo rubashe gusigasira amateka arebana n’ubwicanyi bwakorewe abatutsi mu myaka itandukanye, ndetse n’aya Jenoside yakorewe abatutsi mu Rwanda muri rusange.

Nyirabakiga Suzane wo mu Mudugudu wa Gihara, Akagari ka Nyagisozi, avuga ko yiciwe abana batatu mu gihe cya Jenoside yakorewe abatutsi mu 1994, akaba ahamya ko iyi nzu y’amateka ya Jenoside izabafasha kubika aya mateka.

JPEG - 310.9 kb
Imirimo yo kubaka inzu y’amateka ya Jenoside i Nyarusange igeze ku gipimo cya 75%

Uyu mubyeyi akavuga ko hari ubuhamya bwinshi yagiye atanga burebana n’ayo mateka ndetse akaba azi n’abandi benshi bagomba kuzabazwa mu gihe iyi nzu izaba yuzuye, ubwo buhamya bwabo bwose bukabikwa.

Umuyobozi w’Akarere ka Muhanga Uwamariya Béatrice, avuga ko kubaka inzu y’amateka bakoresheje imisanzu y’abaturage bizoroha kubera ko ubushake bwabo ari bwo bwatumye urwibutso rwa Jenoside rwa Nyarusange rubasha kuzura nta nkunga ihambaye basabye ahandi, uretse iyavuye ku rwego rw’Akarere ka Muhanga.

Yagize ati «Imirimo yo kubaka urwibutso n’inzu y’amateka byatangiye nkiri Umunyamabanga Nshingwabikorwa w’umurenge wa Nyarusange ndetse na Mushishiro nzi neza ko amafaranga asigaye abaturage bazayishakamo kuko bafite ubushake bwo kubungabunga ibimenyetso bya Jenoside.»

Kabayiza Salongo, Perezida wa Komite ishinzwe gusigasira amateka ya Jenoside, avuga ko hari ibyo babatangiye kwegeranya, birimo urutonde rw’abazize Jenoside, gusa akavuga ko ikibahangiyikishije ari ukumenya abaroshywe mu ruzi rwa Nyabarongo kuko nta mubare nyawo bazi.

Ati:«Impamvu nyamukuru twifuza kubaka inzu y’amateka ya Jenoside, ni uko abiciwe muri ibi bice muri rusange no mu Murenge wa Nyarusange by’umwihariko ari benshi, ku buryo abaza kwibuka n’abandi bifuza kumenya uko Jenoside yakorewe abatutsi mu Rwanda yakozwe aha hantu babimenya.»

Imyenda, amazina y’abishwe, na bimwe mu bikoresho abicanyi bifashishije bimaze kugezwa muri uru rwibutso kandi harimo amafoto y’abatutsi bazize Jenoside, ibi bikaba ari bimwe mu bimenyetso bazaheraho bashyira muri iyi nzu y’amateka.

Iyi nzu y’amateka biteganyijwe ko izatwara miliyoni cumi n’eshanu (15) z’amafaranga y’u Rwanda kugira ngo yuzure.

MUHIZI ELISÉE

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE