2017-07-23 11:30:24 clouds 27o High | Kigali Rwanda

Dukurikire:
 
 

Minisitiri w’Intebe arasaba abahinzi gukoresha amazi atarigira ahandi

Yanditswe na IMVAHO NSHYA

Kuya 2017-06-25 09:01:47

 
Share on:
 
Yasuwe:134
 
Yavuzweho:200
 
10
 
10

Minisitiri w’Intebe, Anastase Murekezi, arasaba abaturage gushyira imbaraga mu guhinga ndetse no gukoresha amazi bafite mu kuvomerera imyaka cyane cyane muri iki gihe cy’izuba mbere y’uko atemba ajya mu bindi bihugu.

Ibi Minisitiri w’Intebe yabitangaje ubwo yifatanyaga n’abaturage bo mu murenge wa Mukura, mu karere ka Huye mu muganda wo gutangira guhinga imboga mu gishanga cya Mpaza kizahingwaho imboga ku buso bwa hegitari 50.

Murekezi yasabye abahinzi gushyira imbaraga mu gukora, bashyira umurimo imbere cyane, abahinga bagahinga hose kandi babyaza umusaruro amahirwe igihugu gifite yo kuba hari amazi menshi hirya no hino mu bishanga.

Yagize ati “Ibyo dukora byose, uko duhinga kugira ngo twongere umusaruro, ni na ko tugomba gukora ibishoboka byose tukuhira imyaka cyane cyane nko muri iki gihe cy’izuba kandi dufite amahirwe ko igihugu cyacu gifite ibishanga bifite amazi kandi menshi.

Dukoreshe ayo mazi dufite tuyabyaze umusaruro tubone kuyasangira n’abandi, nta mpamvu n’imwe yatuma tuyareka akagenda nta cyo tuyakoresheje ngo aho agiye bayabyaze umusaruro yaraturutse iwacu, twe dusigare dufite inzara.”

JPEG - 379.4 kb
Minisitiri w’Intebe Murekezi Anastase yifatanyije n’abaturage bo mu karere ka Huye mu muganda wo guhinga imboga mu gishanga cya Mpaza (Umutoni B)

Minisitiri w’Intebe Murekezi kandi akomeza akangurira abaturage cyane cyane abibumbiye mu makoperative kugana ibigo by’imari mu gukoresha n’andi mahirwe Leta yatanze mu kubafasha kuhira, aho bahabwa imashini zibafasha kuhira imyaka Leta ikabishyurira 50%.

Yagize ati “Abafite amakoperative nimwegere ibigo by’imari mwake inguzanyo, Leta yatanze amahirwe yo kubafasha kubona imashini zuhira ikabishyurira 50%, na yo muyabyaze umusaruro, kuko biroroshye kwishyura amafaranga make make, kuruta guterurira amenshi icya rimwe utanayafite ako kanya biragorana.”

Yibukije abaturage kurangwa no gukora kandi bakorana umurava kuko umurimo ari wo utunga umuntu kandi ukanaba indangagaciro y’Abanyarwanda.

Igishanga cya Mpaza cyatewemo imboga gifite ubuso bugera kuri hegitari 50, zose zizahingwamo imboga muri iki gihe cy’izuba zikazasimburana n’ibigori bizahingwamo mu gihembwe cy’ihinga gitaha.

UMUTONI BEATHA

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE