2017-11-23 18:23:19 clouds 27o High | Kigali Rwanda

Dukurikire:
 
 

Minisitiri Dr. Malimba yasabye abanyeshuri guca ingengabitekerezo ya Jenoside muri bagenzi babo

Yanditswe na IMVAHO NSHYA

Kuya 2017-04-12 06:48:42

 
Share on:
 
Yasuwe:357
 
Yavuzweho:200
 
10
 
10

Minisitiri w’Uburezi Dr. Malimba Papias Musafiri yibukije urubyiruko rukiri ku ntebe y’ishuri ko rugomba guhangana n’abafite ingengabitekerezo ya Jenoside kuko hari abibwira ko bagifite inyungu mu guhembera amacakubiri.

Yabisabye urubyiruko rw’abanyeshuri tariki ya 10 Mata 2017 ubwo ku rwego rwa Kaminuza y’u Rwanda, Ishami rya Nyarugenge, mu ishuri ry’ubuvuzi n’amasomo y’ubuzima (CMHS) abanyeshuri bibukaga Abatutsi basaga ibihumbi icumi baguye mu nzira ziva kuri Kiliziya y’Umuryango Mutagatifu (Sainte Famille) zigaca ahahoze Perezidansi ya Repubulika no mu mujyi ahahoze Radio Rwanda.

JPEG - 54.9 kb
Abanyeshuri bageze imbere y’ahahoze ibiro bikuru bya Radio Rwanda bafashe umunota wo kwibuka inzirakarengane zazize Jenoside yakorewe Abatutsi mu 1994 (Foto Samuel M)

Minisitiri Malimba yabwiye abo banyeshuri ko batagomba kwibwira ko guhangana n’abagifite ingengabitekerezo ya Jenoside byoroshye, abasaba kwibuka ko no mu banyeshuri hakirimo bagenzi babo bake bayifite.

Ati “Ubushakashatsi bukomeza gukorwa n’abantu batandukanye, buracyatwereka ko hakirimo ibyo bintu bigaragaza ingengabitekerezo mu mashuri. Icyo ni ikibazo gikomeye, kubera ko mu mashuri ni ho hakabaye igicumbi cyo kwigisha kurandura iyo ngengabitekerezo ya Jenoside ndetse hakavamo n’imbaraga nyinshi igihugu cyakifashisha no kujya kurandura iyo ngengabitekerezo mu yindi miryango iri hanze y’uburezi.”

Igiteye impungenge, nk’uko Minisitiri Musafiri yakomeje abivuga, ngo ni uko umubare munini muri abo bafite iyo ngengabitekerezo ya Jenoside ari abavutse nyuma ya Jenoside.

Ati “Iyo usubiye inyuma ukabona abo bantu batabaye muri Jenoside cyangwa se bayibayemo ariko ari ibitambambuga, ubona ari bo bagaragaramo abake bafite iyo myumvire. Ibyo bintu bitera inkeke kuko biba bigaragaza ko hakiri uwo murongo uhuza abarimo hagati n’abakuze, kandi uwo murongo ukomeza gushyiramo imbaraga kugira ngo barenge ku bashya n’ab’urubyiruko ruzaza. Uwo murongo ubahuza udakuweho 100% ushobora no kuzagera mu myaka 100 tukibonamo abo bantu bagifite iyo ngengabitekerezo ya Jenoside.”

Perezida w’Umuryango GAERG ku rwego rw’igihugu, Olivier Kamarade yabwiye abo banyeshuri ko kuba babona amahoro, umutekano, abantu bahamagarwa bakitabira n’ibindi hari urubyiruko rwatanze ikiguzi ku hazaza uyu munsi u Rwanda rufite bityo nabo bagomba kugira ibyo bigomwa bagateganyiriza abazabakurikira.

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE