2017-06-28 08:00:46 clouds 27o High | Kigali Rwanda

Dukurikire:
 
 

Min. Kaboneka yibukije ko akazi k’abashinzwe ubuhinzi n’ubworozi kadakorerwa mu biro

Yanditswe na IMVAHO NSHYA

Kuya 2017-05-18 07:51:53

 
Share on:
 
Yasuwe:421
 
Yavuzweho:200
 
10
 
10

Minisitiri w’Ubutegetsi bw’Igihugu Kaboneka Francis, mu kiganiro aherutse kugirana n’abayobozi bose bo mu ntara y’Uburasirazuba, yasabye abashinzwe ubuhinzi n’ubworozi kumanuka bakegera abahinzi n’aborozi, aho guhora mu biro.

Minisitiri Kaboneka yibukije aba bayobozi ko ubuhinzi bufatiye runini ubuzima bw’abaturage bose, ari na yo mpamvu bukwiye gushyirwamo imbaraga nyinshi, buri wese akabigiramo uruhare atabihariye Minisiteri y’Ubuhinzi n’Ubworozi gusa.

Yagize ati “Ubuhinzi tuburekeye Minisiteri y’Ubuhinzi n’Ubworozi cyangwa Minisiteri ikaburekera inzego z’ibanze, nta kintu dushobora gukora. Twese dukwiye gufatanya kandi tukumva ko ari inshingano zacu.

Hari ikindi kintu cyavuzwe, iyo turebye ba Agoronome bari ku mirenge, nta murenge utamufite, mureke tubwizanye ukuri, bakora iki? Mwe mubabyaza uwuhe musaruro, wa wundi wo ku karere afasha iki Meya?

JPEG - 175.4 kb
Minisitiri w’ubutegetsi bw’igihugu Francis Kaboneka (Foto Manishimwe N)

Njyanama mwari mwahamagaza abagoronome ngo mubicaze bababwire gahunda y’ubuhinzi n’icyo mwakora? Gahunda y’ubworozi imeze ite muri aka karere? Mwicare nka Njyanama mumubaze uko gahunda zimeze mushyireho na gahunda yo kubikurikirana kugira ngo muhamye ko ibyo yababwiye abikora koko?”

Minisitiri Kaboneka yakomeje avuga ko akazi ka agoronome na veterineri kadakorerwa mu biro, yagize ati “Agoronome ntakwiye kuba mu biro, veterineri ntakwiye kuba mu biro, akwiye kuba ari mu mirima, veterineri nabwe akwiye kuba ari mu nzuri mu matungo.”

Uyu muyobozi kandi yagarutse ku mibare bamwe mu bagoronome batanga ipfuye cyangwa ihimbwe, ibyo bakunze kwita gutekinika, aho hari bamwe bakwa raporo bagahamagara ba Gitifu b’utugari ngo babahe imibare, bakabaha ipfuye nyamara ari bo bari bakwiye gutanga imibare nyayo mu gihe baba bakorera mu baturage.

Abahinzi n’aborozi bemeza ko bakeneye cyane ko abashinzwe ubuhinzi n’ubworozi babegera, ndetse bagahorana nabo kuko ngo bimaze kugaragara ko aho veterineri n’agoronome bagiye bakorera cyane hagaragara impinduka cyane ku myumvire y’abaturage haba mu guhinga neza batavangavanga imyaka no guhuza ubutaka no gukoresha ifumbire mvaruganda.

Naho aho veterineri yageze usanga boroye neza kandi bakorora amatungo atanga umusaruro mwinshi utuma banabona ifumbire nyinshi y’imborera.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE