Advertisement
 
 
 
 
 
 
 
 

Amakuru | Mu Ntara | Intara

Meya wa Ngoma asanga REG irangarana abaturage basonzeye amashanyarazi   

  Yanditswe na MANISHMWE NOËL
 June 2016

 
 

Umuyobozi w’akarere ka Ngoma asanga mu gihe abaturage bagaragaje ubushake bwo kwegerezwa amashanyarazi, ndetse bagahuriza hamwe ubushobozi bafite, nta mpamvu ikwiye gutuma ikigo gikwirakwiza amashanyarazi (REG) kitayabageza mu buryo bwihuse.

Mu mpera z’ukwezi kwa Gicurasi 2016, nibwo abaturage bo mu mudugudu wa Nyakariba, akagari ka Rukoma, umurenge wa Sake bagaragarije abasenateri, umuyobozi w’intara y’Uburasirazuba n’ubuyobozi bw’akarere ko bababajwe nuko bakusanyije amafaranga agera kuri 2,800,000 ngo begerezwe amashanyarazi, nyuma bakayasubizwa babwirwa ko ari make cyane.

Avuga mu izina ry’abaturage bari begeranyije aya amafaranga, Ndibwirende Théogène, yagize ati:“Twishyize hamwe duteranya amafaranga ageze kuri miliyoni 2 n’ibihumbi 800, nyuma twaje kubabara tubonye bayatugaruje batubwira ngo birahenze, ubuyobozi butaranahereye no kuri ayo nibura koko ngo budutere inkunga ariko umuriro utugereho.

Baratubwiye ngo kugira ngo amashanyarazi atugereho nuko ngo haboneka miliyoni 39, ariko icyatubabaje niba bayadushubije, ariko n’ubu mutugaragarije kudufasha twayabona.”

Ubuyobozi bw’umurenge wa Sake bugaragaza ko ikibazo abatuye Nyakariba bahuye nacyo ari uko inyingo zakozwe zagaragaje ko kugira ngo begerezwe amashanyarazi hagomba kuboneka Transifo bafatiraho, byose hamwe bigatwara agera kuri miliyoni 35, bagacika intege.

Umuyobozi w’akarere ka Ngoma Nambaje Aphrodise, avuga ko ikibazo cy’abaturage bakusanya amafaranga ngo begerezwe amashanyarazi bakarangaranwa kimaze imyaka igera kuri 5 cyumvikana.

JPEG - 237.9 kb
Meya w’akarere ka Ngoma Nambaje Aphrodise, avuga ko Devi zihanitse REG ikora zica intege abaturage (Foto Manishimwe N)

Avuga ko akarere kamaze iminsi kakivugana n’ubuyobozi bwa REG haba ku rwego rw’akarere no ku rwego rw’igihugu, kuko ngo hakiri uduce twinshi n’imirenge myinshi itarayabona.

Meya Nambaje agaragaza ko inyingo zikorwa n’amafaranga bisaba REG igaragariza abaturage ngo zibatera ubwoba.

Yagize ati:“Hari inshingano za REG, wenda ntabwo izajya gushyira amashanyarazi ku nzu ya buri muturage ariko hari ibyangombwa igomba kugeza mu mudugudu kugira ngo abaturage babone aho bafatira.

Kimwe ni iyo Transifo ariko hari n’izo poto zituma abaturage babona aho bahera, ni cyo twe dusaba REG, hari abo baherutse gusubiza ngo nimugende ngo ibyo nta n’ubwo bizashoboka bo muri Mugesera, ibisubizo nk’ibyo bica intege abaturage, mureke duhe abaturage ibikorwa remezo by’ibanze, kwishyirira amashanyarazi mu nzu nabo babyishakire ariko ntabwo ari abaturage bazishyura Transifo.”

Niyonkuru Bénoit, umuyobozi w’ikigo gikwirakwiza amashanyarazi ishami rya Ngoma, avuga ko ibisabwa kugira ngo abaturage bishyize hamwe bahabwe amashanyarazi, habanza gukorwa inyingo n’ibikoresho bisabwa kandi n’akarere ngo kagiramo uruhare.

Yagize ati :“Hari ahantu haba hasabwa ko Devi yakozwe koko bisaba ibikoresho byinshi n’ahaba bakenewe Transifo, inzira binyuzwamo ni uko aho hantu hose ubuyobozi bw’umurenge bwandikira akarere, nako kakandikikira ikigo cya REG gasaba amashanyarazi, bikanyura mu mushinga wa ERP.

Ahantu hose hatari amashanyarazi, akarere kagirana amasezerano n’ikigo gishinzwe kuyakwirakwiza REG bikanyura muri uwo mushinga, umwaka ku wundi, bakareba aho bahera batanga amashanyarazi.Iyo bandikiye REG bampa kopi ariko iy’iki kibazo cya hano ntabwo nigeze mbona kopi ivuye ku karere.”

Nyuma y’uko abatuye Sake bakusanyije amafaranga hafi miliyoni 3 ngo begerezwe amashanyarazi nyuma bakayasubizwa, bagaragarije iki kibazo umuyobozi w’intara y’Uburasirazuba Uwamariya Odette, asaba umuyobozi w’ikigo gikwirakwiza amashanyarazi ishami rya Ngoma kugikurikirana, kigakemuka vuba.

 

Comments

 
 
Kirehe:Abaturage biyubakiye ivuriro rya miliyoni 83
Kirehe:Abaturage biyubakiye ivuriro rya miliyoni 83

Abaturage bo mu kagari ka Kiyanzi, umurenge wa Nyamugali, mu karere ka Kirehe bagorwaga no gukora ingendo ndende bajya kwivuza, ubu barishimira ko baruhutse, kuko biyujurije ivuriro ‘Poste de (...)

Ngoma: Amapfa yatije umurindi ubujura
Ngoma: Amapfa yatije umurindi ubujura

SSP Janvier Mutaganda, Umuyobozi wa Polisi y’u Rwanda mu karere ka Ngoma, avuga ko ubujura bwiganjemo ubw’umusaruro w’ibikomoka ku buhinzi n’amatungo, bwagaragaye cyane muri aka karere mu mwaka (...)

Musanze:Abahinzi b’ibigori bahangayikishijwe n’indwara yitwa Cyumya
Musanze:Abahinzi b’ibigori bahangayikishijwe n’indwara yitwa Cyumya

Ikigo cy’igihugu gishinzwe ubuhinzi n’ubworozi, RAB, kirakangurira abahinzi b’ibigori gukoresha imbuto y’indobanure no gusimburanya ibihingwa mu murima hagamijwe kurwanya indwara y’ibigori yitwa (...)

Hamuritswe igishushanyombonera cy’umujyi wa Bugarama
Hamuritswe igishushanyombonera cy’umujyi wa Bugarama

Mu gihe kiri imbere igice kinini cy’umurenge wa Bugarama kigiye kuba umujyi wunganira umujyi wa Rusizi, igishushanyombonera cyawo kikaba cyaramurukiwe abatekinisiye b’akarere n’ubuyobozi bw’uyu (...)

Rusizi:Abaturage bafashe ingamba zo kwicungira umutekano
Rusizi:Abaturage bafashe ingamba zo kwicungira umutekano

Nyuma y’aho mu rukerera rwo ku wa 12 uku kwezi abantu bataramenyekana bateye mu kagari ka Ryankana mu murenge wa Bugarama bakaharasira abaturage 3 babiri bagahita bahasiga ubuzima, abaturage b’uyu (...)

Advertisement

OPP. MAGERWA, EXPO GROUND, GIKONDO KIGALI, RWANDA PHONE NO : +250-784867952 / 53

© Copyright 2015: Imvaho Nshya. All rights reserved.
Powered by: RPPC.