2017-11-23 18:23:19 clouds 27o High | Kigali Rwanda

Dukurikire:
 
 

Kirehe:Yaretse gucuruza urumogi, ahinga urutoki rumwijiriza Frw 1,200,000 ku mwaka

Yanditswe na IMVAHO NSHYA

Kuya 2017-07-02 10:21:24

 
Share on:
 
Yasuwe:72
 
Yavuzweho:200
 
10
 
10

Nsengimana Damien utuye mu mudugudu wa Gasarabwayi, mu murenge wa Musaza, mu karere ka Kirehe, avuga ko yamaze imyaka 5 acuruza ikiyobyabwenge cy’urumogi, nyuma yo kugororwa no kubireka, agahitamo gukora ubuhinzi bw’urutoki bumwinjiriza amafaranga y’u Rwanda ibihumbi 100 buri kwezi, ku buryo ku mwaka yinjiza amafaranga miliyoni n’ibihumbi 200.

Mu buhamya Nsengimana yatanze ubwo hatangizwaga ubukangurambaga bwo kurwanya ibiyobyabwenge mu murenge wa Gahara, mu karere ka Kirehe, yagaragaje ko ibiyobyabwenge nta kamaro kabyo, ahamagarira abaturage bose kubyirinda.

Nsengimana Damien avuga ko yacuruje ikiyobyabwenge cy’urumogi kuva mu mwaka wa 2000, kugeza mu mwaka wa 2005. Avuga ko muri icyo gihe cy’imyaka 5 yamaze nta nyungu yabonyemo uretse gufungwa mu gihe cy’umwaka umwe, yafungurwa agasanga abo mu muryango we barakennye cyane.

Yagize ati “Nafatanywe ibiro 20 by’urumogi nari naguze n’abarukuye muri Tanzania. Nafunzwe umwaka wose, ariko nakuyemo ibihombo gusa. Ibiyobyabwenge ni ibintu bibi, umuntu ubigenderamo nta bwenge atunga. Nta muntu n’umwe nigeze mbona waguze imodoka ayikuye mu rumogi, njye icyo niboneye ni uko amafaranga yo mu rumogi ataramba, nta cyo amara.”

JPEG - 168.8 kb
Nsengimana Damien asigaye yinjiza amafaranga 1,200,000 buri mwaka abikesha ubuhinzi bw’urutoki

Nyuma y’umwaka yamaze muri gereza, Nsengimana yarafunguwe atangira gushaka amafaranga mu nzira nziza, binyuze mu buhinzi nk’uko abisobanura.

Agira ati “Narafunguwe nsaga umuryango wanjye, ababyeyi, abana n’umugore, barakennye kuko bari bararushye bangemurira. Nahise niha ingamba zo gukora nshiye mu nzira nziza. Nagujije amafaranga ibihumbi 100 inshuti yanjye, irayampa, ndagenda mpinga isambu neza ibigori neza imifuka 15.”

Nyuma yo kugerageza ubuhinzi, bwaje kumuhira ku buryo ubuhinzi bw’urutoki akora kugeza magingo aya bumwinjiriza amafaranga y’u Rwanda ibihumbi 100 ku kwezi.

Ati “Namaze kumwishyura wa mwenda, mpita nkomeza mpinga ibishyimbo, byeze imifuka 10 ndayigurisha, amafaranga ndayabitsa, ubwo ntangira gukorana n’ibigo by’imari. Bangurije amafaranga miliyoni, ndaza isambu yanjye nyihingamo urutoki, rurera ku buryo ubu isambu yanjye ku ku kwezi kumwe, impa amafaranga y’u Rwanda ibihumbi 100, ku buryo iyo umwaka urangiye nibarira inyungu ya miliyoni imwe n’ibihumbi 200.”

Nsengimana Damien waretse gucuruza ikiyobyabwenge cy’urumogi, none ubu urutoki ahinga rukaba rumwijiriza Frw 1,200,000 ku mwaka, ahamya ko ubu yongeye kwiyubaka abana be, abahungu 2 n’abakobwa 2 bakaba barabashije kwiga, kandi akaba abanye neza n’abaturanyi be.

MANISHIMWE NOËL

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE