2017-05-23 06:21:20 clouds 27o High | Kigali Rwanda

Dukurikire:
 
 

Kirehe: Igishushanyo mbonera cy’umujyi cyakanze abaturage

Yanditswe na IMVAHO NSHYA

Kuya 2016-07-26 07:17:37

 
Share on:
 
Yasuwe:31
 
Yavuzweho:200
 
10
 
10

Abaturage bo mu mirenge ya Kirehe na Kigina ikora ku mujyi wa Nyakarambi, bavuga ko batewe impungenge no gutegekwa kubaka inzu bita ko zirenze ubushobozi bwabo, bakibaza niba abafite ubushobozi buke batemerewe gutura mu gice cy’umujyi bikababera urujijo.

Bamwe mu batuye mu mujyi wa Nyakarambi bagaragaza ko ari ho bavukiye, bahatuye ndetse bakaba bahafite amasambu, abandi bakahagira ibibanza, gusa ngo muri iyi minsi bafite ikibazo cy’uko basabwa kubaka hakurikijwe igishushanyo mbonera cy’umujyi, aho ngo inzu nibura iciriritse igomba kuba ifite agaciro ka miliyoni 9 z’amafaranga y’u Rwanda.

Muri gahunda yo kunoza imiturire, akarere ka Kirehe kamaze gukora igishushanyo mbonera cy’umujyi wa Nyakarambi, ufatwa nk’umurwa mukuru wako. Biteganyijwe ko igice cy’umujyi kigaragazwa n’igishushanyo mbonera kiri ku buso bungana na hegitari 500.

PNG - 691.6 kb
Nyakarambi ifatwa nk’umurwa mukuru w’akarere ka Kirehe (Foto Munishimwe N)

Nyamurinda Xavier, atuye mu mudugudu wa Rugero, akagari ka Nyabikokora, mu murenge wa Kirehe ni umwe mu bibaza uko abakene batuye mu gice cy’umujyi bazabyitwaramo.

Yagize ati:“Turabyumva na leta iba idushakira ibintu byiza, ariko rwose biragoye, biratugora cyane, ukaba ufite ikibanza kuri gakondo iwacu ariko ntube wakubaka kandi igihe cyo kubaka kigeze.

Nonese ubwo uzaguma mu nzu ya so na nyoko imyaka 40 igusangemo? ahantu hose bahagize mu mujyi, nonese abakene barimo bazajya he? baratubwiye ngo byibura inzu ya make bashakamo ni iya miliyoni 9, iciriritse, njyewe nubwo ntuye ariko mfite ubwoba ko ejo bundi bazaza kuyisenya.”

Muzungu Gerard, Umuyobozi w’akarere ka Kirehe, yatangarije Imvaho Nshya ko abadafite ubushobozi buhagije bwo kubaka inzu hakurikijwe igishushanyo mbonera bagirwa inama yo kwimukira mu nkengero z’umujyi, bakubaka inzu zijyanye n’ubushobozi bafite.

Ati“Udafite ubushobozi, afite ikibanza, dufite ahandi hagenewe umuntu ufite ubushobozi buke, niba hari ushobora kuvuga ko ashaka kubaka rukarakara, hirya ya za hegitari 500 ushobora kujyayo ukubaka, cyane ko n’igishushanyo mbonera cy’umujyi cyamaze kugaragara, bizongerera agaciro k’ubutaka.

Ashobora kugurisha, aba afite amahirwe ko yakuramo amafaranga menshi yagura ikibanza hariya, akubakamo inzu, akagura n’isambu kubera ko haba hadahenze nk’ahari igishushanyo mbonera.”

Meya Muzungu kandi akomeza avuga nk’ubuyobozi baretse abaturage bakubaka inzu zitazaramba, no mu buryo butemewe byaba ari ukudindiza iterambere kandi ngo bigira n’ingaruka ku buturage, mu gihe ari inshingano z’ubuyobozi kureba ibifite akamaro abaturage.

Ubuyobozi bw’akarere ka Kirehe buributsa abaturage ko yaba mu gice cy’umujyi no mu byaro ugiye kubaka asabwa gukurikiza amategeko y’imiturire, kandi uwubaka akagomba kuba afite icyangombwa kibimwemerera,

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE