2017-11-23 07:32:46 clouds 27o High | Kigali Rwanda

Dukurikire:
 
 

Kirehe:Abahinzi baributswa kwitegura guhangana n’ibyonnyi nka Nkongwa

Yanditswe na IMVAHO NSHYA

Kuya 2017-08-19 07:07:57

 
Share on:
 
Yasuwe:53
 
Yavuzweho:200
 
10
 
10

Nsengiyumva Jean Damascène, Umuyobozi w’akarere ka Kirehe wungirije ushinzwe iterambere ry’ubukungu, arahamagarira abahinzi gutangira kwitegura guhangana n’ibyonnyi nka Nkongwa, n’izindi ndwara zishobora kwaduka, zikibasira ibihingwa.
Ni ubutumwa atanga mu gihe abahinzi bari kwitegura igihembwe cy’ihinga cya 2018A, biteganyijwe ko kizatangira mu kwezi gutaha kwa Nzeri 2017.

JPEG - 376 kb
Nsengiyumva Jean Damascène, Visi Meya ushinzwe iterambere ry’ubukungu,mu karere ka kirehe

Kuba mu gihembwe cy’ihinga cya 2017B ibihingwa birimo ibigori n’amasaka byaribasiwe na Nkongwa idasanzwe, ndetse hakaba n’aho n’ibishyimbo byarwaye udusimba, ni ho ubuyobozi bushingira bukangurira abaturage gukaza ingamba zo kurwanya ibyonnyi.

Visi Meya Nsengiyumva avuga ko mu kurwanya icyonnyi cya Nkongwa cyari kibasiye ibigori mu gihembwe cy’ihinga gishize, habayeho ubufatanye bukomeye bwa Leta y’u Rwanda n’ingabo z’u Rwanda, ndetse n’abahinzi bafashwa kubona imiti yo kwica Nkongwa ku buntu.

Avuga kandi ko kuyirwanya byatwaye imbaraga nyinshi kuko yaje nk’icyorezo gitunguranye, kubera iyo mpamvu akaba ahamagarira abahinzi bari kwitegura igihembwe cy’ihinga cya 2018A, gutegura n’uburyo buhamye bwo guhangana n’ibyonnyi bishobora kwadukira ibihingwa byabo.

Yagize ati “Ubu harageze ko abahinzi batekereza ku buryo bwo kurwanya ibyonnyi, barabibonye ko ubushize twahuye n’ikibazo cya Nkongwa idasanzwe, nta bwo dukwiye kwirara. Ubushize abahinzi bahawe umuti ku buntu, ariko nta bwo iby’ubuntu bizahoraho.”

Arakomeza yibutsa abahinzi ko uko bategura imirima, bakwiye no gutegura amafaranga yo kugura imiti yo kurwanya ibyonnyi ndetse n’ibikoresho byifashishwa nk’amapombo.

Ati “Mu byo abahinzi bakora byose, uko beza umusaruro, uko bagurisha; bateganye n’amafaranga yo kugura imiti yo kurwanya biriya byonnyi, ndetse n’amapombo.Ubwo twarwanyaga Nkongwa habaye ikibazo cy’amapombo, ariko umuhinzi akwiye gutegura imbuto, ifumbire, agahinga, akabagara, ariko agomba no gushyiramo uburyo bwo kurwanya ibyonnyi.”

Ubwo harwanywaga Nkongwa mu bigori byari bihinze mu cyanya cyuhirwa mu murenge wa Nasho mu gihembwe cy’ihinga gishize cya 2017B, hari bamwe mu bahinzi bagaragarije ubuyobozi ko kuba iki cyonnyi cyabatunguye; ari byo byatumye bagorwa no kukirwanya.

Icyakora bagaragazaga ko bafite ubushake bwo kwigurira ibikoresho birimo amapombo, kugira ngo uburyo bwo gutera umuti bwihute.

Hakizimana Martin yagize ati “Urebye uburyo Nkongwa yaje ari icyorezo mu bigori, bikagira ingaruka no ku musaruro, ubu nta we utazi agaciro ko kugira ipombo ariko ikibazo gishobora kuvuka ni ubushobozi bwo kubigura, nta bwo ari ko abantu bose baba banganya ubushobozi.”

Ubuyobozi bw’akarere ka Kirehe buvuga ko buzakomeza gushishikariza abaturage gukora ubuhinzi mu buryo bw’umwuga, ku buryo umuhinzi ahinga yujuje ibintu byose bisabwa, birimo guhingira kare, guhinga imbuto nziza, gukurikirana igihingwa, no kugira uburyo bwo kukirinda indwara, ku buryo umuhinzi aba afite icyizere ko ibihe bigenze neza yagira umusaruro uhagije.

MANISHIMWE NOËL

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE