2017-06-28 08:00:46 clouds 27o High | Kigali Rwanda

Dukurikire:
 
 

Kirehe:Abagore b’i Gahara biyemeje gucika ku muco wo kunywera mu tubari

Yanditswe na IMVAHO NSHYA

Kuya 2017-06-11 11:21:57

 
Share on:
 
Yasuwe:62
 
Yavuzweho:200
 
10
 
10

Abagore bo mu murenge wa Gahara, mu karere ka Kirehe bemeranyije n’ubuyobozi bw’akarere ko nta mugore ukwiye kujya mu kabari ngo anywe inzoga asinde, kuko byambura umugore icyubahiro, bikadindiza iterambere, ndetse hakaba n’aho bitera amakimbirane mu miryango.

Ubuhamya bwa bamwe mu bagore bo mu murenge wa Gahara, bwerekana ko isura y’imyitwarire y’abagore bo muri aka gace ku kijyanye no kujya mu tubari no kunywa bagasinda, atari nziza.

Bahuriza ku kuba hari abagore bamwe bajya mu tubari, bakanywa, bakagereka akaguru ku kandi, ndetse hakaba n’abataha nijoro basinze.

Zimwe mu ngaruka kujya mu tubari ku bagore bigira, bagaragazamo kwitesha agaciro kw’abagore, amakimbirane mu miryango, gusezagura umutungo ndetse n’umubyeyi ntabashe kwita ku bana n’umuryango uko bikwiye.

JPEG - 375.4 kb
Abagore b’i Gahara bemeza ko bigayitse kubona umugore yasindiye mu kabari (Foto Manishimwe N)

Niyonsenga Marie Chantal utuye mu kagari ka Murehe, umurenge wa Gahara, Yagize ati “Abagore b’inaha bakunda akabari, bakajyamo bakageza na saa mbiri na saa tatu z’ijoro bakicayemo ukabona ko hatarimo kwihesha agaciro.

Kandi bigira ingaruka kuko iyo mwajyane n’umugabo mugasinda mugenda murwana inzira zose, no mu rugo.Hari n’abo usanga umugore n’umugabo babyukira mu kabari, bakoreye amafaranga bakayamarirayo ba bana babo bakabasiga mu rugo…bidindiza iterambere.”

Mukamwiza Christine we avuga ko hari abagore abona bajya mu tubari, gusa ngo biba bibangamye cyane.Ati “Akabari singashyigikiye, hari abagore njya mbona bajya mu kabari, ariko ubona ko bibangamye pe.Kujya mu kabari ntabwo bikwiye rwose ku muntu w’umugore, aba akwiye kureba gahunda z’urugo, akamenya uko abana bari burye, uko barakaraba.”

Zirikwirembo Perpetua na we avuga umuco w’abagore bajya mu tubari kunywa inzoga ukwiye gucika.

Ati “Bikwiye gucika kuko mbona abagore b’inaha bajya kunywa inzoga mu tubari bagata agaciro ndetse bamwe bakifata nabi.Hari n’abagore bata abagabo babo, bakajya kunywa, bagataha igihe bashakiye.”

Mukandarikanguye Gérardine, Umuyobozi w’akarere ka Kirehe wungirije ushinzwe imibereho myiza y’abaturage avuga ko nta mugore ukwiye kujya mu tubari, kandi na bamwe mu bagore batujyamo bavuga ko ngo ari uburinganire, ngo sibyo, ahubwo bashobora kuba barumvise nabi uburinganire.

Ati “Nta mugore w’i Gahara dushaka mu kabari, abantu bacuruza utubari babimenye.Abantu bafataga kujya mu kabari ku mugore, bakabyitiranya n’uburinganire, baratubeshyera.Si no kuvuga ngo bajye bava mu kabari hakiri kare, Oya! nta mugore dushaka mu kabari.”

Visi Meya Mukandarikanguye avuga ko kubuza abagore kujya mu kabari bitababuza kugura no kunywa inzoga, ariko ngo bakwiye kubikora mu buryo bwo kwiyubaha.

Ati “Ntabwo tugiye kubuza abanywa agahiye kukanywa, ariko jya ugenda ugure agacupa, utahe , ukanywere mu rugo. Urajya kugereka ukuguru ku kundi, mu kabari, urahiganywa na nde? Iyu mwanzuro twawufatiye mu nteko y’abagore, kandi abagore bazabirengaho bagakomeza kujya bajya mu tubari bazajya bafatwa banengwe na bagenzi babo, abatazajya bikosora bahanwe.”

Uyu muyobozi w’akarere ka Kirehe wungirije ushinzwe imibereho myiza y’abaturage avuga ko kuba abagore bamwe birirwa mu tubari bigira ingaruka nyinshi zirimo guteshuka ku nshingano zimwe zo kuba mutima w’urugo, no kutarera abana neza uko bikwiye, cyane ko ngo umubyeyi watwawe n’inzoga aba atanga urugero rubi no ku rubyaro rwe.

MANISHIMWE NOËL

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE