2017-06-25 13:58:23 clouds 27o High | Kigali Rwanda

Dukurikire:
 
 

Kiliziya Gatolika yahagaritse serivise zo kuboneza urubyaro mu mavuriro yayo

Yanditswe na IMVAHO NSHYA

Kuya 2016-08-29 12:39:34

 
Share on:
 
Yasuwe:8
 
Yavuzweho:200
 
10
 
10

Diyosezi Gatolika ya Butare yafashe icyemezo cyo guhagarika gutanga serivisi zo kuboneza urubyaro hifashishijwe uburyo butari ubwa kamere mu bitaro n’ibigo nderabuzima byayo.

Ubuyobozi bw’akarere ka Gisagara, kamwe mu turimo ibitaro bya kiliziya, bwemeza ko abakozi batangaga serivisi zo kuboneza urubyaro ubu bahawe amabwiriza yo kudasubirayo.

Ibaruwa nimero 53/Let.Off./16 yo ku itariki ya 30 Gicurasi 2016, ishyizweho umukono n’umushumba wa Diyosezi gatorika ya Butare, Filipo Rukamba, niyo ikubiyemo amabwiriza yo guhagarika gutanga servisi zo kuboneza urubyaro hifashishijwe uburyo butari ubwa kamere, mu mavuriro ya Kiliziya gatorika mu karere ka Gisagara.

JPEG - 53.9 kb
Musenyeri wa diyosezi ya Butare, Philippe Rukamba

Uburyo butari ubwa kamere butemerwa na kiliziya gatolika ni ubw’ibinini, inshinge, udukingirizo no kwifungisha haba ku bagabo cyangwa abagore.

Kiliziya yemerera umugore n’umugabo kuboneza urubyaro bakoresheje uburyo bwo kubara iminsi umugore atari mu burumbuke akaba ari yo bakoreraho imibonano mpuzabitsina.

Muri iyo baruwa hagaragaramo ko iki cyemezo gifashwe hagendewe ku myanzuro y’inama y’abepisikopi gatorika mu Rwanda yo kuwa 29.11. 2010 ndetse n’amasezerano hagati ya Diyosezi ya Butare na Ministeri y’ubuzima, yo kuwa 29.11.2012.

Ayo masezerano agira ati:«Minisiteri yiyemeje kubahiriza uburenganzira burebana n’amadini, kubahiriza umuhamagaro wihariye wa buri nyiri ikigo mu gihe ubu burenganzira budahungabanya ubuzima bw’abaturage. »

Muri aya mabwiriza, ibigo nderabuzima bya kiliziya gatorika n’ibitaro byayo bya Gakoma, biherereye muri aka karere ka Gisagara, bisabwa kutongera kohereza umukozi kuri poste de sante gutanga imiti n’ibikoresho bigenewe kuboneza urubyaro.

JPEG - 202.2 kb
Ibaruwa Diyosezi ya Butare yandikiye kimwe mu bigo nderabuzima byo mu karere ka Gisagara (Foto Umutoni B)

N’ubusanzwe, izi servisi ntizatangirwaga kuri aya mavuriro, ariko hakoherezwa umukozi uzitangira kuri poste de sante aya mavuriro akoreramo, ibi na byo nyuma y’iyi baruwa bikaba byarahise bihagarara, bivuze ko kuri izi poste de sante ziri mu duce aya mavuriro akoreramo, nabo bahise babura izi serivisi.

Gasengayire Clemence, umuyobozi wungirije w’akarere ka Gisagara ushinzwe imibereho myiza, avuga ko nyuma yo kubona iyi baruwa ya Diyosezi ya Butare nabo bahise babandikira indi ibasaba kubaha amezi atatu yo kwitegura, ariko iyi baruwa ikaba itarasubizwa.

Ibi ngo byatumye bahita bashaka ubundi buryo bwo kuba bifashishije nko gufata umukozi usanzwe ukorera mu kigo nderabuzi cya Leta.

Gasengayire avuga ko n’ubwo hagati aho hashatswe iki gisubizo cy’umukozi ujya gutanga izi serivisi avuye ku kigo nderabuzima cya Leta mu wundi murenge, ariko bivunanye ku buryo bisaba ubwitange budasanzwe.

Gusa ngo nk’akarere mu gushaka umuti urambye banandikiye ,Ministeri y’ubuzima.

Yagize ati :"Twandikiye Minisiteri y’ubuzima kuko n’ubu buryo twabaye twifashishije buravunanye ku mukozi uba uri bujye gutanga iyo serivisi, dutegereje rero ko tuzahabwa umuganga wihariye kuri iki kibazo."

Akarere ka Gisagara gafite ibigo nderabuzima 14. Muri byo umunani byose kabifatanyije na kiliziya gatorika.Ku bitaro bibiri, Gakoma na Kibirizi, ibitaro bya Gakoma nabyo kiliziya gatorika ibifatanyije na Leta.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE