2017-07-23 11:30:24 clouds 27o High | Kigali Rwanda

Dukurikire:
 
 

Kayonza:Umukecuru w’imyaka 83 ukorera mu gakiriro arakangurira urubyiruko kwitabira imyuga

Yanditswe na IMVAHO NSHYA

Kuya 2017-07-16 12:13:29

 
Share on:
 
Yasuwe:98
 
Yavuzweho:200
 
10
 
10

Nyirabiseruka Rachel, umukecuru w’imyaka 83 ukorera mu gakiriro ka Kayonza, arakebura bamwe mu rubyiruko binemfaguza imwe mu mirimo bavuga ko ari mibi cyangwa ivunanye, abibutsa ko umurimo ubasha gutunga umuntu ntaw’ukwiye kuwita mubi.

Mu kiganiro yagiranye n’Imvaho Nshya, Nyiraseruka yagaragaje ko abanyarwanda bakwiye kurushaho kuzamura imyumvire mu bijyanye no kwitabira imyuga,kuko umuntu uzi umwuga adashobora kubura ikimutunga cyangwa ngo ahere mu bushomeri nk’uko bijya bigenda ku rundi rubyiruko.

Yagize ati “Dukora ibyo bambara bimeze nk’imiringa ya kera abanyarwanda bakundaga kwambara nk’imitako, dukora ibikapu ibi byose tubikora mu bisigazwa by’ibigori, mu bitoki, ibi kuri njye ni imari ntabwo nabireka kandi kubibona ntibigoranye.

JPEG - 244.9 kb
Nyirabiseruka Rachel w’imyaka 83 yigisha urubyiruko ibijyanye no kuboha mu gakiriro ka Kayonza

Nsetswa cyane na rwa rubyiruko rwirirwa ruvuga ngo rwabuze akazi, ubwo se ahubwo n’utakora nk’ibi dukora akadushakira ibi bikoresho ntiyaba abonye akazi? Nanjye nari nzi kuboha gusa ariko abana twirirwana banyeretse ko twaboha dushingiye ku byo dufite hafi kandi bikaba byiza zane nkuko twakoresha ibindi”.

Nyirabiseruka Rachel atanga ingero zifatika z’uburyo ibyo bakora bibaha amafaranga, bakabasha kwibeshaho bikemurira bimwe mu bibazo bahura nabyo mu buzima bwabo bwa buri munsi.

Yagize ati “Ibi bikapu hari ibyo tugurisha amafaranga ibihumbi 10, ibihumbi 15 n’ibihumbi 20 kandi abantu barabigura baranabikunda, abadakora ari bato bafite imbaraga ni ubugoryi kuko iyo umuntu afite imbaraga arazikoresha agakora imirimo nyine agakoramo ikintu nk’icyo, ariko abatumva nk’abo bamwe baba abajura abandi bakaba abasinzi b’ibimogi ugasanga nicyo kibatunga.

Ubu twe dufite ishyirahamwe kandi ntabwo duheeza, buri gihe numva kuri radiyo ko amashyirahamwe aba ahantu hose, babuze iki ngo bishyire hamwe bakore ko imirimo ihari? Nibakure amaboko mu mifuka bakore kuko na kera na kare byahozeho ko abantu bagomba gukora, naho abigira ba maringaringa ubwo baba bashaka kurya batavunitse kandi ibyo iherezo ryabyo ni mu buroko.”

Uyu mukecuru yemeza ko mu gihe agifite imbaraga azakomeza gufasha urubyiruko kwihangira imirimo akoresheje ubwenge afite, kugira ngo urubyiruko rwikuremo ko rudakoreye abandi rutabaho.

HAKIZIMANA YUSSUF

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE