2017-07-27 14:29:24 clouds 27o High | Kigali Rwanda

Dukurikire:
 
 

Kayonza:Abaturage barashinja umu-Dasso ubutekamutwe

Yanditswe na IMVAHO NSHYA

Kuya 2016-07-13 13:47:51

 
Share on:
 
Yasuwe:14
 
Yavuzweho:200
 
10
 
10

Bamwe mu baturage bo mu murenge wa Murundi mu karere ka Kayonza, bemeza ko bahaye amafaranga umu Dasso wari waje kubareba ababwira ko ayo mafaranga agiye kuyabazaniramo amazi, nyuma yo kuyamuha akagenda ubutagaruka.

Abaturage bafite iki kibazo ni abatuye mu kagari ka Buhabwa mu murenge wa Murundi, bemeza ko hari umu Dasso waje abafatirana n’ikibazo cy’amazi bafite, abaka amafaranga ababwira ko agiye kuyabazanira none bakaba batarayabona nk’uko bamwe muri aba baturage babivuga.

Murekeyisoni Dative, umukecuru uri mu kigero cy’imyaka 60, yagize ati:“Baravuze ngo aborozi nitwicare turebe uko buri mworozi umutungo we ungana dukusanye amafaranga bazatuzanire amazi inshuro 4, amafaranga twarayatanze kugeza ubu ntiturabona amazi.

Twabahaye ibihumbi 50, bari bavuze ngo buracya basuke imodoka y’abaturage, ubundi bazane izindi z’aborozi.”

Umwe mu batanze aya mafaranga witwa Murebwayire, nawe yasobanuye ko aya mafaranga bayatanze bizezwa kwegerezwa amazi, ariko ngo byarangiye uwabatse amafaranga bayobewe irengero rye.

Yagize ati:“Twari abantu 8 badusaba guteranya amafaranga kugira ngo baduhe amazi, aya mafaranga twayatswe n’umu Dasso wo ku murenge, twaramuhamagaye telefone yikuraho.”

Aba baturage bakoma basaba ko amafaranga yabo batanze bayasubizwa ndetse bakababonera amazi kuko barembejwe n’ikibazo cyo kutagira amazi.

Mu kiganiro Imvaho Nshya yagiranye n’Umunyamabanga Nshingwabikorwa w’umurenge wa Murundi, yemeje ko iki kibazo agikurikirana kandi ko uyu mu Dasso yumva amuzi, bakaba baza kugikurikirana, yaba yarakoze amakosa agafatirwa ibihano.

Gitifu w’umurenge wa Murundi Murangira Xavier yagize ati:“Ubundi nta muturage wagombye kuba atanga amafaranga usibye nko kuvuga ngo baratanga amafaranga y’umusanzu kugira ngo bashyireho uwarinda idamu haba ku manywa cyangwa nijoro, bagashyiraho abo bakozi uwo niwo musanzu wabo wemewe.

Ariko kuvuga ngo hari umuntu waje abaka amafaranga ababwira ko agiye kubazanira amazi ibyo bintu ntabwo ari byo, ubu ikibazo turakimenye tugiye kugikurikirana.”

Aba baturage bavuga ko icyatumye batanga aya mafaranga ari uko bari bayatswe n’umuntu bazi kandi bizeye kuko bajyaga bamubona ku murenge wabo, dore ko nawe yababwiraga ko amazi azahita abageraho.

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE