2017-09-24 09:25:05 clouds 27o High | Kigali Rwanda

Dukurikire:
 
 

Kayonza:Abaturage bafashe ingamba zo guhashya ubujura bw’imyaka mu mirima

Yanditswe na IMVAHO NSHYA

Kuya 2017-06-20 12:03:23

 
Share on:
 
Yasuwe:52
 
Yavuzweho:200
 
10
 
10

Abaturage bo mu murenge wa Ndego mu karere ka Kayonza, baravuga ko bafashe ingamba zo kujya barinda imyaka yabo mu murima, kuko ngo ubujura busigaye bukabije, haba ku manywa ndetse na nijoro.

Abaturage baganiriye n’Imvaho Nshya bemeza ko basigaye bahora bacungira hafi imyaka yabo mu mirima, mu rwego rwo kuyirinda ibisambo n’abajura baba bifuza gusarura ibyo batahinze, nyamara byarahinzwe barebera.

Mukamugema Francoise yagize ati “Ubu turejeje, abashoboye guhinga rwose imyaka yabo imeze neza, ariko nyine ni ukurara muri iyi mirima kuko utahiriwe ngo uharare wasanga imyaka yawe yose bayimaze mu murima.Ubu turara mu masambu, njye nkambitse hariya (aho yerakaga umunyamakuru ni nko muri metero 10 uvuye aho baganiriraga) ni ho ndara.”

JPEG - 162.4 kb
Bamwe mu baturage b’i Ndego bemeza ko imirima yabo bahora bayicungira hafi ngo abajura batayiraramo

Rugwiza Michel, undi muturage wo mu kagari ka Kiyovu mu murenge wa Ndego, na we wemeza ko biyemeje kurarira imirima yabo kugira ngo bahangane n’abajura.Yagize ati “Ubu ikintu twejeje ni aya masaka n’ibigori ariko nyine abantu bafashe ingamba zo kwibera mu mirima kuko abajura babaye benshi, iyo uhumbije gato usanga umurima wawe wose bawusaruye.”

N’ubwo kubona imbuto bitari byoroshye, ariko aba baturage barigomwe barayishaka ndetse barahinga, gusa bamwe mu basaritswe n’ubunebwe ni bo bayogoje abaturage babiba imyaka bahinze nkuko byemezwa na Muragijimana.

Yagize ati “N’iyo imyaka yawe wayisaruye ushobora kubona bakugezeho mu nzu, kuko naho barahaza, ubu gusarura na byo bisaba izindi ngamba kuko ushobora kubisarura ukabigeza mu rugo wasubira mu murima kuzana ibindi ugasanga bya bindi babijyanye, hari n’ubwo inzu bayimenya, irondo rikora nijoro kandi naryo barica mu rihumye, na Polisi dufite nayo ntiyaba kuri buri rugo rw’umuturage.”

Umuyobozi w’akarere ka Kayonza Murenzi Jean Claude, avuga kuri iki kibazo cy’ubujura bwugarije akarere ka Kayonza, yagize ati “Ubu ikigiye gukorwa ni ubufatanye na Polisi y’igihugu, ariko nabo bakagira uruhare mu kwicungira umutekano.Tugomba gufatanya nabo kugira ngo dukaze ayo marondo kugira ngo duhashye abo bahungabanya umutekano ndetse n’abajura.”

Bamwe mu baturage bemeza ko hari abantu bibira ingeso hakaba n’abandi ngo biba kuko bo batigeze bahinga ahubwo bagashaka gusarura ibyo abandi bahinze, uyu muco mubi ukaba urwanyirizwa kure cyane n’abaturage n’ubuyobozi bwabo, kuko ngo nta gisobanuro kibaho cyo kwiba imyaka ya mugenzi we aba yarahinze bimugoye.

HAKIZIMANA YUSSUF

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE