2017-10-17 06:58:11 clouds 27o High | Kigali Rwanda

Dukurikire:
 
 

Kayonza:Abagikoresha abazamu nk’abakozi bashinzwe isuku bakebuwe

Yanditswe na IMVAHO NSHYA

Kuya 2017-05-17 10:19:36

 
Share on:
 
Yasuwe:52
 
Yavuzweho:200
 
10
 
10

Ubugenzuzi bw’umurimo mu karere ka Kayonza buranenga bamwe mu bayobozi b’ibigo byigenga bagikoresha abashinzwe umutekano isuku, kandi ibi byombi ari akazi gatandukanye.

Hari bimwe mu bigo n’amazu y’abikorera agikoresha abashinzwe umutekano abantu bakunze kwita abazamu imirimo ibiri nyamara bagahemberwa umurimo umwe, na wo utitaweho neza nk’uko bisabwa n’amategeko.

Bamwe mu bakora aka kazi baganiriye n’Imvaho Nshya, bagaragaje ko iki kibazo cyo gukoreshwa akazi kenshi kandi bahemberwa kamwe kibabangamira cyane, bagasaba ko bakorerwa ubuvugizi abakoresha babo bakikosora.

Umwe muri bo yagize ati “Ubu turi abazamu babiri, hari ukora amanywa undi agakora ijoro. Dusimburana ku mirimo abayobozi baduha. Ubusanzwe twatse akazi k’izamu ariko ni twe dukata indabo tuziringaniza, nyuma ubwo ukaba uri n’umuzamu hari n’abagutuma ibintu bitandukanye, ubwo ukaba ubaye umupuranto.

JPEG - 167.7 kb
Ubugenzuzi bw’umurimo mu karere ka Kayonza bwakebuye abakoresha nabi abakozi babo

Hari igihe rimwe tubyinubira ariko wakwibuka ko akazi kabuze cyangwa se iyo bagutumye nk’uko hari igihe uwagutumye akugurira irindazi, ukemera ukagakora.”

Umugabo uri mu kigero cy’imyaka 45 ukora akazi k’izamu ku iduka ryo mu mujyi wa Kayonza, yabwiye Imvaho Nshya ati “Ubundi akazi k’umuzamu habamo no gukora isuku, iyo uhageze ku mugoroba urunda ibyo baba biriwe bakoresha ukabishyira mu kintu cyabugenewe, mu gitondo abashinzwe isuku mu mujyi bakaza kubitwara.

Iyo bukeye nko mu masaha ya saa kumi n’imwe n’igice usanga abazamu bose bari gukoropa imbere y’amabaraza bararaho, hari n’abategereza abakoresha babo bakaza bagakoropa mu iduka bakabona gutaha.”

Bamwe mu bakoresha baganiriye n’Imvaho Nshya bemeza ko gukoresha abazamu akazi batasabye nabo bazi ko bitemewe, ariko ngo hari ubwo biba ngombwa ko babafasha.

Mukamurenzi Winny, ukorera muri koperative y’ubudozi yagize ati “Akenshi abazamu iyo baje badufasha gutunganya imyanda iba yuzuye aho dukorera. Icyo adukorera, ni ukuyishyira muri pubeli no kuza kuyiha abashinzwe isuku mu gitondo, ariko nyine kubakoresha gutyo ni amaburakindi kuko ntitwabona amafaranga yo kwishyura umuzamu n’ayo kwishyura umukozi ushinzwe isuku.”

Umugenzuzi w’umurimo mu karere ka Kayonza Baraka Bartheremie, yemeza ko gukoresha abazamu imirimo y’abashinzwe isuku hari aho bikiri, n’ubwo ari hake ariko ababikora nabo ngo bakwiye kubireka.

Yagize ati “Icyo turi gukora ubu ni ugushyira imbaraga mu gusobanurira abantu politiki y’ubuzima n’umutekano ku kazi kuko hari aho usanga bitiranya umukozi ushinzwe umutekano ku kazi n’umuzamu, ubu twahisemo kuganiriza abikorera n’abafite ibigo byigenga by’amashuri kuko ari ho hakunze kugaragara icyo kibazo.

Turabaganiriza tubereka ko buri kazi gakwiye gukorwa ukwako kandi umukozi agahabwa ibyangombwa bikenewe kugira ngo anoze akazi ke. Turanenga bamwe mu bagikoresha abo bakozi gutyo kuko ntibashobora kubarinda impanuka bahurira nazo mu kazi bakora.”

Uyu mugenzuzi w’umurimo yemeza ko bahagurukiye abakoresha bameze batyo, cyane cyane mu bigo by’amashuri yigenga aho babasaba gushyiraho umukozi ushinzwe isuku agahabwa ibikoresho byose akeneye byamurinda impanuka yaturuka ku kazi, ndetse n’ushinzwe umutekano na we agahabwa ibyangombwa by’ibanze byamufasha gukora akazi ke neza.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE