2017-06-27 13:41:38 clouds 27o High | Kigali Rwanda

Dukurikire:
 
 

Karongi:Umukecuru wagizwe incike na Jenoside agira inama urubyiruko

Yanditswe na IMVAHO NSHYA

Kuya 2016-04-08 05:37:03

 
Share on:
 
Yasuwe:0
 
Yavuzweho:200
 
10
 
10

Mukamuligo Eugenie, umukecuru w’imyaka 71 wagizwe incike na Jenoside yakorewe Abatutsi, avuga ko mu gihe cya Jenoside abantu babuze ubumuntu, bityo agasaba urubyiruko muri iki gihe kubushyira imbere.

Mukamuligo atuye mu kagali ka Birambo, umurenge wa Gashali, mu karere ka Karongi. Abavandimwe be icyenda, ababyeyi be, abana be batandatu n’umugabo we, bose bishwe muri Jenoside yakorewe Abatutsi mu Rwanda.

Avuga ko urubyiruko rwagize uruhare runini muri Jenoside, ariko anasanga ari narwo rufite uruhare runini mu guharanira ko itazongera kubaho ndetse n’iterambere ry’igihugu muri rusange.

Yagize ati “Urubyiruko ni rwo mbaraga z’igihugu, ni rwo ejo hazaza, rukwiye gukora ntirwumve ko ruzajya rusaba abakize, rukiga gukora, guha agaciro ikiremwa muntu no guca bugufi kuko icyubahiro ari icy’Imana”.

JPEG - 174.2 kb
Mukamuligo asaba urubyiruko gushyira imbere ubumuntu (Foto Vestine D)

N’ubwo yashegeshwe bikomeye na Jenoside yakorewe Abatutsi, Mukamuligo ahamya ko ubu amaze kwiyubaka, ku buryo yishimira uko abayeho muri iki gihe.

Ati “Nishyize mu Mana nkunda Yesu nkisengera, njya ku masambu ngahingisha nkeza ndetse ngasagurira n’amasoko.

Nyuma ya Jenoside nari mbayeho nabi ntagira inzu, nta ntebe, nta bikoresho byo mu nzu, nza kubona amafaranga ya pansiyo y’umugabo ibihumbi 450, mpita nyubakisha inzu nziza ku muhanda nshyiramo amazi, amashanyarazi, intebe zo muri salo n’ibikoresho byo mu nzu”.

Mukamuligo usengera mu Itorero ry’abadiventisiti b’umunsi wa karindwi, yemeza ko byinshi ageraho abikesha gusenga no kubaha Imana.

Ashishikariza abanyarwanda kugira urukundo, kuko ngo udakunda atazi Imana, ngo amahirwe yo kubaho bafite akwiye kuba impamvu yatuma bakorera Imana kandi bagakundana.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE