2017-06-22 17:42:31 clouds 27o High | Kigali Rwanda

Dukurikire:
 
 

Karongi:Inka 214 za Girinka zaburiwe irengero

Yanditswe na IMVAHO NSHYA

Kuya 2016-07-14 07:20:11

 
Share on:
 
Yasuwe:0
 
Yavuzweho:200
 
10
 
10

Ubuyobozi bw’akarere ka Karongi, buvuga ko muri gahunda ya Girinka, inka 214 zimaze kuburirwa irengero mu buryo budasobanutse.

Umuyobozi wungirije ushinzwe imibereho myiza y’abaturage mu karere ka Karongi, Mukashema Drocelle, avuga ko inka nyinshi ari izagurishijwe rwihishwa n’abari barazihawe.

Yagize ati “Mu Karere kose hamaze gutangwa inka zirenga ibihumbi bitanu (5589), muri zo inka 190 zagurishijwe rwihishwa ziburirwa irengero, inka 24 zaribwe nazo zirabura burundu.”

Uyu muyobozi yongeye kwihanangiriza abaturage bahabwa inka bakazigurisha, ndetse akenshi bakanabikora bataritura bagenzi babo, ariko ku ruhande rw’abaturage nabo barashinja inzego z’ibanze uburangare mu gucunga nabi inka za Girinka.

JPEG - 1.4 Mb
Hari bamwe mu baturage bahabwa inka bagahira bazigurisha (Foto archive)

Sikubwabo Andre, utuye mu murenge wa Gashali muri aka karere, avuga ko batiyumvisha uburyo igihugu gifite umutekano usesuye inka zibwa zikabura burundu, kugeza ubwo ubuyobozi buvuga ngo nta n’amakuru bufite ku ibura ryazo.

Mu kiganiro yagiranye n’Imvaho Nshya, uyu muturage yagize ati:“Abazihabwa baba bazwi, ni gute inka zibwa zikabura burundu kandi amarondo akorwa buri joro.”

Mujawamariya Clemence, utuye mu murenge wa Bwishyura, nawe avuga ko bibabaje kumva ngo umukene yabuze inka, kandi yari kumufasha kwikura mu bukene bwamugize imbata.

Ati”Birababaje kumva ko inka zatanzwe ku bakene zigenda zikabura burundu kandi ba nyirazo bazwi, hanakorwa amarondo.”

Inama Njyanama y’Akarere ka Karongi, yasabye ubuyobozi bw’Akarere gukora raporo irambuye igaragaza buri mwirondoro w’umuturage wabuze inka burundu, n’uburyo yayibuzemo kugira ngo bishakirwe umuti urambye, ndetse niba hari n’uwo bigaragara ko yayigurishije ahanwe hakurikije amabwiriza yagenwe.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE