2017-07-21 15:15:02 clouds 27o High | Kigali Rwanda

Dukurikire:
 
 

Karongi:Imiryango 37 y’impunzi zo mu nkambi ya Kiziba yasezeranye mu mategeko

Yanditswe na IMVAHO NSHYA

Kuya 2017-06-26 13:50:47

 
Share on:
 
Yasuwe:23
 
Yavuzweho:200
 
10
 
10

Imiryango 37 y’impunzi yabagana mu buryo butemewe n’amategeko mu nkambi ya Kiziba mu karere ka Karongi, yasezeranye imbere y’amategeko, yiyemeza kurushaho kubana neza.

Aba basezeranye bavuga ko gusezerana atari umuco uhabwa agaciro iwabo muri Congo, ariko ngo ngo uku kubana mu buryo butemewe n’amategeko byagiraga ingaruka zikomeye mu mibanire yabo, ari nayo mpamvu biyemeje kubana mu buryo bwemewe n’amategeko y’u Rwanda.

Abashyingiwe ni ababanaga batarasezeranye imbere y’amategeko, hakiyongraho n’umuryango umwe w’umusore n’inkumi banze kubana batarasezerana kuko bamaze kumenya ibyiza by’isezerano rikorewe imbere y’amategeko.

JPEG - 244.9 kb
Biyemeje kubana byemewe n’amategeko kuko bibafasha kubana neza

Munganyinka Mukakigeri w’imyaka 54 na Karekezi Juvenal w’imyaka 65, bafitanye abana bane, bakaba babanaga batarasezeranye, ariko kuri iyi nshuro bahisemo gusezerana bakabana byemewe n’amategeko, kuko ngo bamaze gusobanukirwa akamaro k’isezerano rikorewe imbere y’amategeko.

Mu kiganiro yagiranye n’Imvaho Nshya, Karekezi yagize ati “Twasanze mu Rwanda gusezerana babiha agaciro natwe twahisemo gusezerana, ubu twabanaga nk’indaya, iyo ubana n’umugabo cyangwa umugore mutarasezeranye nta bwo aba ari uwawe isaha n’isaha aba yakwirukana akazana undi, ntugira uruhare rusesuye ku mitungo ndetse n’abana mubyaranye ntibahabwa uburenganzira bwuzuye mu muryango, ubu turishimye tugiye kurushaho kubana twizeranye.”

Muhawenimana Immaculée w’imyaka 31 na Hashakimana Louis nabo bafitanye abana batanu, bakaba bamaranye imyaka itanu babana batarasezerana, bahamya ko bagiye kubana bizeranye kubera iri sezerano bagiranye imbere y’amategeko ya Leta y’u Rwanda.

Hashakimana Louis na we aganira n’Imvaho Nshya yagize ati “Mbere sinamubwiraga byose, nta bwo wabwira byose umugore mutarasezerana kuko ntiwamwizera kuko uba umufata nk’indaya, ariko ubu ngiye kumwizera na we anyizere.”

Muhawenimana Immaculée we avuga ko mu babana batarasezeranye umwe aba afatwa nk’umusambane, bigatuma abana babyaranye batagira agaciro ku mitungo.

Minisitiri ushinzwe imicungire y’ibiza no gucyura impunzi Seraphine Mukantabana, yashimiye cyane abasezeranye, abasaba gukomeza kubana mu budahemuka, ubwumvikane n’ubwuzuzanye, ashishikariza imiryango itarasezerana nayo gusezerana kuko bigabanya amakimbirane yo mu miryango.

Impunzi zo mu nkambi ya Kiziba mu karere ka Karongi zahageze mu mwaka wa 1996 zivuye muri Congo. Kuri ubu mu nkambi ya Kiziba hari impunzi 17 145.

DUSINGIZUMUREMYI VESTINE

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE