2017-05-25 06:02:25 clouds 27o High | Kigali Rwanda

Dukurikire:
 
 

Karongi:Gitifu arashinjwa kurema amatsinda ya baringa akaka inguzanyo mu izina ry’abaturage

Yanditswe na IMVAHO NSHYA

Kuya 2016-05-29 07:13:09

 
Share on:
 
Yasuwe:5
 
Yavuzweho:200
 
10
 
10

Abaturage bo mu mudugudu wa Kabuye, akagali ka Rwungo, umurenge wa Rugabano mu karere ka Karongi, bavuga ko Gitifu w’akagali yabashyize mu matsinda ya baringa agafata inguzanyo ya VUP mu izina ryabo, none ubu banki zikaba zirimo kubishyuza ayo batahawe.

Umwe mu baturage bafite iki kibazo, yabwiye Imvaho Nshya ati:“Abaturage ni benshi bafite icyo kibazo, Gitifu w’akagali yandikaga ingo atazibwiye akazishyira mu matsinda ahabwa amafaranga ya VUP, ariko we ntagaragare muri iryo tsinda akareba umuntu yizeye bagakorana akaba ariwe uyafata, ku buryo yaguzemo imitungo irimo amashyamba, moto n’ibindi, twabimenye ari uko banki ije kutwishyuza.”

Uyu muturage kimwe na bagenzi be bavuga ko uyu muyobozi wafashe inguzanyo mu izina ryabo ubu yamaze kwimurirwa mu kandi kagari, ariko bagasaba inzego zibishoboye kubafasha kuva muri iki kibazo bemeza ko kibaremereye.

JPEG - 189.3 kb
Amafaranga yagujijwe mu izina ry’abaturage bo batabizi (Foto archive)

Mu baturage bishyuzwa na banki ngo harimo n’abatishoboye, nyamara ugasanga abafashe inguzanyo mu izina rye barafashe amafaranga menshi, ku buryo kubona ubwishyu bitazabashobokera.

Umwe muri bo ati:“Urugero ni umugabo umwe w’umukene utagira ubwiherero uba muri nyakatsi Sacco yaje kwishyuza amafaranga miliyoni kandi ataratunga n’ibihumbi 10, ntazi gusoma, kwandika no kubara.”

Uyu muyobozi abaturage bashyira mu majwi yabwiye Imvaho Nshya ko ibyo bamuvugaho byose ari ibinyoma, kuko we ngo nta matsinda ya baringa yigeze arema.

Ati:“Ni ukubeshya, iyo abaturage babonye umuyobozi atagihari bamuvugaho ibyo bashaka.”

Umuyobozi w’umurenge wa Rugabano Mukama Hubert, avuga ko icyo kibazo cy’abaturage ko kizwi.

Yagize ati:“Turakizi, hari bamwe bishoboye, abakozi bahembwa na Leta cyangwa abandi banyuranye bagiye bihisha inyuma y’amatsinda runaka, twagiye tubibona, abaturage bakagaragazwa nk’aho bafashe ayo mafaranga batarigeze bayafata abandi bakayafata batayemerewe.”

Uyu muyobozi w’umurenge akomeza avuga ko iki kibazo bagihagurukiye, ku buryo uwariye amafaranga ya banki mu izina ry’undi muturage azabiryozwa.

Ati:“Turi kubikurikirana uwo bizagaragaraho wese n’abo byagaragayeho bagomba guhanwa hakurikijwe amategeko ndetse n’urutonde rw’abo bantu twarangije kurushyikiriza akarere dufatanyije na Polisi, turimo gukora ibishoboka byose kugira ngo amabwiriza ya VUP uko ateye yubahirizwe kandi he kugira umuntu wihisha inyuma y’amafaranga y’abatishoboye.”

Mu murenge wa Rugabano kuva gahunda ya VUP yatangira hatanzwe miliyoni 103, amaze kwishyurwa neza akaba ari miliyoni zirenga 70, mu gihe izindi miliyoni 29 hagishakishwa uko zishyuzwa kugira ngo zifashishwe mu kuguriza abandi.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE