2017-10-17 06:58:11 clouds 27o High | Kigali Rwanda

Dukurikire:
 
 

Karongi:Depite Musabyimana yasabye abaturage gukomera kuri ‘Ndi Umunyarwanda

Yanditswe na IMVAHO NSHYA

Kuya 2017-04-28 06:07:42

 
Share on:
 
Yasuwe:684
 
Yavuzweho:200
 
10
 
10

Depite Samuel Musabyimana, yasabye abaturage bo mu karere ka Karongi gukomeza gushyigikira gahunda y’ubumwe n’ubwiyunge, kuko ari byo bizatuma igihugu gikomeza kwihuta mu iterambere, kikaba indashyikirwa amahanga yigiraho.

Ubu butumwa uyu mudepite yabutangiye mu muhango wo gushyingura mu cyubahiro imibiri 12 y’abazize Jenoside yakorewe Abatutsi, ku wa 26 Mata 2017, mu murenge wa Gashali mu karere ka Karongi.

Iyi mibiri y’Abatutsi bishwe muri Jenoside yashyinguwe mu rwibutso rwa Jenoside rwa Gashali rusanzwe rushyinguwemo abari abasaseridoti, abafurere b’abayozefiti, ababikira, abarayiki n’abandi baturage bari baturutse mu cyari komine Mwendo na Bwakira bahungiye mu kigo cy’ababikira cya Birambo, bishwe muri Jenoside yakorewe Abatutsi.

JPEG - 321.4 kb
Mu rwibutso rwa Jenoside rwa Gashali hashyinguwe imibiri 12 y’abazize Jenoside yakorewe abatutsi

Depite Musabyimana yagaragaje ko ko abishe Abatutsi bishe imibiri ariko batishe indangagaciro zabarangaga, batishe n’agaciro bari bafite, asaba abaturage gushyigikira ibyiza bimaze kugerwaho muri gahunda yo kubaka igihugu no kugisubiza agaciro cyateshejwe n’ubuyobozi bubi bwateguye bukanashyira mu bikorwa Jenoside yakorewe Abatutsi.

Yagize ati “Dufite aho tugeze, u Rwanda muri Afurika ni ishuri ibihugu biza kwigiraho ubumwe, umutekano, byigira kuri byinshi u Rwanda rugezeho. Icyo dusaba Abanyarwanda ni uko imbaraga igihugu cyacu cyashyize muri gahunda ya Ndi Umunyarwanda twagumya kuzishyigikira, aho twigisha Abanyarwanda ko Ndi Umunyarwanda ari isano iduhuza, ikaba icyomoro, umuti, urukingo rwo komora bya bindi twanyuzemo, buri wese agire uruhare mu kubaka ubunyarwanda”.

Umunyamabanga Nshingwabikorwa wa Ibuka Ahishakiye Naphtali, yavuze ko uwarokotse Jenoside yakorewe Abatutsi akwiye kurangwa no gukora cyane no kwiyubaka.

Yakomeje agira ati “Tubasaba gutanga amakuru ku hari imibiri itarashyingurwa, abatarishyura imitungo bangije bakayishyura.”

Ndatimana Emmanuel uhagarariye imiryango y’abafite ababo bashyinguwe mu rwibutso rwa Gashali, asaba abazi aho imibiri itarashyingurwa iri ko bayerekana nayo igashyingurwa mu cyubahiro.

Umuyobozi w’akarere ka Karongi wungirije ushinzwe ubukungu, Bagwire Esperence, asaba abaturage kurangwa n’ubufatanye mu kurandura ingengabitekerezo ya Jenoside, ndetse hagafatwa ingamba ko Jenoside itazongera kuba ukundi.

Yagize ati “Tube umurunga umwe dusigasire ibyagezweho, abazi aho imibiri itarashyingurwa iri bagire ubutwari bwo kuyigaragaza nayo ishyingurwe mu cyubahiro, abatarishyura imitungo yangijwe muri Jenoside bagire uruhare mu kuyishyura.”

Mu rwibutso rwa Gashali hashyinguwemo imibiri 6959, hakiyongeraho 12 yashyinguwe muri uyu muhango wabaye ku wa 26 Mata 2017, yose hamwe ikaba imibiri 6971.

Uyu muhango wabimburiwe n’urugendo rwo kuzirikana inzira y’umusaraba abishwe banyuzemo, hasomwa igitambo cya Misa ndetse hashyirwa indabo ku mva abishwe baruhukiyemo.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE