2017-10-18 07:01:40 clouds 27o High | Kigali Rwanda

Dukurikire:
 
 

Karongi:Abatuye i Kabuga batewe impungenge n’abajura bahayogoje

Yanditswe na IMVAHO NSHYA

Kuya 2017-04-18 14:14:41

 
Share on:
 
Yasuwe:1317
 
Yavuzweho:200
 
10
 
10

Abaturage bo mu kagari ka Kabuga mu murenge wa Rugabano mu karere ka Karongi, batewe impungenge n’ubujura bwibasiye ibyuma bitanga ingufu z’amashanyarazi aturuka ku mirasire y’izuba, ibiribwa biri mu murima n’ibindi.

Aba baturage barasaba ko ubuyobozi bwabatabara bukabafasha gukemura iki kibazo, ubuyobozi nabwo bukavuga ko ikibazo bukizi kandi buri gushaka igisubizo kirambye.

Nyiransabimana Marie Rose, utuye mu mudugudu wa Nyagasozi mu kagari ka Kabuga, avuga ko ubwo bujura bwabaye mu bihe bitandukanye kandi akaba ari ikibazo gihangayikishije.

Yagize ati “Mu ijoro ryo kuwa kabiri rishyira kuwa gatatu mu gitondo narabyutse ndeba umurasire nari mfite hejuru y’inzu ndawubura, menya ko bawibye, n’imyaka mu murima barayiba, ibirayi babimazeho”.

JPEG - 40.2 kb
Ibyuma bitanga amashanyarazi aturuka ku mirasire y’izuba nibyo bikunze kwibwa

Bazira Damascen, utuye mu mudugudu wa Nyabitare mu kagari ka Kabuga nawe avuga ko hari ku isabato mu kwezi gushize yagiye gusenga, agarutse asanga umurasire we bawibye.

Yagize ati “Nageze mu rugo ndaryama nzi ko nta kibazo gihari bukeye mu gitondo imvura iguye abana bati turi kunyagirwa imvura yatwishe, ngiye kureba nsanga amategura yamenaguritse naho abajura bayamenaguye bajya kureba umurasire wari hejuru y’inzu bagenda bakandagira amategura n’amaguru umurasire barawutwara”.

Damascene yongeraho ko atari we wa mbere wibwe, kuko hari benshi bagiye bayibwa, bakaba basaba ko ubu bujura bwafatirwa ingamba zikomeye bugacika.

Yagize ati “Nanjye wari uwa kabiri kuko n’uwa mbere barawunyibye gutyo baje ndi guhinga ari ku manywa bafata urwego barurira barawutwara, ni imyaka baratuyogoje”.

Mukeshimana Marie Gorette, ushinzwe iterambere mu kagari ka Kabuga avuga ko ubujura muri ako kagari buteye inkeke, ariko agatanga ikizere ko umuti uzaboneka ku bufatanye n’abaturage.

Ati “Ubujura bwo mu kagari muri rusange ni ikintu kiduteye inkenke, umuturage arabyuka niba ari ibirayi agasanga babikuye niba ari imyumbati ni uko, ariko ubu twafashe ingamba z’uko abaturage bagiye gucunga umutekano wabo bwite buri wese akaba ijisho rya mugenzi we, kuko ubwo bujura hari ubukorwa n’ijoro n’ubukorwa ku manywa bacunze umuntu aho yagiye, kandi wabaza irondo rikakubwira ngo ntabwo tuzarara ku murima w’umuturage, ugasanga ni ikibazo”.

Akomeza agira ati “Twakoze inama n’abaturage duhana gahunda y’uko ku muganda rusange tuzatora abajura, noneho lisite y’abajura ikajya aharagarara”.

Ngo hari gukusanwa amakuru ya bamwe mu bakekwaho ubujura muri aka kagari ndetse hari umwe wafashwe akaba ari mu maboko ya Polisi, abaturage bagasaba ko uzafatwa kubera ubujura yahanwa ku buryo bw’intangarugero.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE