2017-10-18 07:01:40 clouds 27o High | Kigali Rwanda

Dukurikire:
 
 

Kamonyi: Abahawe inka 10 174 muri Girinka barashima Kagame

Yanditswe na IMVAHO NSHYA

Kuya 2017-05-18 13:06:21

 
Share on:
 
Yasuwe:112
 
Yavuzweho:200
 
10
 
10

Mu karere ka Kamonyi kuva gahunda ya Girinka yatangizwa, hamaze gutangwa inka 10 174, abazihawe bashimira Perezida Paul Kagame watangije iyi gahunda yo gukura Abanyarwanda mu bukene, akaba yaratumye kuri ubu bari mu bishoboye.

Imibare itangwa n’Akarere ka Kamonyi, ishami ry’ubworozi, igaragaza ko muri aka karere hamaze gutangwa inka 10 174 muri gahunda ya Girinka, izi nka zikaba zarorojwe abatishoboye. Muri zo, inka 3 645 zatanzwe na Leta, abafatanyabikorwa batanga inka 4 428, izatanzwe muri gahunda yo kwitura ni 2 101.

Aborojwe muri iyi gahunda bavuga ko batabona icyo bashimira Perezida Paul Kagame kuko iyi gahunda yabakuye ahantu habi mu bukene bukabije bari barimo, ubu bakaba barahinduye imibereho.

JPEG - 73.5 kb
Gahunda ya Girinka yatangijwe na Perezida Paul Kagame ikomeje kuzamura imibereho myiza n’ubukungu by’Abanyarwanda

Umwe muri aba baturage borojwe muri iyi gahunda ya Girinka, Rudakubana Bernardin, avuga ko yorojwe iyi nka muri 2013, akaba yaratoranyijwe nk’umuntu utishoboye.

Kuva yahabwa iyo nka kugeza ubu, imaze kubyara izindi eshatu harimo imwe yituye mugenzi we utari wishoboye. Ubu aba mu nzu nziza yashoboye kwiyubakira kubera iyi nka.

Ati “Ndashimira Perezida wa Repubulika wafashije abatishoboye. Inka norojwe yarabanje irabyara, iyo ibyaye nyitura mugenzi wanjye, yarongeye irabyara ibyara ikimasa ndakigurisha, amafaranga nkuyemo amfasha kuvugurura inzu yanjye nyigira neza.”

Yakomeje avuga ko iyi nka ayikesha umusaruro ufatika kuko yamuhaye ifumbire arahinga akeza, akabona ibimutunga n’ibyo asagurira amasoko, abana be babasha kunywa amata, abishyurira mituweli.

Ati “Ubuzima mfite n’ubwo nari ndimo mbere biratandukanye cyane. Nabaga mu nzu nita ikigonyi, nta nka nagiraga habe n’ihene, ariko ubu ntuye mu nzu irimo sima, mba heza, ndahinga nkeza, mbese nta kibazo cy’imibereho mfite, abana banjye bariga.”
Ukuriye ubworozi mu karere ka Kamonyi Sindayigaya Aboul Madjid, avuga ko inka zimaze gutangwa muri gahunda ya Girinka zatanze umusaruro ufatika ku buryo zahinduye imibereho y’abahatuye ndetse no kugeza ubu umukamo ukaba wariyongereye.

Yavuze ko Girinka mu karere ka Kamonyi yabafashije kongera umusaruro w’ubuhinzi, ngo kuko inka itanga ifumbire uyifite agafumbira imyaka ye.

Aka karere kavuga ko gafite ubuhamya bukomeye abantu borojwe batanga bugaragaza aho bari bari n’aho bigejeje kugeza uyu munsi. Ukuriye ubworozi mu karere ati “Dufite ubuhamya bw’abantu bavuye mu cyiciro cy’abatishoboye bateye imbere.”

Akarere ka Kamonyi gafite inka zirenga ibihumbi 66

Imibare itangwa n’akarere igaragaza ko gafite inka 66 228, amakusanyirizo ane akora n’irya 5 ririmo kubakwa.

Izo nka zose zibarizwa muri aka karere ngo zatumye umukamo uzamuka ugera kuri litiro z’amata 450 000 ku kwezi, gusa ikibazo bafite kikaba ari ikijyanye n’isoko ryo mu nganda, ariko nta kibazo cy’isoko risanzwe bafite.

Uyu mukozi w’Akarere avuga ko aya mata acuruzwa mu mujyi wa Kigali ku bacuruzi basanzwe. Gusa icyo akarere gakora, ngo ni ubukangurambaga kugira ngo aborozi bongere ubwiza bw’amata ngo haboneke amasoko yo mu nganda.

UWIMANA DONATA

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE