2017-08-20 07:43:19 clouds 27o High | Kigali Rwanda

Dukurikire:
 
 

Uwazamuye umukino w’amagare mu Rwanda yasezeye kuri Perezida Kagame mbere yo gusubira iwabo

Yanditswe na IMVAHO NSHYA

Kuya 2017-03-23 17:39:27

 
Share on:
 
Yasuwe:1188
 
Yavuzweho:200
 
10
 
10

Uwari umuyobobozi w’ikigo cy’imyitozo kiri i Musanze “Africa Rising Cycling Centre” akaba ari na we wazamuye umukino wo gusiganwa ku magare mu Rwanda, Jonathan Boyer agiye gusubira iwabo muri Leta Zunze Ubumwe za Amerika gusa akazakomeza gufasha mu rwego rwo guteza imbere uyu mukino mu Rwanda.

Kuri uyu wa 23 Werurwe, Jonathan Boyer ari kumwe na Misiritiri w’Umuco na Siporo “MINISPOC”, Uwacu Julienne na Perezida w’ishyirahamwe ry’umukino wo gusiganwa ku magare mu Rwanda “FERWACY”, Bayingana Aimable bakiriwe na Perezida w’u Rwanda Paul Kagame mu biro bye.

Minisitiri w’Umuco na Siporo, Uwacu Julienne yavuze ko baganiriye na Perezida Kagame ku byo bamaze iminsi bakorana mu rugendo rwo guteza imbere umukino w’amagare mu Rwanda.

Ati “ Twaganiriye ku myaka 10 ishize aho twari turi, aho tugeze n’aho tugana kugira ngo turusheho guteza imbere uyu mukino kuko bimaze kugaragara ko dufite amahirwe menshi kuko hari ibyo twagezeho byerekena ko hari aho dushobora kugera kure cyane harenze aha”.

JPEG - 335.2 kb
Perezida w’u Rwanda Paul Kagame (iburyo) ari kumwe na Jonathan Boyer (ibumoso) wari ugiye kumubwira ko agiye gusubira iwabo ariko azakomeza gufasha u Rwanda mu guteza imbere umukino w’amagare

Minisitiri Uwacu yavuze ko Jonathan Boyer agiye gusubira iwabo ariko ko adasoje akazi kuko azakomeza gufasha u Rwanda mu mukino wo gusiganwa ku magare.

Ati “Ntabwo asoje akazi ke ahubwo uburyo agiye gukoramo ni bwo bugiye guhinduka, yakoraga akazi ari hano aho yayoboraga ikigo cy’imyitozo cya Musanze, akaba umutoza ndetse akanashaka inkunga zatuma ikipe itera imbere, ubu igihinduka ni uko azajya akorera kenshi cyane hanze kurusha uko azajya akorera hano”.

Akomeza avuga ko ntacyo bizahungabanya. Ati “ Tugomba kongera imbaraga tugashakisha uburyo butuma ikigo cy’imyitozo cya Musanze gisanzwe gifasha mu bijyanye n’umukino w’amagare kirushaho kugira ibikorwa biyunganira ndetse bikanatanga n’ubushobozi bufasha ari abakinnyi ndetse n’abanyamahanga bashobora kuza kuyikoresha mu bijyanye n’ubukerarugendo”.

Uko Jonathan Boyer azajya akora

Minisitiri Uwacu yavuze ko Jonathan Boyer agiye gusubira muri Amerika akagerageza gukoresha ubumenyi afite n’abantu mu kumenyekanisha u Rwanda binyuze mu mukino w’amagare no gushaka abo dufatanya bashobora no gutanga inkunga ziza zikunganira kiriya kigo cy’imyitozo.

Yemeje ko mu marushanwa n’ubundi ikipe y’igihugu yitabira ahantu hatandukanye hari igihe Jonathan Boyer azajya aba ari kumwe n’ikipe.

Umuyobozi wa FERWACY, Bayingana Aimable yavuze ko babwiye Perezida Kagame gahunda ihari yo kuzamura ubumenyi bw’abanyarwnada mu gutoza, gukanika amagare no kureba uko bateza imbere umukino hifashishijwe ibiboneka mu Rwanda.

Ati “Hari nk’ubukerarugendo kuko ahandi hari ubukorwa hifashishijwe amagare hari abaza bagakodesha igare bagatembera hirya no hino, abasoje igare na bo bakaba babaherekeza bityo bakabona akazi”.

Mu kigo cy’imyitozo cya Musanze “Africa Rising Cycling Centre” hashyizweho umuyobozi wungirije ari we Mutabazi Richard usanzwe ari umunyamabanga mukuru mu ishyirahamwe ry’umukino wa Basketball mu Rwanda “FERWABA”.

Yatangarije Imvaho Nshya ko ntacyo bizahungabanya kuri ibi yari ashinzwe ahubwo yamaze gusezera ku kazi yarasanganwe muri Never Again Rwanda.

Bayingana yatangaje ko, umutoza Sterling Magnell ndetse n’abandi bashinzwe iby’ubukanishi bahari bazaguma mu mirimo yabo. Jonathan Boyer bikaba bitenyijwe ko azagenda mu ntangiriro z’ukwezi gutaha kwa Mata 2017.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE