2017-10-17 06:58:11 clouds 27o High | Kigali Rwanda

Dukurikire:
 
 

Huye:Abunzi 175 bahawe amagare aborohereza mu ngendo z’akazi

Yanditswe na IMVAHO NSHYA

Kuya 2017-05-10 13:56:48

 
Share on:
 
Yasuwe:37
 
Yavuzweho:200
 
10
 
10

Abunzi 175 bo mu karere ka Huye barishimira ko na bo bahawe amagare mu rwego rwo kubafasha mu murimo bakora wo kunga abaturage no gukemura amakimbirane hagati yabo.

Abahawe aya magare bavuga ko aje kuborohereza ingendo bakoraga rimwe na rimwe bakazikora n’amaguru igihe babaga badafite ubushobozi bwo gutega ibinyabiziga.

Mukambazi Josette, umwe mu bagore bakora ubwunzi mu murenge wa Mbazi na we wahawe igare, yavuze ko nyuma yo guhabwa amagare bagiye guharanira kuzuza inshingano zabo uko bikwiye, kuko imbogamizi ya mbere bari bafite y’urugendo rurerure bakoraga n’amaguru ikemuwe.

Yagize ati “Twishimye cyane pe, nkanjye nsanzwe nzi igare ariko nta ryo nagiraga, najyaga nkora urugendo rugera ku minota nka 40 kugira ngo ngere aho tujya kuburanisha, urumva ni runini umuntu yaba adafite amafaranga yo kwishyura nk’igare ryatugezagayo ugasanga birahenda, ariko ubu rwose njye niteguye kujya ndyitwarira nta kibazo. Kandi muri rusange twese batugiriye neza cyane.”

JPEG - 95.8 kb
Abahawe amagare bavuze ko ikibazo cy’ingendo ndende gikemutse

Uretse uyu mwunzi uvuga ko yajyaga agorwa no gukora ingendo ndende n’amaguru agiye gukemura ibibazo by’abaturage, hari na bagenzi be bagaragaza ko byajyaga bibasaba kwikora ku mufuka kugira ngo babashe kwitegera ibinyabiziga, ariko ubu barishimira ko icyari ikibazo gikomeye gikemutse ku buryo burambye.

Umuyobozi wungirije ushinzwe iterambere ry’ubukungu mu karere ka Huye Mutwarasibo Cyprien, avuga ko aya magare bayahawe mu rwego rwo kuborohereza kugera aho bakorera akazi kabo, akabasaba kurushaho kugakorana umwete n’ubunyangamugayo.

Yagize ati "Inteko y’ubujurire y’abunzi ku rwego rw’umurenge usanga bakora ingendo ndende kuko hari n’igihe usanga banagiye ku muzi w’ikibazo aho ikibazo kiri, ugasanga ni ho bagiye gukorera, ugasanga baravunika cyane, icyo rero twababwira ni uko kubaha aya magare ari ukubashimira uburyo bitangamo mu nyungu z’Abanyarwanda.

Icyo tubasaba, rero ni ugukomeza gukora aka kazi neza, kandi ntibanumve ko ari ayo kugurisha ahubwo ni ayabo agomba kubafasha mu kazi ndetse no mu bindi byabateza imbere.”

Abunzi bahawe amagare ni abagize komite y’abantu 7 ku rwego rwa buri murenge uko ari 14 igize akarere ka Huye ndetse n’uhagarariye buri komite y’abunzi ku rwego rw’akagari.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE