2017-10-17 06:58:11 clouds 27o High | Kigali Rwanda

Dukurikire:
 
 

Hamuritswe igishushanyombonera cy’umujyi wa Bugarama

Yanditswe na IMVAHO NSHYA

Kuya 2017-03-24 15:20:35

 
Share on:
 
Yasuwe:1145
 
Yavuzweho:200
 
10
 
10

Mu gihe kiri imbere igice kinini cy’umurenge wa Bugarama kigiye kuba umujyi wunganira umujyi wa Rusizi, igishushanyombonera cyawo kikaba cyaramurukiwe abatekinisiye b’akarere n’ubuyobozi bw’uyu murenge, kikaba gisigaye kwemeza n’inama njyanama y’akarere kikabona gushyirwa mu bikorwa.

Nk’uko Imvaho Nshya yabitangarijwe n’umuyobozi wa sosiyete UPCE Consult yagikoze, Ndayisenga Jean Pierre, ngo kizashyirwa mu bikorwa mu gihe cy’imyaka 20, ishyirwa mu bikorwa ryacyo rikazatwara miliyari 50 z’amafaranga y’u Rwanda, kikazakorwa mu byiciro 3.

Icyiciro cya mbere kizaba kigizwe no kugisobanurira abaturage, abashoramari n’izindi nzego, gutangira gutunganya ahazajya ibikorwaremezo, n’ibindi, bikazatwara hafi miliyari 20 z’amanyarwanda mu gihe cy’imyaka 6.

Icyiciro cya 2 ngo kizaba kigizwe no gukomeza gutunganya ibikorwaremezo bizaba byaratangiye kugaragazwa mu cyiciro cya mbere, gutunganya ubusitani, ibibuga by’imikino n’ibindi, bizatwara miliyari 15 mu gihe cy’imyaka 7.

Icya 3 cyo kizaba kigizwe no gusana nk’ibyaba byarangiritse muri ibi byiciro byombi, gutunganya ibisigaye byose bidatunganye, icyo gihe umujyi ukazaba ugaragara ko ari umujyi wunganira koko uwa Rusizi abawutuye bazaba bishimiye kubamo, kikazarangira na cyo mu myaka 7 gitwaye miliyari 15.

Yagize ati “Ni igishushanyombonera cyizwe neza ku buryo ibikenewe byose muri uriya mujyi uri ku mupaka w’ibihugu 2 bizaba bihari, abazaba bawutuye bakazaba bafite ibyangombwa byose biranga umujyi, ari yo mpamvu bagomba gutangira kubyitegura, bagatangira kubaka mu buryo beretswe kugira ngo ibyo bubaka bitazasenywa mu ishyirwa mu bikorwa ryacyo.”

Avuga ko giteye ku buryo buri nzu yose izakora ku muhanda uzaba ukurikiwe n’ibikorwaremezo, nk’amazi, amashanyarazi, Fibre optique n’ibindi bihagije, buri gace kose kakaba gafite aho kagenewe.

Ni umujyi ufite hegitari 2400, ariko ahazaba hatuwe cyane hari n’ibikorwaremezo byinshi hakazaba ari kuri hegitari 594, ukazorohereza ubucuruzi n’ubukerarugendo, cyane cyane abazaba basura amashyuza ari hafi y’aho mu murenge wa Nyakabuye.

JPEG - 149.4 kb
Rukazambuga Gilbert( uwa 2 uturutse i bumoso) arahamya ko iki gishushanyombonera kije guhindura imibereho y’abatuye mu Bugarama

Umunyamabanga nshingwabikorwa w’uyu murenge, Rukazambuga Gilbert, avuga ko kiziye igihe kuko urebye urujya n’uruza rw’abawugana, ukareba n’uko imiturire ihagaze ubu, hari hakenewe igishushanyombonera cy’umujyi kiyobora iyo miturire akajagari kakavamo, hakanabyazwa umusaruro kuko hari uburyo bwinshi bw’iterambere butakoreshwaga bugiye gukoreshwa.

Yagize ati “Turacyakiriye, njyanama nimara kucyemeza kizahita gishyirwa mu bikorwa, kikaba kije kunoza imiturire no kongera iterambere rishingiye ku mujyi muri aka karere, ukazaba umujyi ukomeye nyuma ya Rusizi izaba yunganira umujyi wa Kigali, ahazaba hari n’amahoteli agezweho n’ibindi bikorwaremezo byari bihakenewe, tugasaba abaturage guhindura imyumvire bagatangira gukora imirimo yabo batekereza ko uyu mujyi ufite igishushanyombonera gifite amategeko akigenga nk’indi mijyi yose.”

Gatete Donatien ushinzwe iby’ubutaka ku karere, wacyakiriye mu izina ry’aka karere, yavuze ko nikimara kwemezwa na njyanama bazatangira kugisobanurira abo bireba bose, kikazashyirwa mu bikorwa neza uko cyateganijwe, bikongerera aka karere ubukungu kuruta uko byari bimeze ubu.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE