2017-06-24 09:49:51 clouds 27o High | Kigali Rwanda

Dukurikire:
 
 

Guverineri Mureshyankwano yasabye urubyiruko kwirinda ibiyobyabwenge

Yanditswe na IMVAHO NSHYA

Kuya 2017-03-23 10:00:10

 
Share on:
 
Yasuwe:893
 
Yavuzweho:200
 
10
 
10

Ubwo hizihizwaga umunsi ngarukamwaka witiriwe Mutagatifu Yozefu, Guverineri w’Intara y’Amajyepfo Mureshyankwano Marie Rose yasabye abanyeshuri biga mu rwunge rw’amashuri rwitiriwe Mutagatifu Yozefu i Kabgayi, kurangwa n’uburere bwiza, birinda ibiyobyabwenge n’izindi ngeso mbi.

Mu ijambo rye Guverineri w’Intara y’Amajyepfo yabanje kugaruka ku myitwarire mibi ya bamwe mu rubyiruko, aho usanga barasaritswe n’ibiyobyabwenge ndetse n’ingeso mbi zirimo n’ubusambanyi, avuga ko urubyiruko rwiga n’urutiga rukwiye kwirinda uwo muco mubi, ahubwo bagaharanira iteka uburere bwiza budashingiye ku bumenyi gusa umuntu akura mu mashuri.

Guverineri Mureshyankwano yatanze urugero rw’umunyeshuri umwe basanze mu kigo ngororamuco yaravanywe mu mashuri kubera kunywa ibiyobyabwenge kandi abamwishyuriraga barenze umuntu umwe, amafaranga yose yabonaga akayijyanira muri ibyo biyobyabwenge ntiyite ku mashuri.

Ati "Amafaranga yose bishyuriraga uyu munyeshuri niyo yamuteye umurengwe, twongeye kumusubiza mu ishuri cyakora ntituzi niba aziga neza kuko ibiyobyabwenge byaramusaritse."

JPEG - 208.6 kb
Guverineri Mureshyankwano aganira n’abanyeshuri bo muri GS St Joseph Kabgayi (Foto Muhizi E)

Muhizi Jean Claude, uhagarariye abanyeshuri, avuga ko ubumenyi n’uburere bahabwa n’ababyeyi babo ndetse n’Ubuyobozi bw’iri shuri ari byo byatumye batsinda ku rugero ruri hejuru uhereye mu cyiciro rusange ndetse n’ayisumbuye, kandi ko bizera badashidikanya ko uburere batojwe buzabafasha ku buryo bazabutoza abakiri bato.

Azibereho Jean Marie Vianney, umuyobozi mukuru w’abafurere b’abayozefiti, avuga ko urubyiruko rukwiye gufatira urugero rwiza kuri Mutagatifu Yozefu warangwaga no kumvira ndetse no kwizera mu buzima bwe bwose, aba n’inyangamugayo.

Yagize ati “Icyatumye twitirirwa iri zina ndetse n’ikigo cyanyu kikaba cyarisunze uwo Mutagatifu ni uko hari ingeso nziza bamubonanye, ibi nibyo twifuza ko urubyiruko rwacu rufatiraho urugero."

Urwunge rw’amashuri yisumbuye rwitiriwe Mutagatifu Yozefu rwigamo abanyeshuri barenga 800 mu mwaka w’amashuri 2015-2016 abanyeshuri bahiga batsinze 100%.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE