2017-08-19 07:41:08 clouds 27o High | Kigali Rwanda

Dukurikire:
 
 

Gisagara:Imidugudu 3 yarangije kwishyura 100% mituweli y’umwaka utaha

Yanditswe na IMVAHO NSHYA

Kuya 2017-05-04 06:25:40

 
Share on:
 
Yasuwe:32
 
Yavuzweho:200
 
10
 
10

Nyuma yo kumenya ko mu karere ka Gisagara kuri ubu hari imidugudu igera kuri 3 yamaze kwishyura ubwisungane mu kwivuza bw’umwaka utaha wa 2017-2018 ijana ku ijana, ndetse bakaba baranaterewe kashe mu makatita yabo, Guverineri w’Intara y’Amajyepfo Mureshyankwano Marie Rose yasabye indi midugudu gufatira urugero kuri iyi.

Guverineri Mureshyankwano yasabye indi midugudu yose yo muri iyi ntara gukora nka bo kuko byazatuma intara iza ku mwanya wa mbere mu kwesa uyu muhigo.

Mu gihe umwaka w’ubwisungane mu kwivuza utangira mu kwezi kwa karindwi kwa buri mwaka, imidugudu 3 ari yo Nyamirama, Nkuramo na Banga yo mu murenge wa Gishubi ho mu karere ka Gisagara abaturage bose ubu bamaze kwishyura ubwisungane mu kwivuza bw’umwaka utaha wa 2017-2018, ndetse banarangije gutererwa kashe mu makarita yabo y’ubwisungane mu kwivuza.

JPEG - 157.5 kb
Guverineri Mureshyankwano arasaba ba Midugudu kwigira kuri bagenzi babo barangije kwishyura mituweli

Guverineri w’Intara y’Amajyepfo Mureshyankwano Marie Rose asanga iyi midugudu ari iyo gushimwa kuko yabaye intangarugero mu yindi, ariko kandi n’abakiri inyuma mu kwitabira mituweli bakikubita agashyi barebeye kuri iyi midugudu.

Yagize ati “Iki gikorwa ni kiza kandi ni indashyikirwa kuri ba midugudu besheje uyu muhigo 100%, n’abandi bakwiye kureberaho bakabafatiraho urugero bakagenza nka bo kugira ngo uyu muhigo tuzawese turi aba mbere mu gihugu, aba ba midugudu rero ni abo gushimwa kandi cyane kandi bazakomereze aho no mu yindi mihigo.”

Havugimana Jean Damascene, umuyobozi w’umudugudu wa Nyamirama mu murenge wa Gishubi, umwe mu midugudu itatu yo muri aka karere yamaze kwishyura ubwisungane mu kwivuza mu mwaka wa 2017–2018, atangaza ko nta buryo budasanzwe bakoresheje ngo babe bamaze kugera kuri iyi ntera, uretse kuba ari ubushake n’ubukangurambaga mu kwibumbira mu bimina bashyizemo imbaraga.

Yagize ati “Ubundi ariya mafaranga si menshi pe, ariko usanga abaturage bavuga ngo bayabuze, twe icyo twakoze ni amatsinda 2 y’ibimina kandi tuyakurikirana umunsi ku munsi, twereka abaturage uburyo ari inyungu zabo, kandi dufata n’umuhigo muri buri kimina w’uko ukwezi kwa kane kugomba kurangira twese twayatanze, ubundi tukagenda tumenya ngo uyu ko yiyemeje gutanga aya buri cyumweru akaba atayatanze byamugendekeye gute?

Tukabimenya tukamufasha, ni uko twagiye dukora kugeza ubwo twese dutanze ubu bwisungane kandi ntituzigera dusubira inyuma.”

Aba baturage barangije gutanga umusanzu w’ubwisungane mu kwivuza ngo banishimira ko banamaze kubaterera za kashe mu makarita yabo zigaragaza ko bemerewe kwivuza mu mwaka utaha wa 2017–2018, iki nacyo kikaba cyarabongereye imbaraga, ku buryo bizera ko no mu yindi myaka iri imbere bazakomeza kuba indashyikirwa muri uyu muhigo wa mituweli.

Magingo aya akarere ka Gisagara muri rusange kageze ku kigereranyo cya 22.2% mu gutanga ubwisungane mu kwivuza, igipimo kikiri hasi ugereranyije n’igihe gisigaye ngo umwaka w’ubwisungane mushya utangire.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE