2017-06-28 15:02:12 clouds 27o High | Kigali Rwanda

Dukurikire:
 
 

Gicumbi:Baributswa kwirinda imvugo n’ibikorwa bikomeretsa abarokotse Jenoside

Yanditswe na IMVAHO NSHYA

Kuya 2017-04-07 08:01:04

 
Share on:
 
Yasuwe:126
 
Yavuzweho:200
 
10
 
10

Umuyobozi w’Akarere ka Gicumbi Mudaheranwa Juvenal, asaba abaturage kuba hafi abarokotse Jenoside yakorewe abatutsi, by’umwihariko bakirinda imyitwarire n’imvugo zishobora kubakomeretsa.

Meya Mudaheranwa asaba abaturage bose muri rusange kwitabira gahunda z’ibiganiro byateguwe muri gahunda yo kwibuka ku nshuro ya 23 Jenoside yakorewe abatutsi, ibi biganiro bikaba bizabera mu midugudu yose hirya no hino mu gihugu.

Uyu muyobozi yasabye abaturage by’umwihariko gusubiza amaso inyuma bakibuka amakuba igihugu cyanyuzemo, maze buri wese agafata ingamba zo gukumira Jenoside ko yakongera kuba mu Rwanda.

Yagize ati “Musabwa kwitabira gahunda ziteganywa mu midugudu, mukirinda imyitwarire idahwitse nk’uko byakunze kugaragara muri uyu murenge wa Rutare, mureke duhuze imbaraga dukumire bamwe batumva gahunda zo kubaka igihugu, mwitware ku buryo mudahungabanya cyangwa ngo mukomeretse abagaragaraho ingaruka za Jenoside yakorewe abatutsi mu mwaka wa 1994.”

JPEG - 232.1 kb
Abaturage b’ i Rutare basabwe kwirinda ingengabitekerezo ya Jenoside (Foto Habineza R)

Mudaheranwa Juvenal, Umuyobozi w’akarere ka Gicumbi kandi yibukije abaturage ko muri iki gihe cyo kwibuka Jenoside yakorewe abatutsi hari bamwe mu bo yagizeho ingaruka usanga bahura n’ibibazo bitandukanye birimo n’ihungabana, asaba buri wese kugira uruhare mu kubafasha mu buryo bushoboka bwose.

Bamwe mu baturage bo muri aka karere baganiriye n’Imvaho Nshya bagaragaje ko biteguye kwitabira gahunda zose zateguwe muri iki gihe cyo kwibuka, ndetse by’umwihariko bakaba bemeza ko bafatanyije kurwanya ingengabitekerezo ya Jenoside aho iva ikagera kuko yasubiza inyuma intambwe nziza bagezeho mu bumwe n’ubwiyunge.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE