2017-08-22 09:34:31 clouds 27o High | Kigali Rwanda

Dukurikire:
 
 

Gatsibo:RURA yavugutiye umuti ibibazo byadindizaga abamotari

Yanditswe na IMVAHO NSHYA

Kuya 2017-06-05 15:24:24

 
Share on:
 
Yasuwe:139
 
Yavuzweho:200
 
10
 
10

Nyuma y’igihe kirekire abakora umurimo wo gutwara abantu kuri moto (abamotari) bijujutira kutabonera ibyangombwa ku gihe, ikigo cy’igihugu gishinzwe kugenzura imikorere y’inzego z’imwe z’imirimo ifitiye igihugu, RURA, cyabijeje ko ibi bibazo byose bigiye kuvugutirwa umuti urambye.

Mu biganiro byahuje abamotari n’ubuyobozi bwa RURA mu cyumweru gishije, abamotari bijejwe ko bimwe mu bibazo byajyaga bibadindiza mu mikorere bigiye gukurwaho, ari nayo mpamvu iki kigo cyateguye gahunda yo kubegera aho bakorera, ibibazo byabo bikumvwa ndetse bigakemurwa.

Umuvugizi wa RURA Antony Kuramba, avuga ko ibi biganiro byahurije hamwe amakoperative y’abatwara abantu kuri moto hagamijwe kumva no gutanga inzira zo gukemura ibibazo bahura nabyo mu kazi kabo ka buri munsi.

JPEG - 114.4 kb
Abamotari bitabiriye ibiganiro ari benshi (Foto Hitimana S)

Mu bibazo byagaragajwe biza imbere, ku isonga hari kuba batabona ku buryo buboroheye ibyangombwa byo gukora aka kazi bizwi nka ‘autorisation’.

Abakora akazi ko gutwara abantu n’ibintu kuri moto mu karere ka Gatsibo, bagaragaje ko abenshi bishyura ibi byangombwa nyamara ntibabibone.

Abayobozi babo ngo bababwira ko RURA ishyiraho amananiza y’umubare wa moto uba ukenewe kugira ngo bitangwe, uku gutinda guhabwa ibyangombwa bigatuma bahora bakwepana na Polisi y’igihugu ngo itabafata ikabaca amafaranga y’ibihano.

Mu kiganiro yagiranye n’Imvaho Nshya, umuvugizi wa RURA Antony Kuramba, yagize ati “Hari ibyo abanyamuryango babeshywa n’abayobozi babo. Abandi ngo babaca amafaranga y’ikirenga bita itike yo kujya kubazanira ibyangombwa i Kigali. Twaje kugira ngo tuganire buri wese amenye inzira zinyurwamo n’ushaka icyangombwa kandi ufite ikibazo akitubaze.”

Uyu muyobozi kandi avuga ko iyi gahunda barimo igamije kurushaho kwegereza serivise abagenerwabikorwa, kuko byagaragaraga ko abamotari bafite ibibazo byinshi bikeneye guhabwa umurongo wo kubikemura.

Muhire Samuel, ukorera muri koperative ya Kabarore, yagize ati “Nabariwe ibisabwa njya kubyishyura ubu ntegereje ko icyangombwa cyanjye kirangira nkagitahana. Naje mu nama ntabikeka ariko ntunguwe no guhita mpabwa serivise nari maze umwaka narasabye ariko simbone icyangombwa.”

Mu butumwa abanyamuryango b’amakoperative bahawe, basabwe kuba hafi y’ubuyobozi bwabo, bakamenya ibyo bakorerwa, ibyo batishimiye bakabigaragaza kugira ngo inzego zibishinzwe zibafashe.

Kugeza ubu mu karere ka Gatsibo habarizwa amakoperative y’abatwara moto agera kuri 14, ahuriye mu ihuriro ryitwa UNDECOMU.Ubuyobozi bw’aya makoperative buvuga ko abarenga kimwe cya kabiri batagiraga ibyangombwa byo gutwara kandi abenshi barabyishyuriye.

HITIMANA SERVAND

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE