2017-08-20 07:43:19 clouds 27o High | Kigali Rwanda

Dukurikire:
 
 

Gakenke:Baterwa igihombo n’ikusanyirizo ry’amata rya Gatonde ryabaye rihagaze

Yanditswe na IMVAHO NSHYA

Kuya 2017-03-20 07:17:51

 
Share on:
 
Yasuwe:389
 
Yavuzweho:200
 
10
 
10

Aborozi b’inka bo mu murenge wa Mugunga mu karere ka Gakenke baravuga ko baterwa igihombo no kuba batakibona aho bagemura amata, nyuma y’aho ikusanyirizo rya Gatonde bayagemuragaho rimaze igihe rihagaze.

Ubuyobozi bw’umurenge wa Mugunga buravuga ko guhagarara kw’iri kusanyirizo byatewe n’imikorere mibi y’ubuyobozi bwa Koperative yaricungaga, gusa ngo hakaba hari gahunda y’uko ryakongera gukora mu minsi mike.

Iri kusanyirizo ngo ryafunguye imiryango mu mwaka wa 2010, ricungwa na koperative COOPEAM ngo ntabwo ryakoze umwaka urenze umwe, ariko ngo ryari rimaze guhomba arenga miliyoni 9, zikomoka k’umusaruro w’amata y’aborozi bo mu mirenge ya Mugunga, Rusasa, Kirambo na Cyabingo yo muri Gakenke, ibi ngo byaje kubaca intege.

PNG - 753.3 kb
Iri kusanyirizo ntirigikora (Foto Ngaboyabahizi P)

Umwe mu borozi yagize ati “Tukimara kubona iri kusanyirizo twumvise dusubijwe kubera ko amata yacu yari abonye isoko, ariko uko twagemuraga twagiye kubona tubona birengeje ukwezi ntakutwishyura, aha ni ho twahereye twanga kugemurayo amata, ahubwo duhitamo ubu kujya tuyajyana muri resitora bakatwishyura amafaranga 100 kuri Litiro akaba make ariko tukayatahana.

Ni mu gihe ku ikusanyirizo batwishyuraga amafaranga 160 ariko akamara amezi n’amezi, turasaba ko twakwishyurizwa, kandi ubuyobozi bw’akarere na bwo buzi ikibazo cyacu, nkanjye banyambuye agera ku bihumbi 98000, aha nanone byaba byiza komite nyobozi y’iri kusanyirizo ivuguruwe kugira ngo twongere tugemureyo amata”.

Umuyobozi wa COOPEMU ishinzwe iri kusanyirizo ry’amata, Kamegeri Augustin yagize ati “Mu by’ukuri impamvu iri kusanyirizo ry’amata rya Gatonde risa n’irirangwamo igihombo, mbona biterwa n’uko ryatangiye inyigo itaranozwa neza dukorera mu kajagari, dusa n’abari mu igerageza, ubundi aborozi bakazana amata bavanzemo amazi, amata akaba mabi tukayabogora bituma dukorera mu gihombo, ubu rero turi kuvugana n’ubuyobozi bw’umurenge n’akarere ngo turebe uburyo ryakongera gufungura imiryango”.

Umunyamabanga nshingwabikorwa w’umurenge wa Mugunga Bizimana Ndababonye yagize ati: “Ni koko iriya koperative amakuru mfite ni uko yahombejwe n’imicungire mibi y’umutungo k’uburyo ubugenzuzi bwakozwe bwasanze amafaranga agera kuri miliyoni 9 yaraburiwe irengero bituma iyi koperative isa n’ihombye ihita ihagarara.

Gusa kuri ubu hashyizweho ingamba k’uburyo mu minsi iri imbere iri kusanyirizo rizongera gukora, ndetse ubu harashakwa n’uburyo abarimo imyenda bayishyura, Kandi tubishyizeho imbaraga k’ubufatanye n’akarere”.

Iri kusanyirizo ryubatswe k’ubufatanye na Minisiteri y’ubuhinzi n’ubworozi ndetse n’ikigo LISP, ritwara amafaranga arenga miliyoni 200, harimo inyubako n’ibikoresho bitwara amata n’imashini ziyatunganya.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE