2017-12-12 14:14:08 clouds 27o High | Kigali Rwanda

Dukurikire:
 
 

Gakenke:Abaturage 20 bahawe inka zizabafasha kwihutisha iterambere

Yanditswe na IMVAHO NSHYA

Kuya 2017-08-23 09:13:51

 
Share on:
 
Yasuwe:41
 
Yavuzweho:200
 
10
 
10

Abaturage 20 batishoboye bo mu murenge wa Mugunga mu karere ka Gakenke, barashimira ubuyobozi bw’aka karere bwaboroje inka, bakaba bizeye ko zizabafasha kwiteza imbere, bagahindura imibereho yabo.

JPEG - 292.5 kb
Abahawe inka biyemeje kuzifata neza kugira ngo zizabahe umusaruro ushimishije (Foto Basanda O)

Ubuyobozi bw’aka karere buvuga ko izi nka zitangwa muri gahunda ya Girinka zizagera ku batishoboye bose, hagamijwe kubafasha kuzamura iterambere ryabo, kuko izi nka zitanga ifumbire ifasha abaturage kongera umusaruro w’ubuhinzi, ndetse zigatanga n’amata afasha mu guteza imbere imirire myiza, akanatanga amafaranga.

Niyonsenga Aimé Francois, umuyobozi w’akarere ka Gakenke wungirije ushinzwe iterambere ry’ubukungu, yabwiye Imvaho Nshya ko izi nka 20 bahaye abaturage zije ziyongera ku zindi zatanzwe muri gahunda ya Girinka, hakaba hari icyizere ko imiryango yazihawe izikura mu bukene mu buryo bwihuse.

Yagize ati “Inka 20 zatanzwe mu murenge wa Mugunga bizatanga impinduka, twabikoze mu rwego rwo kudatatanya imbaraga, ni byiza kuba twarazishyize mu murenge umwe kuko n’ahandi zizahagera”.

Muri uwo murenge wa Mugunga hari ikusanyirizo ry’amata, ku buryo mu gihe izi nka zizaba zatangiye gutanga umukamo, bizatuma umusaruro w’amata iri kusanyirizo rikeneye wiyongera, intego zaryo zibashe kugerwaho.

Abaturage bahawe izi nka babwiye Imvaho Nshya ko biteguye kuzifata neza mu buryo bwose bushoboka, kuko ngo bamenye ko uko inka uyifashe neza nayo ari ko itanga umusaruro ushimishije, igahindura imibereho y’uwayihawe mu gihe gito.

Umwe muri bo yagize ati “Inka mpawe njye ndayifata nk’intangiriro y’ubukire, kuko igiye kujya impa ifumbire mbashe kubona umusaruro w’ubuhinzi uhagije, kandi noneho igihe izaba yabyaye njye n’umuryango wanjye tuzajya tunywa amata tugubwe neza, ndetse tunasagurire amasoko tubone agafaranga.”

BASANDA NS OSWALD

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE