2017-08-19 07:41:08 clouds 27o High | Kigali Rwanda

Dukurikire:
 
 

Dr. Biruta yasabye inzego zose gushyira mu mihigo kubungabunga ibidukikije

Yanditswe na IMVAHO NSHYA

Kuya 2017-06-06 12:52:14

 
Share on:
 
Yasuwe:53
 
Yavuzweho:200
 
10
 
10

Minisitiri w’umutungo kamere Dr. Vincent Biruta, yasabye inzego zose gukomeza kubungabunga umutungo kamere zikanabishyira mu mihigo, cyane ko Leta y’u Rwanda yashyize imbaraga nyinshi muri gahunda zo gufata neza ibidukikije.

Ibi yabitangaje ubwo hizihizwaga umunsi mpuzamahanga w’ibidukikije, ku rwego rw’igihugu wabereye mu karere ka Gakenke, mu murenge wa Gashenyi. Uyu munsi wabanjirijwe n’icyumweru cyahariwe kwita ku bidukikije.

Minisitiri Biruta yagize ati “Ibidukikije biduha umwuka mwiza duhumeka, bityo rero nkaba nsaba abikorera, inzego za Leta, gushyira mu igenamigambi no mu mihigo yabo gahunda yo kubungabunga ibidukikije no guhangana n’imihindagurikire y’ibihe”

PNG - 930.3 kb
Minisitiri w’umutungo kamere Dr Biruta yifatanyije n’abaturage mu muganda kuri Base (Foto Ngaboyabahizi P)

Biruta yavuze ko mu rwego rwo guhuza umuntu n’ibidukikije, Leta y’u Rwanda yashyizeho ingamba zitandukanye zigamije kunoza imiturire nta kubangamira ibidukikije, gutunganya imijyi yunganira umujyi wa Kigali, kubaka imidugudu ifite ibikorwa byita ku bidukikije, no gukoresha rondereza, biyogazi, na gazi ikomoka kuri peteroli.

Ati “Ibyo byose kuba byarakozwe, turashishikariza Abaturarwanda gusura Pariki z’igihugu, ndetse no guteza imbere ibikorerwa mu Rwanda byakozwe mu mutungo wacu karemano”

Akomeza avuga ko Abanyarwanda bakwiye guhuza ubuzima bwabo n’ibidukikije babyaza umusaruro umutungo kamere batekereza kuri ejo hazaza.

Ikindi kandi barasabwa gufata neza ubutaka, amazi y’imvura no gushora imari mu gushaka imbuto zihanganira ibihe by’amapfa.

Habimana Jean Baptiste wo mu murenge wa Gashenyi, mu karere ka Gakenke, avuga ko kubungabunga ibidukikije ari bo ba mbere bifitiye inyungu.

Yagize ati “Umugezi wa Base kuva aho utangiye kubungwabungwa, hagaterwa imigano ku nkengero zawo; kuri ubu umusaruro wiyongeyeho 30% by’uwo twabonaga mu bihe byashize.

Akenshi ubutaka bwakundaga gutwarwa n’isuri, amazi akadutera mu ngo, agatwara imyaka yacu, ariko ubu; imigano ifata amazi ntarenge umugezi; ibi ni ibintu dushimira Leta y’ubumwe ko yita ku baturage, ikareba ibibafasha kugira ngo bakomeze gutera imbere.”

Mu gikorwa cyo gusoza icyumweru cyahariwe kubungabunga ibidukikije, hakozwe umuganda ku nkengero z’umugezi wa Base haterwa ibiti bivangwa n’imyaka n’ibyatsi birwanya isuri.

Umunsi mpuzamahanga w’ibidukikije wizihizwa ku isi yose ku wa 5 Kamena buri mwaka, ugamije gushishikariza isi yose cyane cyane abafata ibyemezo kwitabira ibikorwa bigamije kurengera ibidukukije no guhangana n’imihindagurikire y’ibihe.

Insanganyamatsiko y’uyu mwaka iragira iti “Duhuze umuntu n’ibidukikije, ni ryo shingiro ry’ubuzima”.

NGABOYABAHIZI PROTRAIS

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE