2017-11-22 09:53:14 clouds 27o High | Kigali Rwanda

Dukurikire:
 
 

Depite Bitunguramye yasabye urubyiruko gusigasira ibyiza igihugu kimaze kugeraho

Yanditswe na IMVAHO NSHYA

Kuya 2017-05-16 14:47:20

 
Share on:
 
Yasuwe:57
 
Yavuzweho:200
 
10
 
10

Urubyiruko rwo mu Karere ka Rulindo rurasabwa guharanira gusigasira ibyiza igihugu kimaze kugeraho mu myaka 23 ishize, kandi rukamaganira kure abagifite imigambi mibi yo kwangiza ibyagezweho.

Ubu butumwa bwagarutsweho na Depite Bitunguramye Diogene mu muhango wo kwibuka urubyiruko rwazize Jenoside yakorewe abatutsi mu karere ka Rulindo, ni umuhango wabaye ku wa 14 Gicurasi 2017.

Mu ijambo rye, Depite Bitunguramye yasabye urubyiruko gushishoza bakamenya igikwiye, bakirinda uwagerageza kubashuka abashyiramo ibitekerezo bibi.

Yagize ati “Murasabwa gusubiza amaso inyuma mukareba aho igihugu cyanyu cyavuye n’aho kigeze kiyubaka maze mugahitamo igikwiriye. Ndabasaba kwishyira mu mwanya w’abarokotse Jenoside kugira ngo mubashe kumva agahinda bafite, bityo mubafashe mu bibazo n’akababaro babayemo kandi mubafashe kuzirikana ibyiza igihugu cyanyu kimaze kugeraho nyuma ya Jenoside yakorewe abatutsi mu 1994”.

JPEG - 111.1 kb
Depite Bitunguramye Diogene yasabye urubyiruko gusigasira ibyiza byagezweho

Gashumba Yves Fabrice, umwe mu barokotse Jenoside yakorewe abatutsi, yagaragaje ibihe bikomeye yanyuzemo, ariko kubw’amahirwe akabasha kurokoka, n’ubwo ababyeyi n’abavandimwe be bishwe muri Jenoside yakorewe abatutsi.

Yagize ati “Abavandimwe n’ababyeyi banjye bishwe ndeba n’amaso yanjye, nanjye ubwanjye bansize bazi ko napfuye, kuko bari bankomerekeje bikabije bansiga bazi ko napfuye, ariko kubw’amahirwe Imana ikinga ukoboko ndarokoka. Navukanaga n’abana 9, ariko bose barabishe muri Jenoside ndetse n’ababyeyi banjye”.

Yakomeje agira ati “Ndashimira ingabo zahoze ari iza FPR-Inkotanyi zahagaritse Jenoside, ubu nkaba ndiho kandi nkaba ngerageza kwiteza imbere.”

Urubyiruko rwitabiriye uyu muhango muri rusange rwiyemeje kuzirikana no kubungabunga ibyiza igihugu kimaze kugeraho nyuma ya Jenoside, birimo umutekano, ibikorwaremezo, n’iterambere, byose bakaba babikesha imiyoborere myiza nk’uko babisobanura.

Muri uyu muhango wo kwibuka urubyiruko rwazize Jenoside yakorewe abatutsi mu 1994 mu karere ka Rulindo, abawitabiriye bunamiye abazize Jenoside, ndetse banashyira indabo ku mva zishyinguwemo imibiri y’abatutsi bazize Jenoside.

Hatanzwe kandi ubuhamya, ibiganiro n’ubutumwa bushishikariza urubyiruko kurwanya Jenoside n’ingengabitekerezo yayo, bagaharanira kwimakaza ubumwe n’ubunyarwanda. Urubyiruko kandi rwasinye amasezerano y’igihango cy’urungano, biyemeza ko bagiye gukomeza gushyigikira abagizweho ingaruka na Jenoside yakorewe abatutsi mu 1994.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE