2017-08-18 14:28:59 clouds 27o High | Kigali Rwanda

Dukurikire:
 
 

Burera: Ijerekani y’amazi y’ibirohwa igura amafaranga 150

Yanditswe na IMVAHO NSHYA

Kuya 2016-06-04 12:49:54

 
Share on:
 
Yasuwe:5
 
Yavuzweho:200
 
10
 
10

Abaturage bo mu murenge wa Kagogo mu karere ka Burera baratangaza ko ikibazo cyo kutagira amazi meza n’igiciro cyayo kiri hejuru, kibaremereye cyane.

Abaturage bo mu tugari twa Kiringa na Kabaya mu murenge wa Kagogo nibo bafite ikibazo cyo kutagira amazi.Bemeza ko abenshi bivomera ibirohwa by’imigezi yiroha mu kiyaga cya Burera abandi bakaba bamenyereye kuvoma amazi y’icyo kiyaga.

Murihano Dismas, umwe mu bavukiye muri uriya murenge, yagize ati:“Mu myaka 60 maze mvutse navukiye aha, nta mazi meza twigeze tunywa, twavomaga mu kiyaga cya Burera, ariko noneho ubu ntangazwa no kubona noneho ijerekani y’amazi y’ibirohwa avuye muri iki kiyaga agera hano igura amafaranga hagati ya 100 na 150.

JPEG - 58.9 kb
Bamwe mu baturage bakoresha amazi bavomye mu kiyaga cya Burera (Foto archive)

Amazi hano asigaye ahenze kuruta umunyu, kuko nawe urabona iyi misozi kuyizamuka ni ikibazo kubera imiterere y’uyu murenge ugizwe n’imisozi”.

Akomeza avuga ko ubu ngo bafite ikibazo cy’inzoka zo mu nda kubera gukoresha amazi mabi.Ati:“Reba nawe kugira ngo uvome amazi haruguru bari kumeseramo ibintu bitandukanye n’imyanda itandukanye, urumva ko turya imyanda y’uruvangitirane, gusa kubera ko atugeraho avuye kure kubera ko twavuye mu manegeka hakaba hari hegereye ikiyaga, twemera kugura ibirohwa duhenzwe, ubuyobozi ndabusaba kutubonera amazi meza.”

Umunyamabanga Nshingwabikorwa w’umurenge wa Kagogo Butoyi Louis, nawe yemeza ko iki kibazo cy’amazi kigoye cyane abaturage ayobora.

Yagize ati:“Iki ni ikibazo gikomereye abaturage cyane kubera ko nta mavomo bafite ibi bikaba bibagiraho ingaruka zikomeye, aha navuga nk’abo mu tugari twa Kiringa na Kabaya.

Iki rero kikaba ari kimwe mu bibazo biturenze gusa twakimenyeshesheje akarere, katwijeje ko kiri mu bizashyirwa mu ngengo y’imari y’umwaka utaha, nkaba nsaba abaturage ko mu gihe batarabona imigezi bajya bakoresha amazi atetse”.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE