Advertisement
 
 
 
 
 
 
 
 

Amakuru | Mu Ntara | Intara

BURERA: Babujijwe amahwemo n’itsinda ry’insoresore ziyita ‘Solola Bien’   

  Yanditswe na NGABOYABAHIZI PROTAIS
 March 2016

 
 

Abaturage bakorera, abatuye n’abagenda mu isantere ya Rwibikonde iherereye mu murenge wa Kagogo, mu karere ka Burera, bavuga ko hari itsinda ry’insoresore ziyita ‘Solola Bien’ zababujije amahwemo, kuko ngo zibambura, zikabakubita hakaba n’abo zica.

Iyi santere y’ubucuruzi ya Rwibikonde ihereye mu birometero bigera kuri 5 uvuye k’umupaka w’u Rwanda na Uganda, ikaba kandi k’umuhanda wa Cyanika-Musanze.

Hashakimana Jean Bosco, umwe mu batuye muri iyi santere, yabwiye Imvaho Nshya ko abagize iri tsinda bakora ibikorwa bitandukanye by’ubugizi bwa nabi, ndetse ngo hari n’abantu batatu we yibuka bishwe n’izi nsoresore mu bihe bitandukanye.

Yagize ati:“Insoresore ziyise Solola Bien ubu zitumereye nabi cyane, ntidusinzira, kuva navuka abasore bo muri iyi santere ya Rwibikonde barigomeka kugeza n’ubwo bica bagenzi babo.

Ndakubwiza ukuri mu gihe kitarenze imyaka 3 hano hamaze kwicirwa abantu 3, hari umucuruzi baharasiye, hari umushoferi, hari umumotari, bwa nyuma ni umusore witwa Serubini ejobundi ntiharashira icyumweru bamuteraguye ibyuma”.

JPEG - 108.1 kb
Isantere ya Rwibikonde ivugwamo abasore bahungabanya umutekano(Foto Ngaboyabahizi P)

Uyu mugabo akomeza avuga ko n’ubuyobozi buzi ko kiriya kibazo kiriho, ariko ngo abagize iri tsinda bagakomeza kwidegembya basahura, bategera abantu mu nzira bakagera n’ubwo babica.

Undi muturage witwa Siborurema, we yagize ati:“Ni kuki izi nsoresore zikomeza kwidegembya? Ndasaba inzego zishinzwe umutekano gukambika hano, nawe se abasore birirwa bicaye bagakenera kurya wumva amaherezo atari ukwiba no gukomeza kutwicira abana?”

Nkunzimana Justin, wahoze ari ‘Konseye’ muri uyu murenge, avuga ko iri tsinda ry’insoresore z’abajura rimaze igihe kirekire cyane, kuko ngo nawe yagiye ku buyobozi akarisangaho riteza umutekano muke, n’ubu rikaba ritarasenyuka ngo abaturage bagoheke.

Yagize ati:“Aba basore mubona ngo barahungabanya umutekano hano bivugwa ko ari abo muri Solola Bien, ahubwo ni abuzukuru ba Solola Bien, kuko aka gatsiko no kuri Repuburika ya 2 kariho, iyi santere yahoranye amahane.

Mbese n’izina Rwibikonde ni ho ryaturutse kubera ko abasore baho bakundaga guterana inkonde(amakofe), ntibatinyaga gukubita abashinzwe umutekano, nanjye ubwanjye bigeze kumfungirana, mbese ni ibintu bimaze igihe hano, ubuyobozi nibutabikumira turagowe”.

Uyu mugabo akomeza avuga ko uwari Burugumesitiri w’icyahoze ari komini Kidaho witwaga Ntahompagaze we ngo yari yasenye iri tsinda burundu, ariko nyuma riza kongera kuvuka bundi bushya.

Umunyamabanga Nshingwabikorwa w’akagari ka Kayenzi Nyiranzitabakuze Beatrice, yabwiye Imvaho Nshya ko ikibazo cy’umutekano muke muri iyi santere ya Rwibihunde nabo bakizi.

Yavuze ko igiteye impungenge kurushaho ari uko iki kibazo kiri guhindura isura, ahanini bitewe n’ibiyobyabwenge abasore bo muri iyi santere banywa, icyakora ngo ubuyobozi bwafashe ingamba zo gukaza amarondo, abahungabanya umutekano bagashyikirizwa inzego zishinzwe umutekano.

Uyu muyobozi yaboneyeho umwanya wo gusaba abaturage gutangira amakuru ku gihe, kugira ngo abahungabanya umutekano bafatirwe ingamba zikarishye.

 

Comments

 
 
Hamuritswe igishushanyombonera cy’umujyi wa Bugarama
Hamuritswe igishushanyombonera cy’umujyi wa Bugarama

Mu gihe kiri imbere igice kinini cy’umurenge wa Bugarama kigiye kuba umujyi wunganira umujyi wa Rusizi, igishushanyombonera cyawo kikaba cyaramurukiwe abatekinisiye b’akarere n’ubuyobozi bw’uyu (...)

Rusizi:Abaturage bafashe ingamba zo kwicungira umutekano
Rusizi:Abaturage bafashe ingamba zo kwicungira umutekano

Nyuma y’aho mu rukerera rwo ku wa 12 uku kwezi abantu bataramenyekana bateye mu kagari ka Ryankana mu murenge wa Bugarama bakaharasira abaturage 3 babiri bagahita bahasiga ubuzima, abaturage b’uyu (...)

Guverineri Mureshyankwano yasabye urubyiruko kwirinda ibiyobyabwenge
Guverineri Mureshyankwano yasabye urubyiruko kwirinda ibiyobyabwenge

Ubwo hizihizwaga umunsi ngarukamwaka witiriwe Mutagatifu Yozefu, Guverineri w’Intara y’Amajyepfo Mureshyankwano Marie Rose yasabye abanyeshuri biga mu rwunge rw’amashuri rwitiriwe Mutagatifu Yozefu (...)

Gakenke-Muyongwe: Kubona ‘rezo’ ya telefone biracyari ingorabahizi
Gakenke-Muyongwe: Kubona ‘rezo’ ya telefone biracyari ingorabahizi

Abaturage bo mu murenge wa Muyongwe mu karere ka Gakenke, bavuga ko bababajwe no kuba burira imisozi bajya gushaka ihuzanzira (rezo) rya telefone ngendanwa, bagasaba ubuyobozi kubafasha gukemura (...)

Ngoma:Batewe impungenge n’igiciro cy’amakara cyazamutse cyane
Ngoma:Batewe impungenge n’igiciro cy’amakara cyazamutse cyane

Bamwe mu batuye umujyi wa Ngoma, mu ntara y’Uburasirazuba, baravuga ko bakomerewe n’ikibazo cy’ibura ry’amakara yo gutekesha, n’aho bayabona bakayabona ku giciro bavuga ko gihanitse bagereranyije (...)

Advertisement

OPP. MAGERWA, EXPO GROUND, GIKONDO KIGALI, RWANDA PHONE NO : +250-784867952 / 53

© Copyright 2015: Imvaho Nshya. All rights reserved.
Powered by: RPPC.