2017-07-28 06:05:39 clouds 27o High | Kigali Rwanda

Dukurikire:
 
 

Barasaba ko uwari uyoboye CIMERWA muri Jenoside aryozwa ibyo yabakoreye

Yanditswe na IMVAHO NSHYA

Kuya 2016-04-24 12:36:53

 
Share on:
 
Yasuwe:88
 
Yavuzweho:200
 
10
 
10

Abarokotse Jenoside yakorewe Abatutsi mu 1994 bakoraga mu ruganda rukora sima rwa CIMERWA n’abari baruturiye mu karere ka Rusizi, barasaba ko uwari umuyobozi mukuru w’urwo ruganda, Sebatware Marcel, afatwa agakurikiranwa ku ruhare yagize muri Jenoside.

Abaganiriye n’Imvaho Nshya bavuga ko Sebatware yari afite ubugome ndengakamere, aho yakoranaga bya hafi na Yusufu Munyakazi, interahamwe ze ndetse n’izindi zakoraga muri urwo ruganda.

Ngo ntiyatinyaga kugaragaza urwango yanga Abatutsi, bihereye mu kubatoteza kuva urugamba rwo kubohora igihugu rwatangira aho yabitaga amazina mabi afatanya n’izindi ntagondwa kugeza ubwo benshi bishwe urw’agashinyaguro ku ya 16 Mata 1994.

JPEG - 318.5 kb
Bamwe muri aba bo mu miryango y’abishwe ngo na bo bazatuza imitima ari uko bumvise ko Sebatware Marcel yafashwe.

Umwe mu baharokokeye ukinakora muri CIMERWA, Bapfakurera Jean, yabwiye Imvaho Nshya ati” Dushengurwa cyane no kumva ko Sebatware Marcel yidegembya mu Bubiligi ahakwirakwiza ingengabitekerezo ya Jenoside n’ibintu yadukoreye hano adutoteza, adushumuriza interahamwe z’Abarundi n’iza Yusufu Munyakazi n’ubundi bugome yadukoreye.”

Yongeyeho ati” Kuki adafatwa ngo ashyikirizwe inkiko nk’izindi nkoramaraso,ngo aze aduhe ubuhamya ku bugome batugiriraga n’ukuntu bari barabuteguye? Akwiye gufatwa akazanwa hano mu murenge wa Muganza abaturage bakamubona kimwe n’izindi nterahamwe zabagamo hano zikidegembya zikatubwira ukuri kuri buriya bugome bwazo.’’

JPEG - 353.3 kb
Bamwe muri aba barokokeye muri CIMERWA

Avuga ko ubwo Jenoside yari ikomeye mu cyahoze ari komini Bugarama, Sebatware yakoresheje inama yo gutegura itsembwa ry’Abatutsi bakoraga muri uru ruganda avuga ko ngo ari iyo gutegura batisimu y’abana be kandi bari barabatijwe kera.

Ati’’ Iyo batisimu se yateguraga ko itabaye, ko abana bari barabatijwe kera, yari batisimu yihe ko kwari ugushaka kudutsemba!”

Kimwe na bagenzi be barokotse Jenoside bavuga ko ku wa 16 Mata, saa sita z’amanywa ari ho interahamwe zari zatumijwe n’uyu muyobozi zikajya kuzanwa n’uwitwaga Ndorimana Casimir, kuri ubu ufungiye muri gereza ya Rusizi, zaje zikabicamo abarenga 58..

Bavugamo n’andi mazina y’abari abakozi b’uru ruganda bakoraga amalisiti yo kwica Abatutsi, na bo bacyidegembya hirya no hino,ariko bakavuga ko uyu muyobozi afashwe akazanwa kubisobanura byabafasha cyane.

Ubwo yari mu murenge wa Bugarama mu gihe cyo gutangiza icyunamo, Visi-Perezida w’inteko ishinga amategeko,umutwe w’abadepite,Mukama Abbas yahumurije ababuze ababo muri Jenoside yakorewe abatutsi bose ababwira ko nta wakoze Jenoside uzihisha iteka kuko iki cyaha kidasaza,kabone nubwo yagira imyaka 100 ngo azafatwa aryozwe ibyo yakoze.

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE